Esiteri 4 - Gourmanchéma Bible

¹ Malidoke n den gbadi yaala n tieni kuli, o den padi o tiadi ki lani li paboanli tiadi ki wuli oba po mi fantanpienma ki doagidi o paboanli, ki kua u dogu siiga ki buudi ki kpaani,

² ki sedi o bado diegu buliñoabu kani, kelima li den kua ke yua n yie li paboanli tiadi n kua o bado diegu nni.

³ O bado ñoabonli leni o bali maama n den pundi mi diema nni naankani kuli li paboancianli den cuo Jufinba kuli. Bi den luo bu ñoabu ki buudi ki kpaani ke bi siiga boncianla den yie li paboanli tiadi, ki dua mi fantanpienma nni.

⁴ O pobado Esita yuali leni o *moagilimu den cua ki waani o lankuli, ke i jeje cuo o boncianla. O den soani ti tiayiekaadi Malidoke po ke wan lebidi li paboanli tiadi yeni, ama waa den ga ti.

⁵ Lani yaa po Esita den yini Hataki o bado n den puogi yaa moagilimu ban yaa tuuni wani Esita po, siiga nni yendo, ki soani o wan ban buali Malidoke lan tie yaala leni yaala yaa po ke o tiendi yeni.

⁶ Hataki den gedi Malidoke po, u dogu fancianma nni, o bado diegu cancanli po.

⁷ Malidoke den togidi o yaala n tieni kuli, ki waani o Hamana n yedi ke o baa tieni o bado ŋalimano nni yaa ligi banlu, o yaa bolini Jufinba kuli.

⁸ O go den teni o ban den kpaani o bado ñoabonli yaali Suse nni ke ban bolini Jufinba yeni tila siiga tiyenli. O den teni o li ke wan ban waani Esita ki togidi o mi maama fuuli kuli. O go den yedi Hataki ke wan ban waani Esita wan mia o bado wan gbadi wani Esita buolu yaaba po mi niñima.

⁹ Hataki den goa ki cua ki togidi Esita Malidoke n yedi yaala.

¹⁰ Esita go den soani Hataki wan ban yedi Malidoke yaa maama n tie na:

¹¹ «O bado naacenba kuli leni o diema yaaba kuli bani ke li bali maama bili ke lan tie yua kuli, li yaa tie ja bi pua, o yaa kua o bado luolu nni ke waa yini o, o baa kpe, se bonyenla bebe, yua kua ke o bado tandi opo o badigbiamu yu n tie wula, wani n baa faabi. Ama mini mo, li pundi dana piitaa ke o bado ki yini nni.»

¹² Ban den goa ki togidi Malidoke Esita n yedi yaala,

¹³ o den soani ban ban yedi Esita: «Da tama ke Jufinba kuli siiga fini bebe n baa faabi kelima a ye o bado diegu nni yaa po.

¹⁴ Kelima a yaa ŋmini yaa yogunu n tie na, mi todima baa ña Jufinba po potogu, ban faabi. Ama fini, a baa kpe, a baadiegu mo n bodi. Ŋme bani li yaa tie yaa yogunu buolu n tie na yaa po yaaka ke a baa ki tua pobado?»

¹⁵ Esita go den soani ban ban yedi Malidoke:

¹⁶ «Gedi ki ban taani yaa Jufinba n ye Suse nni kuli yin loli bu ñoabu. Yensiini taa leni ñadi taa yin da je, yin da ño, ki yaa miadi npo. N moko baa tieni yeni mini leni n yuali. Ti baa loli bu ñoabu. Lani yaa pendi n baa kua o bado kani baa ke li kua. N yaa baa bodi, min bodi.»

¹⁷ Malidoke den gedi ki ban tieni nani Esita n yedi maama.