Galati 4 - Gourmanchéma Bible

¹ Diidi, n yedi ke hali o faajielo n da tie biwaaga yaa yogunu, waa paadi leni o yonbo, baa ke o die li bonla kuli.

² Wan da tie bonwaaga yeni yaa yogunu, o pia yaaba n die o ki go gobidi o piama hali o baa n den bili yaa yogunu n baa ti pundi.

³ Li den tie yeni leni tinba tin den tie nani a bila yeni yaa yogunu ke ŋanduna bogida den die ti.

⁴ Ama U Tienu n den bili yaa yogunu n pundi, o den soani o Bijua ŋanduna nni ke o pua mali o, ke li *balimaama n die o,

⁵ ke wan faabi li bali maama n die yaaba kuli, ke tin tua U Tienu bila ki baa mu bimoanmu yaa bali.

⁶ Lani yaa po, kelima yi tua U Tienu bijaba, wani U Tienu n den soani o Bijua Fuoma ti pala nni ke o kpaani ki tua U Tienu: «N Baa, n Baa.»

⁷ Lanwani ŋaa go tie yonbo, a di tie U Tienu bijua. Ŋan tie U Tienu bijua yeni, o baa pa ŋa wan bili o bila po yaa ŋalimani.

Polo yama lengidi Galati yaaba po

⁸ Yaa yogunu n pendi, yin ki den bani U Tienu yaa yogunu, yi den ŋua i *buli yi n ki tie U Tienu yeni, ki go tie li yonbi.

⁹ Ama moala ke yi bandi U Tienu, bi ke U Tienu n bani yi, be n teni ke yi lebidi ki go ŋua bi nisaaliba bogida ya n tadi kaa pia mayuli, ki bua ki go tua laa bonla yonbi?

¹⁰ Yi gagidi danaba leni ŋmaaliba leni yoginiba leni binaba, ke likuli tua yi jaanma yogini.

¹¹ N jie ke daalinba min soani yaala yi siiga n da ti tua fanma fanma.

¹² N kpiiba, n mia yi ke yin tua nani mini n tie maama yeni, kelima n moko tie nani yinba n tie maama yeni. Yii tudi npo baa waamu.

¹³ Yi bani ke li tie n yianu po yo ke n den kpa waani yi o Laabaaliŋamo.

¹⁴ Baa ke n tadingu yeni den tie yipo mi biigima, yii den fali nni ki sengi nni. Yi den ga n cangu nani n tie U Tienu maleki yeni, nani n tie Jesu Kilisiti yeni.

¹⁵ Yin pia yaa pamancianli yeni kua le? N tieni yipo siedi ke laa yogunu, li yaa den baa fidi, yi den baa logidi yi nunceli ki pa nni.

¹⁶ Naani min maadi yi i moamoani yeni n teni ke n di tua yi yibali bi?

¹⁷ Yaaba n kpali ke bi bua yi yeni, yanjaga ki ŋani. Bi bua ke yin paadi leni nni ki ŋoadi bani.

¹⁸ To, li ŋani ke yin yaa pia li yankuali yaala n ŋani boncianla po yogunu kuli, laa tie min ye leni yi yaa yogunu bebe ka.

¹⁹ N bila, n go baa laadi yipo yaa fala n tie nani u maditugukoanu hali yin baa baa Kilisiti tagu buolu yi niinni.

²⁰ Min bua yaala tie ke n bi baa ye leni yi moala ki lebidi mataali leni yi, kelima n yama yagi yipo.

Agala leni Sala maama fuuli

²¹ Waani nni mani, yinba yaaba n bua ke li bali maama n yaa die yi, yii gba li bali maama n yedi yaala yoo?

²² Li diani lienni ke Abalahama den pia bonjala lie, o potuado Agala den mali opo yendo, yua n ki tie yonbo, Sala yeni mo den mali opo yendo.

²³ O potuado n mali yua den mali nani bi nisaaliba kuli n maa maama, yua n ki tie yonbo n mali yua den mali kelima U Tienu ñoanianu yaa po.

²⁴ Laa poliediba maama tie nani kpanjama ki doagidi U Tienu ŋantaadiliedi. O ŋantaadi-yendo yua n den kua Sinayi Juali kani naani leni Agala. Wani n mali yaaba kuli tie i yonbi.

²⁵ Agala yeni tie Sinayi Juali yaali n ye Alabi diema nni ki naani leni yaa Jelusalema dogu n ye moala, yua n ye ti yonbidi nni leni o bila kuli.

²⁶ Ama Jelusalema dogu yu n ye tanpoli die u yuli wuni n tie ti yaa naa.

²⁷ Kelima li diani: Fini ki ŋoaliga, yua n ki mali Ŋan yaa ye leni li pamancianli, Yeni de, fini yua n daa bani u maditugukoanu, Ŋan kpaani kelima a pamanli po, Kelima ku ponanbangu bila baa yaba Ki cie yaa pua n ye leni o calo yaa bila.

²⁸ N kpiiba, yinba n tie u ñoanianu bila nani Isaaka yeni.

²⁹ Nani yua n den mali nani bi nisaaliba kuli n maa maama n den wangi yua den n mali kelima mi Fuoma paalu po fala maama, li go tie yeni moala.

³⁰ Ama i Diani yedi lede? Li yedi: «Deli o potuado leni o bijua kuli, kelima o bijua kan taani ki je li faali leni yua n ki tie yonbo yaa bijua.»

³¹ Lanwani, n kpiiba, tii tie o potuado yaa bila ka, ti tie yua n ki tie yonbo yaa bila.