Esiteri 9 - Gourmanchéma Bible

¹ Piiga n cilie, yaa ŋmaalo n yi Adadi, yaa piiga n dataali daali, o bado balimaama leni o ñoabonli n den baa tieni yaa daali den pundi. Jufinba yibalinba den sugini ke bi baa paadi ba laa daali. Ja li kan tua yeni, li den lebidi ke Jufinba n paadi ba.

² Jufinba den taani ban den yeye yaa dogi nni, o bado Asuelusi diema kuli nni, ki tuogi leni yaaba n den lingi ki baa kpa ba kuli. Nilo kuli ki den fidi ki tuogi leni ba ke li gedi kaanu kelima i nibuoli kuli den jie ba ke li kandi.

³ A baditiebila, leni bi yudancianba, leni a koanbala leni bi badibaanba den sedi Jufinba puoli kelima bi den jie Malidoke.

⁴ Bi den jie Malidoke kelima o den pia u paalu boncianla o bado diegu nni, ke o yeli mo ñani mi diema nni kuli kelima o paalu den pugidi.

⁵ Jufinba den pedi bi yibalinba kuli leni mu jugisiemu, ki ku ki bolini ba. Bi den tieni yaaba n nani ba yeni kuli nani ban bua maama.

⁶ U dociamu Suse nni, Jufinba den ku ki bolini jaba kobimuu.

^7-10 Bi den kodi Jufinba yibali Hamedata bijua Hamana bijaba, bila piiga yeni kuli. Bani bila piiga yeni yela nne: Palisandata, Dalifoni, Asipeta, Polata, Adalia, Abidata, Palimasita, Alisayi, Alidayi leni Fajesata. Ama baa den fagi bi piama.

¹¹ Laa daali bi den waani o bado ban den ku yaaba u dociamu Suse nni coali n pundi yaa bianu.

¹² O den yedi o pobado Esita: «Jufinba ku ki bolini u dociamu Suse nni jaba kobimuu, leni Hamana bijaba bonba piiga yeni kuli. Li yaa tie yeni nekanba, li baa yaa tie lede a diema yaama n sieni nni? A go mia be? N baa pa ŋa la. A go bua be? A baa baa la.»

¹³ Esita den goa ki yedi o: «Fini o bado yaa laa ke li ŋani, ŋan pa yaa Jufinba n ye ne Suse nni u sanu ban go tieni saala moko nani li ñoabonli n den bili ke bi tieni maama dinla, ki go joani Hamana bijaba bonba piiga yeni mo, ban joangi bi nibiadiba yaa daagu po.»

¹⁴ O bado den ñani li ñoabonli ke ban tieni yeni. Bi den kpaani li ñoabonli yeni Suse nni, ki joani Hamana bijaba ban den ku yaaba bonba piiga yeni.

¹⁵ Yaa Jufinba n den ye Suse nni go den faa ki taani Adadi piiga n danaali daali ki ku Suse nni jaba kobitaa. Ama baa den fagi bi piama.

¹⁶ Yaa Jufinba n den sieni ki yeye mi diema nni den taani ban ye yaa dogi nni kuli ki moandi ki ga bi yula. Bi den ku yaaba n den nani ba siiga niba tudapiilele n tudamuu (75 000), ki ga bi yula bi yibalinba kani, ki faabi leni ba. Ama baa den fagi bi piama.

Pulimi jaanma

¹⁷ Laa bonla kuli den tieni yaa ŋmaalo n yi Adadi yaa piiga n dataali daali. Jufinba den fuodi li piiga n danaali daali, ki tieni mi jaanjiema ki dini ki mangi bi pala.

¹⁸ Yaa Jufinba n den ye Suse nni den taani li piiga n dataali daali leni li piiga n danaali daali ki tu bi yibalinba li panli, ki fuodi li piiga n damuuli daali, ki tieni mi jaanjiema ki dini ki mangi bi pala.

¹⁹ Li tie lani yaa po ke yaa Jufinba n ye i tinkundogi nni, teni ke yaa ŋmaalo n yi Adadi yaa piiga n danaali daali tie bipo *jaanma daali. Bi yen tieni mi jaanjiema ki je ki mangi bi pala ki go soani bi lieba po.

²⁰ Malidoke den diani li bontienkaala yeni kuli togida, ki go soani a tila yaa Jufinba n ye o bado Asuelusi diema nni kuli po, yaaba n ye koanma nni leni yaaba n ye foagima kuli.

²¹ O den bili ke binli kuli ban yen gagidi yaa ŋmaalo n yi Adadi piiga n danaali leni o piiga n damuuli ki tieni mi jaanma,

²² kelima laa dana den tie ban den ga bi yula bi yibalinba kani ki faabi leni ba yaa dana. Laa ŋmaalo den tie bi pabiidili n den lebidi ki tua pamanli yaa ŋmaalo, bi paboanli daali den lebidi ki tua jaanma daali. Binli kuli bi den baa tieni mi jaanjiema ki je ki mangi bi pala laa dana, ki soani bi lieba po mi jiema, ki go pa a luoda bu paabu.

²³ Jufinba den niani u ñoanianu ke bi baa tuo Malidoke n diani yaala kuli, ki yaa tiendi mi jaanma binli kuli.

²⁴ Kelima Agagi buolu yua Hamedata bijua Hamana, Jufinba yibali, den jagi ke o baa kpa ba. O den luni ban yi yaala Pulimi, lani n tie tiatia, ki bua ki bandi wan baa kpa ki bolini ba yaa daali.

²⁵ Ama Esita den kua ki laa o bado ke o ñani o ñoabonli ki diani ke Hamana n den jagi yaa yanjagibiadili ki bua ki bolini Jufinba yeni n goa ki baa o yuli po, ke ban joani o, wani leni o bijaba kuli ku daagu po ki soadi ba.

²⁶ Li tie lani yaa po ke bi yini laa dana Pulimi. Pulimi yeni ñani Pudi kani ki bua ki yedi tiatia. Kelima Malidoke n den diani yaa tili yaa po, leni bani Jufinba n den laa yaala leni yaala n den tieni ba kuli yaa po,

²⁷ bi den jagi ki bili bani biba po leni bi yaabila leni yaaba n baa lebidi ki tua Jufinba kuli yaa po ke binli kuli bi baa yaa tiendi mi jaanma a dalieda yeni. Bi baa yaa ŋua Malidoke n diani yaala ki yaa tiendi mi jaanma yeni lan bili ban yaa tiendi yaa yogunu.

²⁸ Bi baa yaa tiadi laa dana po ki tiendi mi jaanma nifiima n tu nifiima. Dogu kuli nni leni diebiga kuli nni, diegu kuli baa yaa jaani laa jaanma. Jufinba siiga Pulimi dana kan bodi hali abada, bi puoliŋuani mo kan sundi lipo.

²⁹ O pobado Esita Abisayili bisalo, leni Malidoke yua n den tie Jufi go den diani a tila ki maadi ki pugini ban den kpa diani ki yedi yaala Pulimi jaanma po yeni u fidu.

³⁰ Bi den soani a tila yeni yaa Jufinba n ye o bado Asuelusi diema nni, i kobiga n piiliedi n diebileleeda nni. A tila yeni den pia mi mamanma yaama n duandi bi niba yama.

³¹ A tila yeni den tundi Jufinba ke ban yaa jaani Pulimi jaanma yeni lan bili ban yaa jaani ma yaa dana, nani o pobado Esita leni Malidoke yua n den tie Jufi n den waani ba maama, leni bani biba mo n den bili bi yula po leni bi puoliŋuani po maama. Ban tieni nani ban den jagi maama bi ñoalolima leni bi bubula po yeni.

³² Lanwani Esita ñoabonli yeni den saa moamoani ban den bili yaala Pulimi jaanma po yeni ke li diani ki bili.