Esidirasi 8 - Gourmanchéma Bible

¹ Yaa diedanba n den yegi leni nni ki ñani Babilona Alitakiselisesi bali yogunu yela leni bi coali n tie ne:

² Finea buolu nni Gelisoma. Itamali buolu nni Danieli, Dafidi buolu nni Hatusi, Sekania bijua.

³ Paleyosi buolu nni Sakali leni o diegu yaaba kobiga n jaba piimuu.

⁴ Pasati-Moabi buolu nni Selaya bijua Eliyonayi. O den yegi leni jaba kobilie.

⁵ Sekania buolu nni Jakasieli bijua leni jaba kobitaa.

⁶ Adini buolu nni Jonatan bijua Ebedi leni jaba piimuu.

⁷ Elami buolu nni Atalia bijua Esayi leni jaba piilele.

⁸ Sefatia buolu nni Mikayeli bijua Sebadia leni jaba piinii.

⁹ Joabi buolu nni Jehieli bijua Abidiasi leni kobilie n piiga n jaba nii.

¹⁰ Selomiti buolu nni Josifia bijua leni kobiga n jaba piiluoba.

¹¹ Bebayi buolu nni Bebayi bijua Sakali leni piilie n jaba nii.

¹² Asigadi buolu nni Hakatani bijua Yohanana leni kobiga n jaba piiga.

¹³ Adonikami buolu nni Elifeleti, Jeyeli, Semayeja, bani yaaba n den juodi. Bi den yegi leni jaba piiluoba.

¹⁴ Bigifayi buolu nni Utayi, Sabudi leni jaba piilele.

Bi bogini Jelusalema gedima po

¹⁵ N den taani laa niba kuli yaa kpenu n puubi ki cuubi Ahafa po kani. Ti den kali likani dana taa. N den faami ki laa bi kopadicianba leni yaaba n sieni, ama mii den laa Lefi buolu yua oba kuli bi siiga.

¹⁶ Lani n den yini bi yudanba Elieseli, Alieli, Semayeja, Elinatani, Jalibi, Elinatani, Natan, Sakali leni Mesulami leni li *bali maama bangikaaba Jojalibi leni Elinatani.

¹⁷ N den soani ba Kasifia bado Ido kani. N den waani ba ban baa n yedi Ido leni o lieba U Tienu naacenba yaala. N den waani ba ban baa yedi bani yaaba n ye Kasifia yaala ki cuani tipo bi tuonsoanba ti Tienu diegu po.

¹⁸ Nani U Tienu n den ye leni ti ki kubi ti yeni, bi den cuani tipo Selebia, yua n den tie yanfodaano ki tie Makili buolu yua, Jakobo bijua Lefi yaabili. Bi den cuani wani leni o bijaba leni o waamu ke bikuli tie piiga n niba nii.

¹⁹ Bi go den cuani Melali buolu nni Hasabia leni Esayi, bani leni bi waamu leni bi bijaba ke bi tie niba piilie.

²⁰ Dafidi leni bi yudanba n den puogi yaaba U Tienu diegu naacenba siiga yaaba, ke ban yaa tuuni Lefi buolu yaaba po moko yaa siiga bi den cuani niba kobilie n piilie ban gandi yaaba.

²¹ Ahafa kpenu yeni kani, n den bili ke tin loli bu ñoabu ki waani ke ti miini ti yula ti Tienu nintuali ke wan pa tinba leni ti bila leni ti bonpiakaala li sancenŋanli.

²² I fe den baa cuo nni n yaa den mia o bado yaa minteela leni yaa tanjagiba n baa ciani ti ki guudi ti ke yibalinba n da jia ti u sanu po. I fe den baa cuo nni kelima ti den yedi o ke U Tienu tandi o nuu ki kubi yaaba n dugi opo ama ke o pabiencianli ye yaaba n yie opo.

²³ Lani yaa po yo ke ti den loli bu ñoabu ki jaandi ki miadi ti Tienu, ke omo guani ti po ti miabu.

²⁴ N den gandi piiga n kopadicianba lie Selebia, Hasabia leni bi naataani siiga niba piiga.

²⁵ N den biigi bi nintuali o bado leni o cancantieba leni o koanbala leni Isalele yaaba, yaaba n den ye mi diema nni n den puni yaa ŋanjilifa leni yaa wula leni yaa tiadi ti Tienu diegu po.

²⁶ N den teni ba ŋanjilifa kilo tudapiilie (20 000), yaa tiamoandi n tie ŋanjilifa kilo tudapiitaa (30 000) leni wula kilo tudapiitaa,

²⁷ Wula taditi taditi piilie ke ti dunga pundi wula kujapiena tudili, leni yaa kumoandi n ñuliti bonŋanla yaa boba boba lie. Laa bobilieda den ŋani ki pia mayuli ki pundi wula.

²⁸ Lanwani n den yedi ba: «Yaa tiadi n tie ne gagidi Li Miali Diedo po nani yinba yin gagidi opo maama yeni. Yaa ŋanjilifa leni yaa wula n tie ne tie yi yama po paaboe Li Miali Diedo yi yaajanba Tienu po.

²⁹ Yin faami laa bonla po ki kubi la bonŋanla hali yin ban pundi Jelusalema. Lankani yin biigi likuli bi kopadicianba leni Lefi buolu yaaba nintuali leni bi diedanba yaa nintuali Li Miali Diedo diegu diema nni.»

³⁰ Lanwani bi kopadicianba leni Lefi buolu yaaba den ga ban den biigi yaala kuli: ŋanjilifa, wula leni yaa tiadi n sieni ki baa gedini likuli Jelusalema ki ban kuani ti, ti Tienu diegu nni.

Li sancenli danba pundi Jelusalema

³¹ O ŋmakpialo piiga n dalieli daali ti den fii Ahafa kpenu kani ki baa gedi Jelusalema. U Tienu den kubi ti li sancenli nni kuli ki ga ti ti yibalinba nuu nni leni ban den dia ti yaa diadi kuli.

³² Tin den pundi Jelusalema ti den fuodi dana taa.

³³ Li danaali daali ti den biigi ŋanjilifa leni wula leni yaa tiadi n sieni. Ti den biigi likuli ti Tienu diegu nni ki teni Uli bijua Melemoti o kopadiciamo. O den yegi leni Finea bijua Eleyasala leni Lefi buolu yaaba Josue bijua Josabadi leni Binuyi yaa bijua Noadia.

³⁴ Tin den coadi ki biigi likuli, ti den diani likuli kpiagu n pundi maama.

³⁵ Yaaba n den ñani ti yonbidi nni ki goa ki kpeni den padi a pada Isalele yaaba Tienu po. Bi den padi Isalele yaaba kuli po piiga n naatona lie, piiyia n petona luoba, piilele n pebila lele leni piiga n ŋuabuana lie ki mia bi*tuonbiadi sugili. Likuli den tie padijuukaana Li Miali Diedo po.

³⁶ Li yaa puoli bi den caa bi yudancianba leni u kpenu nintuali gufeneelinba o bado ñoabona. Lanwani bi den todi Isalele yaaba U Tienu diegu tuonli po.