Filipi 3 - Gourmanchéma Bible

¹ N kpiiba, n majuodikaama tie mine: Yin yaa mangidi mani yi pala o Diedo nni. Laa coagini nni min go diani yipo yeni ki pugini, li go baa teni yin yaa se ke li pa.

² Yin yaa fangi mani yi yula leni yaaba n tie nani i sangbanli yeni leni bi tuonsoanbiadiba, bani yaaba n ñii ke ban kua ku koanciagu yeni.

³ Kelima tinba n tie a jungimoana, yaaba n kpiagidi U Tienu kelima o Fuoma yaa po, ki jigini ti yula Jesu Kilisiti nni, ki naa bili ti dugidi ti gbanandi nni.

⁴ Ama mini, n bi baa fidi ki dugi min tie maama po. Li yaa tie ke nitoaba nua ke bi baa fidi ki dugi ban tie maama po, mini n baa fidi ki cie.

⁵ Kelima bi den kuani nni ku koanciagu ke n pia dana nii. N tie Isalele yua, Benjamina buolu, ki tie Ebilu ke n yaajanba kuli tie Ebilunba. Yaala tie li *balimaama po, n den tie *Falisieni.

⁶ Yaala n tie n yankuali po, n den wangi Kilisiti nitaanli fala. Yaala n tie yaa*teginma n ŋua li balimaama kubima po, bi kan den fidi ki kuli nni leni liba kuli.

⁷ Ama min den nua yaala ke li tie npo bonmoanla yeni kuli, n di nua likuli ke li tie bonfanla kelima Kilisiti yaa po.

⁸ Moko, n nua li bonla kuli ke li tie nani li bonbodikaala yeni. Yaala n tie npo li bonmoanla tie: Ki bandi Jesu Kilisiti n Diedo. Kelima wani yaa po ke n tuo ki luni min pia yaala kuli, ki nua la nani ti baadi yeni, ke min fidi ki baa Kilisiti.

⁹ Mii go pia n yuli po yaa *moamoansaali n ñani li balimaama kubima nni, ama yaali n baadi kelima li *dandanli Kilisiti nni yaa po. Li tie yaa moamoansaali n ñani U Tienu kani ki ŋua leni li dandanli.

¹⁰ Min bua yaala tie min bandi wani Kilisiti, leni o fiima bi tinkpiba siiga paalu, ki go taani leni o o fala nni, ki yaa naani leni o o kuuma nni,

¹¹ ke mini moko n fidi, lan tie maama kuli ki pundi bi tinkpiba goafiima.

Polo tiini ki bua ki pundi li bianu

¹² Laa tie ke moala n baa i panpaani no ka, bi ke n ŋanbi ki dagidi cain no ka. Ama n suagi ki tiini ke min fidi ki cuo n nuama panpaani, kelima Jesu Kilisiti den cuo nni lani yaa po.

¹³ N kpiiba, mii nua ke n cuo laa panpaani no ka, n tiendi bonyenla, n sundi yaala n ye n puoli ki moandi ki suagi liiga.

¹⁴ Yeni n tiini ki cuubi n nuama juodima, ki baa baa laa panpaani. Lani n tie U Tienu n yini nni min baa yaa panpaani tanpoli po Jesu Kilisiti nni.

¹⁵ Tinba yaaba n kpedi o Diedo sanŋoadima nni kuli n yaa pia laa yantiali buolu. Yi yaa pia yantiatoali, lan tie yaala kuli, U Tienu baa yendi yi yama laa bonla po yin bandi ki pugini.

¹⁶ Ama tin pundi yaa bianu po, tin taani mani ki suagi liiga yenma.

¹⁷ N kpiiba, yin yaa ŋua mani n yaa fuuli ki yaa diidi yaaba n ŋua tin ŋa yipo yaa bontogidikaala.

¹⁸ Kelima niba boncianla ye, min den kpa waani yi yaaba yaa maama ki go wangi yi la moala leni a bubula, ke bi tagi doagidi ke bi tie Kilisiti *dapoanpoanli yibalinba.

¹⁹ Bi juodima baa tie mi bodima. Bi tugidi n die ba. Ban tama ke yaala n tie bipo ti jigidi yeni tie bipo i fe. Bi kuandi bi yama ŋanduna bonla nni bebe.

²⁰ Ama tinba, ti tie *tanpoli diema yaaba. Ti gu ke ti Candaano o Diedo Jesu Kilisiti baa go ña lankani ki cua,

²¹ ki lebidi ti gbanandi yaadi n tadi kaa go pia kpiagidi, ki teni tin yaa naani leni wani Kilisiti yaa gbanandi yaadi n pia ti kpiagiciandi. O baa tieni lani kelima o paaciamu po, yu n teni ke o paani li bonla kuli ki go die la.