Esiteri 8 - Gourmanchéma Bible

¹ Laa daali liga, o bado Asuelusi den puni o pobado Esita Jufinba yibali Hamana diegu. Esita den waani o bado wani leni Malidoke n kpi maama. Lanwani o bado den teni ke bi yini Malidoke ke o cua o kani.

² O bado den piti o ñoagima, wan den goa ki ga yaama Hamana kani, ki teni Malidoke. Esita mo den teni ke Malidoke diedi Hamana diegu.

³ Esita go den gedi o bado kani ki maadi leni o. O den gbaani o bado taana kani ki buudi, ki mia ke wan da tuo ke Agagi buolu yua Hamana n den jagi yaa biadima ki bili ke o baa bolini Jufinba yeni n tieni.

⁴ O bado den tandi o badigbiamu yu n tie wula Esita po, ke o fii ki sedi o nintuali,

⁵ ki yedi: «Fini o bado yaa laa ke li ŋani, ki dagidi, a yaa baa tuo npo, a pali yaa mani npo, ŋan ñani a ñoabonli ban diani li tili ki yie Hamana n den jagi ki diani yaa tila yaa po. Wani Hamana, Agagi buolu yua Hamedata bijua, den jagi ki diani a tila ke ban bolini yaa Jufinba n ye a diema nni kuli. Ŋan diani ki bolini laa tila yaa maama.

⁶ Kelima n baa ga lede ki yaa nua yaa janda n baa cua n niba po, n baa ga lede ki yaa nua ban baa bolini n buolu maama?»

⁷ O bado Asuelusi den yedi o pobado Esita leni Malidoke yua tie Jufi: «Diidi ki le, n puni Esita Hamana diegu, min den teni ke bi joani yua ku daagu po ki soadi o kelima o den tandi o nuu ki bua ki bolini Jufinba.

⁸ Moala yin diani yin sua maama, yaala n baa todi Jufinba, lan yaa tie nani mini o bado n diani yeni, ki poabinipoabini, ki taa n ñoagima ki pua ki tieni mi maalima, kelima ban diani yaa tili nani li tie mini o bado n diani yeni kuli, ki taa n ñoagima ki pua ki tabini, li kan lebidi.»

⁹ Laa yogunu, yaa ŋmaalo n yi Sifana ki tie citaa piilie n dataali daali bi den yini o bado tidianla ke bi diani Malidoke n yedi ba yaala kuli. Bi den diani ki soani Jufinba po, leni bi yudancianba, leni a koanbala leni a baditiebila yaaba n die mi diema kobiga n piilie n diebileleeda, ki cili puoli po Inde diema ki yaa caa hali Etiopi diema nintuali po. Bi den diani ki soani diebiga kuli po nani ban dangi laa diebiga nni maama, leni yaa nibuolu n ye ki niinni n maadi maama.

¹⁰ Bi den diani ke li tie nani o bado Asuelusi wan oba n diani yeni, ki poabinpoabini ki taa o bado ñoagima ki pua ki tieni mi maalima. Bi den soani laa tila leni yaa tonda n jagi i taami leni yaaba n jagi i *buomi.

¹¹ A tila yeni niinni, o bado den puni Jufinba u sanu, ban ye yaa dogu nni kuli, ban taani leni biyaba ki moandi ki ga bi yula, ki kpa, ki bolini yaaba n baa taa ti toatiadi ki bua ki kpa ba kuli. Ban tie yaa nibuolu leni ban ñani yaa diebiga kuli, ban bolini bani leni bi bila leni bi puoba kuli, ki go fagi bi piama.

¹² Li go den diani ke likuli n tieni dayenli Asuelusi diema kuli nni, lani n tie piiga n cilie, yua yi Adadi, yaa piiga n dataali daali.

¹³ A tila den pia o bado ñoabonli ban baa kpaani yaali diebiga kuli nni ki waani i nibuoli kuli ke Jufinba baa bogini laa daali ki tu bi yibalinba bi panli.

¹⁴ Lanyogunu a tonda den jagini i taami leni i buomi ki fii ki gedi tontoni nani o bado n den bili maama. Bi den kpaani li ñoabonli yeni u dociamu Suse nni moko.

¹⁵ Malidoke den ñani o bado kani ki laa yaa badiliadili n ŋmadi li bonpienla leni mi waanuama, ki ciibi yaa fogilicianga n tie wula, ki goli yaa kpalibu n luni leni *len gaali, ki moani. U dociamu Suse yaaba den kpaani ki mangidi bi pala.

¹⁶ Laa daali Jufinba den pia yemanma ki ye leni li pamancianli leni ti kpiagidi.

¹⁷ O bado bali maama leni o ñoabonli yeni n den pundi yaa diebiga leni yaa dociamu kuli nni Jufinba den ye leni li pamancianli ki tieni mi jaanma leni mi jaanjiema. Yaa nibuoli n den ye mi diema nni kuli siiga, bi niba boncianla den lebidi ki tua Jufinba kelima bi den jie Jufinba boncianla.