Esiteri 5 - Gourmanchéma Bible

¹ Li dataali daali Esita den bobi o pobaditiadi ki kua o bado luolu nni ki gedi wani o bado dieli nintuali. O bado den kaa o badidieli nni o bali kalikaanu po, ke o nunga tiegi bu buliñoabu.

² Wan den laa o pobado Esita ke o se u luolu nni yaa yogunu, o pali den mangi boncianla ke o tandi opo wan muubi yaa badigbiamu. Esita den nagini o kani ki sii u badigbiamu yeni joma.

³ O bado den yedi o: «Esita, be yia ŋa? A bua be? Baa a yaa mia n diema boagidima, n baa pa ŋa.»

⁴ Esita den goa ki yedi o: «Li yaa tie ke fini o bado laa ke li ŋani, ŋan cua dinla, fini leni Hamana kuli min ŋanbi apo yaa jaanjiema po.»

⁵ O bado den tuo Esita miabu ki soani tontoni ke bi ban yini Hamana. O bado leni Hamana den gedi ki baan je Esita n den ŋanbi yaa jaanjiema.

⁶ Ban den ñu duven, o bado den yedi Esita: «A miabu tie be? N baa pa ŋa la. A bua be? Baa li yaa tie hali n diema boagidima, a baa baa.»

⁷ Esita den goa ki yedi o: «Min bua yaala leni min mia yaala tie line:

⁸ Fini o bado pali yaa mani leni nni ke a baa guani npo n miabu leni min bua yaala, fini leni Hamana n go cua min baa ŋanbi yipo yaa jaanjiema saala po. Lanwani saala n baa guani a mi maguankaama nani ŋan yedi maama.»

Hamana bogini ki baa kpa Malidoke

⁹ Landaali Hamana den ñani o pobado kani ke o pali mani boncianla. Ama wan den laa Malidoke o bado diegu buliñoabu kani ke waa fii ki sedi ki digibi o nintuali leni i jeje, o pali den beni boncianla Malidoke po.

¹⁰ Ama baa yeni o den fidi ki ñii o pali ki ban kuni. Lanwani o den soani ke bi yini o danlinba leni o pua, yua n yi Selesi.

¹¹ Hamana den waani ba o piama n yaba maama, leni o bijaba n pundi maama, leni o bado n den puni o yaa kpiagiciandi ki teni ke o cie o bado koanbala leni o cancantieba kuli.

¹² O go den yedi: «Yaala n cie lani kuli tie ke o pobado Esita den yini mini bebe leni o bado ke ti bi gedi ki ban dini wan den ŋanbi yaa jaanjiema. O go yini nni saala ke mini leni o bado n go cua o kani.

¹³ Ama lani kuli naa tie npo pu, n yaa nua Malidoke Jufi yeni, ke o baa tuuni o bado diegu buliñoabu kani.»

¹⁴ O pua Selesi leni o danlinba kuli den yedi o yaa maama n tie na: «Ŋan teni ban caani yaa dafoagidigu n pundi nukpanduna piimuu ke saala ku tiŋaagu ŋan mia o bado wan teni ban joani Malidoke ki soadi o ku daagu yeni po, lani yaa pendi ŋan yegi leni o bado ki gedi mi jaanjiema po ke a pali mani.» Laa maama den mangi Hamana ke o den teni ke bi caani ku daagu.