Esiteri 2 - Gourmanchéma Bible

¹ Lan den waagi waamu, ke o bado Asuelusi pali jiidi, o den tiadi Fasiti po leni wan den tieni yaala, leni ban den jagi ke bi baa tieni o yaala kuli.

² Lanwani o bado naacenba den yedi o: «Ban lingi fini o bado po yaa jafanba n daa bani jaba ki go pia ti jafandi.

³ Ŋan gandi a diema nni kuli bi niba ki dini ba li bali ban lingi yaa jafanba n pia ti jafandi, ki soani ba a dociamu Suse nni, ki kuani ba a puoba diegu nni. A *moagiliga Ege, yua guu bi puoba, baa yaa kubi ba likani ki yaa tendi ba yaala n baa pugini ba ti jafandi.

⁴ Lanwani yaa jafaano n dagidi apo n ga Fasiti kaanu ki tua o pobado.» Laa tundi den mangi o bado ke o tieni yeni.

⁵ Li den pia u dociamu Suse nni jayendo ke o tie Jufi buolu yua ki yi Malidoke. O den tie Jayili bijua, Jayili mo den tie Simeyi bijua, Simeyi mo Kisi yaa bijua, Benjamina buolu yua.

⁶ Babilona bado Nebukanesa n den ñani Juda bado Jekonia leni o diema yaaba Jelusalema nni ki gedini ba ti yonbidi, Malidoke yeni den tie bi siiga yendo.

⁷ O den wubi o baa naataanjaga bisalo Adasa, ban go yi yua Esita kelima o baa leni o naa kuli den kpe. O jafaano yeni bugima leni o nunga kuli den ŋani. O baa leni o naa n den kpe, Malidoke den taa o ki wubi o.

⁸ Ban den kpaani o bado ñoabonli, bi den taani bi jafanba boncianla ki gedini ba u dociamu Suse ki teni ba bi puoba guudo Ege. Bi den taa Esita moko ki taani ki gedini o leni o jafanlieba, o bado diegu nni.

⁹ Esita den dagidi Ege po ki baa o kani ki nunmanga. O den jaligi ki teni o yaala n tie tiladi ki baa pugini o ti jafandi kuli leni yaala n tie tiladi o miali yema po kuli. O go den gandi o bado diegu nni jafanba lele ki teni o ban yaa tuuni opo, ki kuani o wani leni o jafanleleediba bi puoba diegu nni yaa dieli n ŋani ki cie yaa niinni.

¹⁰ Esita ki den doagidi ki waani ke o tie Jufi buolu yua, kelima Malidoke den tuodi ki waani o wan da waani.

¹¹ Daali kuli Malidoke den lindi ki poandi bi puoba diegu cancanli nni ki baa le Esita n ye leni maama leni ban tiendi o yaala.

¹² Li den bili ke bi jafanba yeni kuli baa yaa ŋanbidi biba hali piiga n ŋmaali lie. Bi baa yaa sogini yaa kpama n yi *mili ŋmaali luoba, yaa ŋmaluobidi n sieni mo ban yaa sogini bi puoba n maani ki sogini yaa tulale. Lanwani yua yaa yogunu n pundi bi baa gedini o o bado kani.

¹³ Lani n tie jafaano kuli n yen tieni maama ki nan gedi o bado kani. Jafaano yaa baa ña bi puoba diegu nni ki kua o bado yaa diegu nni, bi den yen cedi wan taa wan bua yaala kuli.

¹⁴ O yen gedi ku ñiagu, li yaa fii ki faa wan kua bi puoba dieliegu nni, o bado moagiliga Sagasi yua guu ti ponanbandi n yaa kubi o. O kan go guani o bado po, wani o bado yaaka bua ki taa o yeli ki yini o.

¹⁵ Malidoke baa naataanjaga Abisayili bisalo Esita, Malidoke n den wubi yua, yaa gediyogunu o bado po den pundi. Waa den mia liba se o bado moagiliga Ege yua den guu bi puoba n den yedi wan taa yaala. Esita den baadi ki nunmanga yaaba n laadi o kuli kani.

¹⁶ Bi den kuani o o bado diegu nni, Asuelusi kani, o bali binleleeli. Li den tie cipiiga yaa ŋmaalo ban yi yua Tebeti.

¹⁷ O bado den bua Esita ki cie bi puoba kuli. Wani Esita den baa o kani ki nunmanga boncianla ki cie yaa jafanba n sieni. O den cibini o ki pobadifogiliga, ki dini o li bali ke o ga Fasiti kaanu.

¹⁸ O den tieni mi jaanjiema o diema yudanba leni o naacenba kuli po. O den tieni yeni ki kpiagi Esita. O den puni o diema niba kuli mi fuodima, ki go puni bu paabu leni ti bulicindi.

Malidoke waani ke moagilimu lie bua ki kpa o bado

¹⁹ Bi go den taani bi jafanba mi liema. Laa yogunu Malidoke den tie o bado *cancannikpeliba siiga nni yendo ki kaa o bado diegu buliñoabu kani.

²⁰ Esita ki den doagidi ki waani ke o tie Jufi buolu yua, kelima Malidoke den tuodi ki waani o wan da waani. O den suagi liiga ki kubi Malidoke ñoabona nani wan da den ye o kani ki kubi maama.

²¹ Dayenli Malidoke n den kubi o tuonli o bado diegu nni, o bado moagilimu bonba lie, Bigitani leni Telesi, yaaba n den guu o bado diegu buliñoabu, pala den beni o bado po. Bi den jagi ke bi baa kpa o.

²² Malidoke den bandi, ki waani o pobado Esita, ke omo waani o bado ki doagidi opo ke Malidoke n waani o.

²³ Ban den diidi ki sua ke li tie moamoani, bi den cuo mu moagililiedimu yeni ki joani ba ti daadi po ke bi kpe. O bado wani oba den teni ke bi diani laa bonla kuli bi badiba jama tili nni.