Esiteri 7 - Gourmanchéma Bible

¹ O bado leni Hamana go den yegi ki gedi o pobado Esita n go den ŋanbi yaa jaanjiema po.

² Bi gediliema daali yeni, ban den ñu duven yaa yogunu, o bado go den yedi Esita: «Esita, a miabu tie be? Li yaa tie baa n diema boagidima, a baa baa.»

³ O pobado Esita den goa ki yedi o: «Fini o bado pali yaa mani leni nni, li yaa mani apo, ŋan ga n miali ki teni nni, lani n tie n miabu. Ŋan go faabi n nibuolu, lani n tie min bua yaala.

⁴ Kelima bi kuadi ti, mini leni n nibuolu yeni, ki baa kodi ti ki bolini ti cain. Li yaa bi tie ke bi kuadi ti tin tua yonbi, n bi baa yaa ŋmini, ama lan tie maama yeni, ti yibali kan fidi ki ŋanbi wan baa biidi fini o bado po yaala.»

⁵ O bado Asuelusi den yedi o pobado Esita: «Yua n jagi ke o baa tieni laa bonla tie ŋme? O ye le?»

⁶ Esita den goa ki yedi o: «Ti yibali, yua n wangi ti fala, tie Hamana, yaa nibiado n tie na.» Ti jawaanciandi den cuo Hamana o bado leni o pobado nintuali.

⁷ O bado pali den beni boncianla ke o den fii ki ñani mi jaanjiema kani ki gedi o diegu sadinga nni, ama Hamana den ledi ki kaa ki bua ki mia o pobado Esita wan ciadi o kelima o den laa ke o bado jagi ke o baa kpa o.

⁸ O bado n den ñani o diegu sadinga nni ki guani mi jaanjiema kani o den laa Hamana ke o nagini ki baa Esita n ye yaa duanu po, ke o yedi: «Naani o ja ne go bua ki bibi o pobado n diegu nni, n nintuali mo?» O bado n den maadi yeni, bi den pini Hamana nunga.

⁹ Yaa moagilimu n den ye leni o bado siiga nni yendo, ban yi yua Halibona, den yedi o bado: «Diidi ki le, Hamana den bogini ku daagu Malidoke po, wani yua yaa maama n den faabi o bado miali. Ku daagu yeni caa Hamana diegu nni ke ku foagimu pundi nukpanduna piimuu.» O bado den yedi: «Ban ban joani Hamana kupo ki soadi o.»

¹⁰ Lane bi den joani Hamana wan den bogini yaa daagu Malidoke po yeni, ki soadi o. Li yaa puoli o bado pali den kuugi.