Galati 5 - Gourmanchéma Bible

¹ Kilisiti den faabi ti ke tin yaa die ti yula. Lani yaa po sedi mani bonŋanla ki da go kuani yi yula ti yonbidi yaa lolima nni.

² Cengi mani, mini Polo n yedi yi, ke yi yaa tuo ke bi kuani yi ku koanciagu, Kilisiti naa go pia yipo mayuli.

³ N go kadi ki waani yua n tuo ke bi kuani o ku koanciagu kuli, li baa tie opo tiladi wan yaa tiendi li *bali maama n bili yaala kuli.

⁴ Yinba yaaba n lingi li *moamoansaali li balimaama nni, yi paadi leni Kilisiti, ki luo U Tienu *ŋanbili.

⁵ Ama tinba, li tie li *dandanli yaa po leni U Tienu Fuoma paaciamu po ke ti gu ki sugini ke ti baa li moamoansaali.

⁶ Kelima Jesu Kilisiti nni ki kua ku koanciagu, bi ki da kua, ka pia mayuli, kali li dandanli yaali n doagidi mi buama nni.

⁷ Yi den cili ki tiini mi nuama bonŋanla. Ŋme n den pigini ki yie yipo ke yii go tuo ki ŋua i moamoani?

⁸ Laa bonla naa ñani U Tienu yua n yini yi yaa kani.

⁹ «Li dabinli waamu bebe baa teni ti yonbudi kuli n pili.»

¹⁰ Mini yaa po, n pia yipo ti dugidi o Diedo nni ke yi kan tuo ki tia bontoala po. Ama yua n lengidi yi yama, wan tie yua kuli, U Tienu baa bu ki cuo o.

¹¹ N kpiiba, li yaa bi tie ke n baa wangi ke ku koanciagu tie tiladi, be yaa po ke bi go wangi nni fala? Li yaa bi tie yeni, li *dapoanpoanli n cuani yaa tudima bodi.

¹² N bi bua ke yaaba n yagini yi yama leni ku koanciagu maama yeni n jia ki fali biba.

¹³ N kpiiba, U Tienu den yini yi ke yin yaa die yi yula. Yin da taa laa yudiedima ki yaa tiendi yi gbanandi bonbuakaala. Ama, mi buama po, yin yaa tuuni ki todi yiyaba.

¹⁴ Kelima li balimaama kuli taani mayenma nni, yaama n tie na: «Ŋan bua a nisaalilielo nani ŋan bua a yuli maama yeni.»

¹⁵ Ama yi yaa ñi yiyaba ki go ŋmani yiyaba, yin fangi mani yi yula, ke yi baa bolini yiyaba.

Ti gbanandi yaa tuona leni U Tienu Fuoma gobidima

¹⁶ Min yedi yi yaala tie line: Cedi mani U Tienu Fuoma n yaa gobidi yi, lani yi kan yaa go tiendi yi gbanandi bonbuakaala.

¹⁷ Kelima o nisaalo gbanandi n bua yaala nia leni U Tienu Fuoma n bua yaala, U Tienu Fuoma n bua yaala mo nia leni ti gbanandi n bua yaala. Li bonliedila yeni koani leni biyaba, ki tendi ke yii fidi ki tiendi yin bua yaala.

¹⁸ U Tienu Fuoma yaa gobidi yi, li bali maama kaa go die yi.

¹⁹ To, o nisaalo gbanandi tuona doagidi, lani n tie mi *conconma buoli kuli, ti *joagindi leni ti cagindi,

²⁰ i *buli ŋoadima leni u ñoagubiadu lingima, ti yibalindi leni li koanli leni li nunponli, li pabienli leni yaa yantiali n tie ki niagi leni o lielo, leni mi paadima,

²¹ leni li nunponbiadili, leni li dañogaadili, leni ku nuagu leni laa bonbuoli kuli. N go tuodi ki waani yi nani min den kpa waani yi maama, ke yaaba n tiendi laa bonjoagindi buoli kan kua *U Tienu diema nni.

²² Ama U Tienu Fuoma n baa cuani yaa bonluonkaala tie: mi buama, li pamanli, mi yanduanma, li juunli, mi ŋanma, ti bulicindi, ti dugidi, mi dingima, leni li yukubili.

²³ Li bali maama naa koani leni laa bonla.

²⁴ Yaaba n tie Kilisiti yaaba joani ti gbanandi leni ti yantiali leni ti bonbuakaala li dapoanpoanli po.

²⁵ U Tienu Fuoma yaa teni ke ti fo, tin go yaa cuoni kelima o yaa po.

²⁶ Tin da gbengidi ti yula, ki da ñundi tiyaba li mutuoli, ki da pia li nunponbiadili tiyaba po.