Hebilunba 9 - Gourmanchéma Bible

¹ O ŋantaadikpialo moko den pia o ñoabona ya n tuugi leni i jaaandi leni u *kaangagidiŋamu yu n den ye ŋanduna nni.

² Lane, bi den tii li gbandieli. Li kaankpialu ban yi yu u kaangagidiŋamu niinni u fidisantuankaanu, tabili leni *dupen bilika.

³ Bu *kpalidoaginkaliebu liiga ban yi yaa kaanu u*kaangagidiŋanmoanu den ye.

⁴ Lienni den pia wula *padibinbinli ban den juugi a *dugibila naani, ki go pia ku *ŋantaadikpaku ban tabini yaagu wula ku kaani kuli. Ku ŋantaadikpaku niinni wula tiagu yaagu n pia *mana den ye, leni Alono gbiamu yu n den bundi, leni o *ŋantaado tanpabimu.

⁵ *Selubanba nannana, ya n doagidi ke U Tienu ye likani leni o kpiagidi, den se ku ŋantaadikpaku tanpoli ke bi fiabi tiani ki yiini ku ŋantaadikpaku bonbiili po, ban yi yaali li candanbaali kaanu. Ti kan maadi laa bonla bonbidibidi maama kuli moala po.

⁶ Ban den ŋanbi laa bonla kuli yeni bi kopadicianba den maani ki kua li gbandieli kaankpialu niinni ki tuuni yaa tuona n tuugi leni i jaandi.

⁷ Bi kopadicianba bado bebe n den yen kua binli kuli yenma li gbandieli kaanlielu nni. O kan kua se o kubi mi soama yaama n baa padi wani oba po leni ku niligu n tieni yaa tagili kaa bani kuli po.

⁸ U Tienu Fuoma Yua den wangi yeni ke hali li gbandiekpiali n da ye yaa yogunu kuli, u sanu daa ŋanbi yaala n tie u kaangagidiŋanmoanu nni kuama po.

⁹ Laa bonla tie li nannanli u naa yogunu po, ki waani ti ke ban cuani yaa paabu leni yaa pada kuli kan fidi ki ŋanbi o nilo wan dagidi cain, ki teni o pali siedi n duani.

¹⁰ Laa ñoabona kuli den tuugi leni mi jiema leni li bonñokaala, leni mi waliŋanbima buoli kuli, yaama n baa ye hali mi lebidima yogunu n baa cua.

¹¹ Ama Kilisiti den cua ki tie kopadicianba bado yaa bonŋanla n baa cua po. O kua yaa gbandieli n yaba ki go ŋani ki cie niinni bi nisaaliba n ki den tii yaala, ki naa tie mi naa tagima nni yaala mo.

¹² O den kua u kaangagidiŋanmoanu nni yenma, ke li dagidi i yogini kuli po. Waa den kua leni a naabila leni a ŋuabuana yaa soama ka, ama leni wani oba yaa soaceli, ki baa tipo yaa *daafaabima n baa ye hali yaa yogunu kuli.

¹³ Kelima li yaa tie ke a naatona leni a ŋuabuana soama leni o naasalo fantanpienma den mii yaaba n *joagini po ki ŋanbi ba ki ñani bi gbanandi joagindi yeni,

¹⁴ lanwani laa pia kuli tama ke Kilisiti yaa soama, wani yua n den puni o yuli U Tienu nani yaa padili n ki pia joagindi kelima U Tienu Fuoma yaama n ye hali yaa yogunu kuli paalu yaa po, baa ŋuudi ki ŋanbi ti pala siedi leni yaa tuona n baa cuani mi kuuma ke tin yaa tuuni U Tienu yua n ye ki fo yaa po.

¹⁵ Li tie lani yaa po ke Kilisiti tie o *ŋantaadipaano candanbaalo ke U Tienu n yini yaaba kuli baa baa wan den niani ba yaa ŋalimani, yi n baa ye hali yaa yogunu kuli. Lankuli baa tieni kelima Kilisiti kpe ke o kuuma faabi ba leni ban den tieni yaa *tuonbiadi o ŋantaadikpialo n den die ba yaa yogunu.

¹⁶ O nilo yaa ŋa ñoabu bonlaba po, li tie tiladi ke lan doagidi ke laa nilo kpe.

¹⁷ Kelima laa ñoabu kan yaa pia fuoma, yua n ŋa bu n da fo yaa yogunu. Ama bu pia mi fuoma, yua n ŋa bu yaa kpe.

¹⁸ Lani yaa po baa U Tienu ŋantaadikpialo ki den bili kali ban kodi ti yandi ki wuli ti soama.

¹⁹ Musa n den waani Isalele yaaba U Tienu *balimaama ñoabona kuli yaa yogunu, o den taa a naabila leni a ŋuabuana soama ki kali ma leni mi ñima, ki go taa ti pekobimoandi leni *isope tiidi benu ki tu mi soama yeni, ki mii li tili lini liba po leni bi niba kuli po, ki yedi:

²⁰ «Line n tie o ŋantaado soama U Tienu n bili yipo yua.»

²¹ Musa go den tu laa soama ki mii li gbandieli leni lin pia yaa tiadi kuli i jaandi po.

²² Li balimaama nni li bua ki yaa tie ke li bonla kuli n yen ŋanbidi leni mi soama. Mi soama yaa wuli, tuonbiadi sugili ki ye.

Kilisiti padili ñani ti tuonbiadi cain

²³ Li den tie tiladi ke tanpoli bonla nannana n ŋanbi kelima laa pada po, ki go tie tiladi ke yaa pada n ŋani ki cie n ŋanbi tanpoli bonmoanla.

²⁴ Kelima Kilisiti ki den kua bi nisaaliba n tii yaa kaangagidiŋamu yu n tie u bonmoanu nannanli niinni ka. O den kua tanpoli oba yaa niinni, ki baa ye U Tienu kani moala ki miadi o tipo.

²⁵ Waa den kua tanpoli po ki baa yen padi o yuli i yogini boncianla, nani bi kopadicianba bado kuli n yen kua u kaangagidiŋanmoanu nni ki kubi mi soapanma maama.

²⁶ Li yaa den tie yeni, Kilisiti den baa cili ŋanduna tagima yogunu ki yaa laadi fala. Ama moala ŋanduna juodima yogunu, o cua ki padi o yuli yenma u yogunu kuli po, ki bolini ti tuonbiadi.

²⁷ Nani lan bili nisaalo kuli po ke o baa kpe yenma maama, lan yaa pendi ti buudi n cua.

²⁸ Li tie yeni ke Kilisiti den padi o yuli ki kpe yenma, ki tugi bi nisaaliba boncianla tuonbiadi. O go baa cua mi liema ki doagidi o yuli ke li kan go yaa tie ti tuonbiadi ñanma po ka, ama yaaba n den gu o *tindima po.