Hebilunba 8 - Gourmanchéma Bible

¹ Yaala n tugi li yuli tin maadi yaa maama kuli siiga n tie na: ti pia yaa kopadicianba bado n ka tanpoli, U Tienu yua n pia ti kpiagidi jienu po.

² Lankane ke o tuuni u *kaangagidiŋamu nni, lani n tie o Diedo wani oba n tii yaa gbandiemoanli, ke nisaalo ka tii li.

³ Bi yen dini bi kopadicianba bado kuli ke wan yaa kpendinni U Tienu kani bu paabu leni a pada. Lanwani li tie tiladi ke ti yaa kopadicianba bado yeni moko n yaa pia wan baa pa U Tienu yaala.

⁴ O yaa bi ye ŋanduna nni o kan bi yaa tie baa kopadiciamo moko. Kelima yaa kopadicianba n kpendinni bu paabu nani li *balimaama n bili maama da ye.

⁵ Bani n tuuni i jaandi taanma tuonli yaali yeni tie tanpoli bonmoanla nannanli leni li jinjingu. U Tienu den tuodi ki waani Musa yeni, wan den baa tii li gbandieli yaa yogunu, ki yedi o: «Ŋan fangi a yuli ki tieni likukuli lan yaa tie nani min waani a yaa nannanli li juali po yeni.»

⁶ Ama moala Kilisiti pia yaa tuonli n ŋani ki cie yeni, kelima o tie yaa *ŋantaado n ŋani ki cie yaa *candanbaalo. Laa ŋantaado se yaa ñoaniani n ŋani ki cie po.

⁷ O ŋantaadikpialo yaa den ŋani cain kaa pia poadi, li kan den yaa tie tiladi ki lingi o bonyuamo.

⁸ Ama li tie nani ke o Diedo jaligi o niba ki yedi: «Diidi, u yogunu kpendi Ke n baa kuani yaa ŋantaado n paani Leni Isalele leni Juda buoli yaaba siiga O Diedo n yedi yeni.

⁹ O kan yaa tie nani min den kuani Yaa ŋantaado leni bi yaajanba, Min den cuo bi nii ki dadi Ki ñani ba Ejipiti diema nni yaa daali. Kelima baa den tuo ki kubi n ŋantaado. Lanwani mini mo ki go den yagi n yama bipo. O Diedo n yedi yeni.»

¹⁰ O Diedo go yedi: «Laa dana yaa pendi, Diidi min baa kuani Leni Isalele buolu yaaba yaa ŋantaado: N baa kuani n balimaama bi yantiana nni Ki diani ma bi pala nni. N baa tie bi Tienu, Bani mo baa tie n niba.

¹¹ Bi siiga oba kuli Kan go bangi o yieninlielo, Yaa ka o kpiilo ki yedi o: Bandi o Diedo. Kelima ki cili yaa biga n wa ki cie, Ki yaa caa hali yua n kpeli ki cie, Bikuli baa bandi nni.

¹² Kelima n baa tieni bipo sugili Bi tudima kuli po, Ki kan go tiadi bi *tuonbiadi po.»

¹³ Wan yedi o ŋantaadipaano yeni, o teni ke o ŋantaadikpialo kpeligi. To, yaala n kpeligi ki podi mo bua ki pendi.