Esiteri 6 - Gourmanchéma Bible

¹ Laa ñiagu o bado ki den fidi ki guani. O den teni ke bi cuani o kani bi badiba jama tila ban diani yaa yaa niinni mi diema togida, ki teni ke bi cogi opo.

² Bi den cogi Bigitani leni Telesi, yaaba n den tie o bado moagilimu ki guu bu buliñoajabu, n den jagi ke bi baa kpa wani o bado Asuelusi maama ke Malidoke doagidi ki waani bi janbi.

³ Lane wani o bado den yedi: «Malidoke den baa be yaa gagidima leni be yaa kpiagidi lipo?» O bado naacenba den goa ki yedi o: «Waa baa pu kuli.»

⁴ Lanwani o bado den yedi: «Ŋme n ye u luolu nni?» Li den sua lanyogunu liga ke Hamana pundi u luolu nni ki bua ki mia o bado wan teni ban joani Malidoke wan den caani opo yaa daagu yeni po ki soadi o.

⁵ Lanwani o bado naacenba den goa ki yedi o ke Hamana n ye u luolu nni. O den yedi ke wan kua.

⁶ Hamana den kua ke o bado yedi o: «Mini o bado yaa bua ki kpiagi o nilo, n baa tieni o lede?» Hamana den kpaagi line: «O bado baa yaa bua ki kpiagi ŋme li yaa tie mini yaaka?»

⁷ Lane o den goa ki yedi o bado: «Fini o bado yaa bua ki kpiagi o nilo,

⁸ ban taa ŋan laa yaa baditiadi leni ŋan jagi yaa taamo ke o yili li bali tannunga yeni,

⁹ ki teni a paatieba yudanba siiga nni yendo ti tiadi leni o taamo yeni wan bobini ŋan bua ki kpiagi yaa nilo, ki jagini o a taamo ki yaa dia ki goadi u dogu fanfangu nni, ki yaa kpaani o liiga, ki tua mine: ‹Line n tie ban baa yaa tiendi maama o bado n bua ki kpiagi yua.› »

¹⁰ O bado den yedi Hamana: «Jaligi ki taa ti tiadi leni o taamo nani ŋan yedi maama yeni ki tieni Malidoke po yeni, yua n tie Jufi ki tuuni n diegu buliñoabu kani. Ŋan tieni likuli ki da poadi liba.»

¹¹ Hamana den taa ti tiadi ki bobini Malidoke ki teni ke o jagini o taamo ke o dia o ki goadi u dogu fanfangu nni ki kpaani o liiga ki tua mine: «Line n tie ban baa tieni o bado n bua ki kpiagi yua maama.»

¹² Lani yaa puoli Malidoke den goa ki cua o bado diegu buliñoabu kani ke Hamana mo jaligi ki kuni o denpo, ki liibi o yuli bu kpalibu kelima o paboanli po.

¹³ O den togidi o pua Selesi leni o danlinba kuli yaala n den tieni o kuli. O tundikaaba leni o pua Selesi den yedi o: «Ŋan cili ki wadi Malidoke yua yaa nintuali yeni, o yaa tie Jufi buolu, a kan fidi ki tieni o pu, a baa suagi liiga ki yaa wadi ki yaa wadi, hali ki ban tua fanma.»

¹⁴ Ban da den maadi leni o yaa yogunu, o bado moagilimu den cua ki gedini o tontoni Esita n go den ŋanbi yaa jaanjiema po.