Esidirasi 6 - Gourmanchéma Bible

¹ O bado Daliyusa den ñani li ñoabonli ke ban lingi a tikpela n bili yaa dieli nni Babilona po.

² Bi den lingi ki laa Medi dociamu Akimeta nni li tigbabikaali ke bi diani lipo yaa maama n tie ne:

³ «O bado Silusa bali binkpiali binli o den ñani yaa ñoabonli n tie ne: Ban goa ki maa U Tienu diegu yaagu n ye Jelusalema, kun yaa tie ban baa yaa padi a pada naankani. Ban cili li tanpuuli lin yaa pa. Li kpedima baa yaa tie nukpanduna piiluoba.

⁴ Bi yaa ŋuani a tana ŋuani taa, ban ŋuani ti daadi ŋuanyendu. Bi baa ñani mini o bado ligikpaku nne i ligi ki pa laa tuonli po.

⁵ Nebukanesa n den fie yaa wula tadimu leni yaa ŋanjilifa tadimu Jelusalema U Tienu diegu nni ki gedini Babilona, ban taa mu ki guani mu ban goa ki ban bili mu Jelusalema U Tienu diegu nni, tadiga kuli ki kaanu.»

⁶ Lani yaa po Daliyusa den diani li tili ki yedi: «Fini Tatinayi yua n tie Yufilata nintuali gufeneeli, leni fini Setadi-Bosinayi leni yinba bi paatieba Afalisaki yaaba yaaba n ye Yufilata diema nintuali kuli, yi kuli n fuadi mani ki cedi ba.

⁷ Yin cedi ban yaa tuuni U Tienu tuonli, Jufinba gufeneeli leni bi yudanba n goa ki maa U Tienu diegu yeni kun den kpa ye naankani.

⁸ N bili yipo yaa ñoabonli n tie ne ki waani yi yin baa tieni yaala ki todi Jufinba yudanba yeni ban goa ki maa U Tienu diegu. Yin ñani mani Yufilata nintuali yaaba n pa yaa lubili ke li tie mini o bado ŋalimano yeni niinni, ki teni Jufinba yudanba yaa ligi n tie tiladi li tuonli yeni po kuli ke laa tuonli n da sedi baa waamu.

⁹ Yin yaa puuni yaa kopadicianba n ye Jelusalema n baa yaa miadi yi yaala daali kuli, lani n tie yaala n tie tiladi Tanpoli Tienu *padijuukaana po, a naatonbila leni a petona leni a pebila, leni *ŋalikama leni mi yaama, leni duven, leni mi kpama. Liba kuli n daa poadi.

¹⁰ Lani n tie ban yaa padi U Tienu yua n die tanpoli po yaa pada n baa yaa mani opo ki miadi o o bado leni o bijaba miana po.

¹¹ Diidi ki le min bili yaa ñoabonli yua n yie laa maama kuli po: Ban fidi o diegu ki ñani ku dafoagidigu lienni ki caani ki joani o kupo, ki mudi o diegu kun tua diegbengu.

¹² U Tienu yua n gandi Jelusalema ke lan yaa tie ban baa yaa kpiagidi o naani, n bolini yaa bado bi yaa nibuolu n baa yie n maama ki biigi ke o baa bolini U Tienu diegu yaagu n ye Jelusalema. Mini Daliyusa, n bili yaa ñoabonli n tie ne: Yin tieni capcap min yedi yaala.»

¹³ Tatinayi, yua n den tie Yufilata nintuali gufeneeli, leni Setadi-Bosinayi leni bi lieba den tieni capcap o bado Daliyusa n den ñani bipo yaa ñoabonli yeni.

¹⁴ Jufinba yudanba den suagi liiga ki maa ke U Tienu sawalipualo Aje leni Ido bijua Sakali den tundi ba ki paagidi bi pala ke li den cuoni bonŋanla. Bi den maa ki gbeni nani Isalele yaaba Tienu ñoabonli n den bili maama leni Pelisa diema badicianba Silusa leni Daliyusa leni Alitakiselisesi kuli ñoabona n den bili maama.

¹⁵ Bi den maa U Tienu diegu yeni ki gbeni Adali ŋmaalo dataali daali, o bado Daliyusa bali binluobili binli.

U Tienu diegu gagidima jaanma

¹⁶ Isalele yaaba, bi kopadicianba leni Lefi buolu yaaba leni yaaba n sieni ki ñani ti yonbidi nni ki kpeni kuli den jaani ki gagidi ki ŋanbi U Tienu diegu leni li pamanli.

¹⁷ Ku diegu yeni gagidima po, bi den padi naatona kobiga leni petona kobilie, leni pebila kobinaa, ki go padi Isalele yaaba kuli *tuonbiadi po piiga n ŋuabuana lie nani Isalele buolu coali n de maama.

¹⁸ Bi go den boagidi bi kopadicianba leni Lefi buolu yaaba moko caga caga ki ŋoadi lan den bili ke cagili kuli baa yaa tuuni yaala U Tienu tuonli nni Jelusalema po, nani lan diani Musa tili nni maama.

Jufinba jaani mi Pendima jaanma

¹⁹ Yaaba n den ñani ti yonbidi nni ki kpeni yeni den jaani mi *Pendima jaanma li binlieli o ŋmakpialo piiga n danaali daali.

²⁰ Bi kopadicianba leni Lefi buolu yaaba den taani ki ŋanbi biba ki gagidi bi yula U Tienu po. Bikuli den gagidi ki ŋani cain. Lefi buolu yaaba den kodi mi Pendima jaanma pebimu yaaba n den ñani ti yonbidi nni ki kpeni kuli po, leni bi kpiiba bi kopadicianba po leni bi yaa yula po kuli.

²¹ Isalele yaaba, yaaba n den ñani ti yonbidi nni ki kpeni den taani ki dini mi Pendima jaanma jiema leni yaaba n den paadi leni bi tuonjoagindi ki taani leni Isalele yaaba ki lingi Li Miali Diedo Isalele yaaba Tienu leni payenli.

²² Bi den jaani yaa dupen n ki pia *dabinli jaanma leni li pamanli hali dana lele. U Tienu den mangi bi pala kelima o den kuani Asili yaaba bado yama nni ke o todi ba leni wani Isalele yaaba Tienu diegu tuonli.