Esidirasi 7 - Gourmanchéma Bible1-5 Lan den ye ki ye ke Esidilasi den ti kpeni Jelusalema, Pelisa diema bado Alitakiselisesi bali yogunu. Esidilasi yeni den tie Selaja bijua, o kopadicianba bado Alono puoliŋuanu yua. Alono den mali Eleyasala, Eleyasala n maa Finea, Finea n maa Abisua, Abisua n maa Buki, Buki n maa Usi, Usi n maa Selaya, Selaya n maa Melajoti, Melajoti n maa Asaliya, Asaliya n maa Amalia, Amalia n maa Ahitubi, Ahitubi n maa Tisadoki, Tisadoki n maa Salumi, Salumi n maa Hilikiya, Hilikiya n maa Asaliya, Asaliya n maa Selaja, Selaja mo n maa Esidilasi. 6 Esidilasi yeni den ñani Babilona ki goa ki kpeni Jelusalema. O den tie li *balimaama bangika ki bani Li Miali Diedo Isalele yaaba Tienu n den teni Musa yaa balimaama hali bonŋanla. O bado den teni o wan mia o yaala kuli kelima Li Miali Diedo o Tienu den ye leni o ki ŋanbi opo. 7 O bado Alitakiselisesi bali binleleeli binli, Isalele yaaba siiga bi tianba leni bi kopadiciantianba leni Lefi buolu yaaba bi tianba leni bi yanyanba bi tianba leni a buliñoaguuda bi tianba leni U Tienu diegu naacenba bi tianba den yegi leni 8 Esidilasi ki kpeni Jelusalema. Esidilasi den pundi Jelusalema o bado bali binleleeli binli cimuulo. 9 O den fii Babilona o ŋmakpialo dakpiali daali ki ban pundi Jelusalema o cimuulo dakpiali daali kelima U Tienu den ye leni o ki kubi o. 10 Li den tie yeni kelima Esidilasi den kuani o yama ki bangi U Tienu bali maama ki go kubi ma ki tieni man yedi yaala, ki go bangi Isalele yaaba U Tienu bali maama yeni leni o ñoabonbilikaana kuli. O bado Alitakiselisesi n puogi Esidilasi yaa tuona 11 O bado Alitakiselisesi den diani li tili ki teni Esidilasi yua n den tie o kopadiciamo leni li bali maama bangika ki go dangi Li Miali Diedo n den bili yaa bali maama leni yaa ñoabonbilikaana Isalele yaaba po. Li tili yeni maama den tie mine: 12 «Mini Alitakiselisesi, bi badiba bado, n diani fini Esidilasi po yaa tili n tie ne, fini yua n tie o kopadiciamo leni li balimaama bangika ki bani bonŋanla U Tienu yua n die tanpoli balimaama. 13 N ñani li ñoabonli ki yedi ke Isalele yaaba leni bi kopadicianba leni Lefi buolu yaaba, yaaba n ye n diema nni kuli ki bua ki fii ki yegi leni a ki gedi Jelusalema kuli, ban cedi ban gedi. 14 Mini o bado leni n nijuoginkaleleediba soani a ŋan ban goandi Juda diema leni Jelusalema kuli, ki bandi li bonla kuli yaa cuoni ki ŋua a Tienu balimaama, yaama n ye a nuu nni yeni. 15 A yaa caa ŋan taa mini o bado leni n nijuoginkaaba yeni n puni ti yama po yaa ŋanjilifa leni yaa wula Isalele yaaba Tienu yua yaa diegu n ye Jelusalema po. 16 Ŋan go taa yaaba n ye Babilona diema nni kuli n puni yaa ŋanjilifa leni yaa wula, leni Isalele yaaba leni bi kopadicianba n puni yaa paabu bi Tienu diegu yaagu n ye Jelusalema po. 17 Ŋan kubi laa ligi bonŋanla ki ban da a naatona leni a petona leni a pebila leni yaala n baa dagidi mi pienma pada leni a ñincaba po kuli ki padi likuli a Tienu diegu yaa *padibinbinli yaali n ye Jelusalema po. 18 Fini leni a kpiiba baa juogi ki bili yin baa tieni yaala leni yaa ŋanjilifa leni yaa wula n baa sieni, ki ŋoadi yi Tienu n bua maama. 19 Tin den teni yaa tadimu a Tienu diegu tuonli po, ŋan gedini ki ban bili mu wani U Tienu diegu nni Jelusalema po. 20 Ŋan go baa bua yaa ligi a Tienu diegu po, ŋan ga yi mini o bado ŋalimanbilikaanu nni. 21 Mini o bado Alitakiselisesi n ñani li ñoabonli ke yaa ŋalimankubida n ye Yufilata nintuali yaa diema nni kuli n jaligi ki teni Esidilasi yua n tie o kopadiciamo leni U Tienu balimaama bando, ki bani tanpoli Tienu balimaama bonŋanla, wan mia ba yaala kuli. 22 Ban teni o hali ki pundi ŋanjilifa kilo tudanaa (4 000) leni mi kpama kilo tudapiitaa (30 000), leni duven litidi tudanaa leni mi kpama litidi tudanaa, leni yaa yaama n baa dagidi kuli. 23 Yin jaligi ki tieni U Tienu yua n die tanpoli n puogi yaala o diegu tuonli po kuli, ke o pali n da ti be n diema po leni n bijaba po. 24 Ti go bua ki waani yi ke yin da ga bi kopadicianba kani leni Lefi buolu yaaba leni U Tienu diegu yanyanba leni li buliñoaguuda leni li naacenba, leni yaaba n tuuni U Tienu diegu nni kuli kani bancanli bi lubili bi i sani tagima ligi. 25 Fini Esidilasi mo, ŋan dini yaaba n baa yaa ja ti buciandi leni ti buwaadi Isalele yaaba po, bani yaaba n ye Yufilata diema nintuali kuli ki bani a Tienu balimaama. Ŋan dini ba nani U Tienu yanfuoma, yaama n ye a niinni n waani a maama. Yaaba n daa bani U Tienu balimaama mo, ŋan bangi ba. 26 Yua n yie kuli kaa kubi a Tienu bali maama leni mini o bado yaa bali maama cain kuli, ban jia leni o ti buudi ki kpa o, yaaka ban ñani o o lieba siiga, yaaka ban fie o bonpiakaala, yaaka ban kuani o li kpaadidieli nni.» Esidilasi tuondi U Tienu 27 Esidilasi den jaandi ki yedi: «Ti tuondi ki kpiagidi li Miali Diedo, ti yaajanba Tienu, yua n den kuani o bado yama nni ke wan jigini Li Miali Diedo diegu yaagu n ye Jelusalema, 28 ki go teni ke n baa ki nunmanga o bado yeni leni o nijuoginkaaba leni o paatieba kuli kani. Li Miali Diedo n Tienu den paagi nni ke n taani Isalele yaaba yudancianba siiga bi tianba fii ki yegi leni nni ki kpeni.» |
Gulmancema Bible © Bible Society of Burkina Faso, 2003.
Bible Society of Burkina Faso