Galati 6 - Gourmanchéma Bible

¹ N kpiiba, bi yaa pigini o nilo ke o tiendi *tuonbiadiba, yi siiga nni U Tienu Fuoma n gobidi yaaba n pegidi ki guani o leni mi dingima. Fangi a yuli ke a mo n da ti kua mi tulinma nni.

² Yaa todi mani yiyaba leni yin tugi yaa tuga, yeni yi baa tiendi Kilisiti bali maama n bili yaala.

³ O nilo yaa nua ke o tie bonmoanla, kaa tie pu, o boandi o yuli.

⁴ Yua kuli n biigi o tuona oba. Lanwani o yaa baa jigini o yuli lipo, li kan yaa tie ke o cie o lielo ka.

⁵ Kelima nilo kuli baa tugi o yaa tugiceli wani oba.

⁶ Ban bangi yua U Tienu maama n boagidi wan pia yaala kuli leni yua n bangi o.

⁷ Yin da boandi mani yi yula, oba kan ñuadi U Tienu. O nilo baa yendi wan buli yaala.

⁸ Yua n buli o gbanandi bonbuakaala po, baa yendi o gbanandi bonbuakaala po mi bedima. Yua n buli U Tienu Fuoma n bua yaala, baa yendi U Tienu Fuoma po yaa miali n kan gbeni.

⁹ Tin da coagi leni a tuonŋama tienma, kelima ti yaa cedi, u yogunu yaa ti pundi, ti baa baa ti panpaani.

¹⁰ Lanwani tin baa u sanu yaa yogunu kuli, tin yaa ŋanbidi bi niba kuli po, ki yaa ŋanbidi ti kpiiba li *dandanli nni po ki cie.

I tundijuodike

¹¹ Diidi ki le mani min diani yipo yaa diani leni n nuceli n gbengi maama.

¹² Yaaba n bua bi niba n yaa kpiagidi ba kuli tigini yi ke yin kua ku koanciagu, ke bi niba n da wangi ba fala kelima Kilisiti*dapoanpoanli yaa po.

¹³ Baa bani yaaba n kua ku koanciagu, baa tiendi li *bali maama n bili yaala. Ama bi nan bua ke yinba n kua ku koanciagu ke ban baa u sanu ki kpiagi bi yula kelima yaala n tieni yi gbanandi nni yaa po.

¹⁴ Ama mini, n kan tuo ki kpiagi n yuli bontoala kuli po, kali ti Diedo Jesu Kilisiti dapoanpoanli. Kilisiti n den kpe li dapoanpoanli po yeni, ŋanduna bonla kuli tie npo nani li kpe, n moko tie nani n kpe ŋanduna bonla kuli po yeni.

¹⁵ Kelima yaala n pia mayuli naa tie ki kua ku koanciagu, bi ki da kua, laa tie liba, kali ki yaa tie nipaano.

¹⁶ Yaaba n tuo ki ŋua laa maama kuli, U Tienu n pa ba mi yanduanma, ki go gbadi bipo mi niñima, bani U Tienu nibuolu Isalele yaaba yeni.

¹⁷ Moala liiga oba kuli n da go yagi n yama, kelima n pia Kilisiti maalima n gbanandi nni.

¹⁸ N kpiiba, ti Diedo Jesu Kilisiti yaa *ŋanbili n yaa ye leni yi! Amina!