Esidirasi 9 - Gourmanchéma Bible

¹ Lankuli n den tieni ki gbeni, Isalele yaaba yudanba bi tianba den cua n kani ki yedi nni: «Isalele yaaba kopadicianba leni Lefi buolu yaaba leni bi nifanba naa gagidi bi yula ki paadi leni yaa nilanbuoli n ye yaa diema n tie ne niinni. Bi tuuni a cancagintuona ki togidi Kanana yaaba, Heta yaaba, Felesa yaaba, Jebusa yaaba, Amoni yaaba, Moabi yaaba, Ejipiti yaaba leni Amola yaaba tuona.

² Bi taa bi nilanba yeni bisiaba bani leni bi bijaba po ki tieni bi puoba. Li teni ke ti nibuolu yu n gagidi U Tienu po kali kali leni yaa nilanbuoli n ye mi diema ne niinni. Bi yudanba leni bi bujiaba n cili laa *tuonbiadi.»

³ Min den gbadi lani, n pali den boandi ke n padi n tiayiekaadi leni n kpaligolikaabu kuli, ki ŋabi n yudi leni n langbiadi, ke n gbanu wudi ke n kali.

⁴ Isalele yaaba Tienu maama n den jieni yaaba kuli kelima yaaba n den ñani ti yonbidi yeni n den tieni yaa tuonbiadi po, den taani n kani. Nmo, n gbanu den wudi ke n kaa hali ki pundi ku yenjuogu padili yogunu.

Esidilasi jaandi ki mia sugili ti tuonbiadi danba po

⁵ Ku yenjuogu padili yogunu n den pundi, n den fii min den boandi n pali ki jiini n yuli ki kaa naankani yeni ki laa n tiapadindi yeni. N den gbaani ki yugidi n nii ki tandi ki tegini Li Miali Diedo n Tienu

⁶ ki yedi o: «N Tienu, i fe pia nni ke n yuli tiibi. N Tienu, n kan fidi ki yaadi n yuli ki diidi a. Kelima ti tagili yabidi hali ki milini ti, ti tuonbiadi dogini ki pundi tanpoli.

⁷ Hali ti yaajanba yogunu ki taa ki pundi hali moala, ti tieni ti tuonbiadi boncianla. Li tie ti tuonbiadi po ke a den taa ti, tinba leni ti badiba leni ti kopadicianba ki teni i nilanbuoli badiba nuu nni ke bi den tuogi leni ti bu toabu ki paadi ti, ki fagi ti ki gedini ti ti yonbidi ke dinla i fe kubi ti.

⁸ Ama baa yeni a gbadi tipo mi niñima yaa yoginjenga n tie na po ki teni ke ki nitianga faabi, ki go puni ti u kuakaanu a *kaangagidiŋamu nni. Yeni, a yendi ti nunmu ki faabi ti ti yonbidi siiga.

⁹ Ti den ye ti yonbidi nni ama ŋaa ŋa ti lienni ti bebe. A teni ke Pelisa diema badiba gbadi tipo mi niñima ki cedi ke ti ye ki fo ki goa ki maa fini ti Tienu diegu yaagu n den mudi, ki teni ke ti baa kuakaanmoanu Juda diema nni leni Jelusalema nni.

¹⁰ Moala, ti Tienu, ti baa yedi be, lani kuli yaa puoli? Kelima ti yie ki ŋa a *balimaama,

¹¹ ŋan den bili tipo yaama ki teni ke a sawalipuaba pua sawali ki tua: ‹Yin caa yaa diema nni ki baa n diedi ma yeni tie yaa diema n *joagini kelima yaa nibuolu n ye mi diema yeni niinni joagindi po. Bi gbieni ma bi cancagintuona ki cili nepo yaa kunu ki gedi hali nepo yaa kunu.

¹² Lani yaa po yin da pa yi bisiaba bi bijaba, yin da taa bi bisiaba mo yi bijaba po. Yin da todi ba bi yema n mangi ban baa mi yanduanma. Lani yi baa baa u fidu, yi baa je mi diema n pia yaa bonŋanla ki ŋa man tua faali yi bila po hali yaa yogunu kuli.›

¹³ Fala cuo ti kelima tin den tieni yaa tuonbiadi leni yaa tagiliciami po. Ama baa yeni, ti Tienu ŋaa waani ti fala nani ti tuonbiadi n den pundi maama. A go kubi tinba yaa niba n sieni ti yonbidi nni ke ti ye.

¹⁴ Naani lani kuli yaa puoli ti go baa miidi a kuali ki taa yaa nibuolu n tuuni li cancagintuonli ne bisiaba ki go teni ba ti yaa bisiaba bi? Naani a pali kan fii ki pebidi hali ki bolini ti cain ki kan ŋa liba?

¹⁵ Li Miali Diedo, tinba Isalele yaaba Tienu, a tiegi. Ama a teni ke nitianga faabi. Diidi, ti ye a nintuali leni ti tuonbiadi, ama ti kan bi baa ki yaa ye a nintuali leni ti tuonbiadi.»