Esidirasi 5 - Gourmanchéma Bible

¹ Bi sawalipuaba Aje leni Sakali, Ido bijua den pua sawali Jufinba yaaba n den ye Jelusalema leni Juda dogi yi n sieni po, ki waani ba Li Miali Diedo Isalele yaaba Tienu n yedi ba yaala.

² Lanwani Seyalitieli bijua Solobabeli leni Jotisadaki yaa bijua Josue den fii ki cili ki maa U Tienu diegu Jelusalema, ke U Tienu sawalipuaba ye leni ba ki todi ba.

³ Lanyogunu Tatinayi yua n den tie Yufilata kpenu nintuali gufeneeli leni Setadi-Bosinayi leni bi lieba den cua ki laa ba ki buali ba: «Ŋme puni u sanu yin goa ki maa ku diegu ne leni i bilini?

⁴ Yaaba n maa yi lede?»

⁵ Ama U Tienu den kubi Jufinba yudanba ke bi teni ke li tuonli suagi liiga hali ban baa soani ki waani Daliyusa ki le wan baa yedi yaala laa bonla po.

Bi kuli Jufinba po o bado Daliyusa kani

⁶ Tatinayi yua n den tie Yufilata kpenu nintuali gufeneeli leni Setadi-Bosinayi leni bi lieba Afalisaki yaaba, yaaba n ye u kpenu nintuali n den diani yaa tili ki soani o bado Daliyusa kani n tie ne.

⁷ Bi den diani ki yedi: «Ti fuondi a o bado Daliyusa.

⁸ O bado, ti bua ki waani a ke ti gedi U Tienu yua n yaba diegu kani, Juda diema nni. Bi maa gu leni a tanciama, ki maandi ti daadi i bilini po. Bi tuuni bonŋanla, li tuonli mo cuoni tontoni.

⁹ Ti den buali bi yudanba yua n puni baa u sanu ban maa ku diegu leni i bilini yeni.

¹⁰ Ti go den buali ba bi yela ki diani yaaba n gobidi li tuonli yela ke ŋan bandi ba.

¹¹ Bi den goa ki yedi: ‹Ti tie U Tienu yua n die tanpoli leni ki tinga naacenba. Ti goa ki maa Isalele batieba siiga yendo n den maa ki gbeni yaa diegu hali bina bina puoli po.

¹² Ama ti yaajanba den fiini U Tienu yua n die tanpoli pali ke o taa ba ki teni Kalide yua Nebukanesa, Babilona bado nuu nni ke o mumudi laa diegu ki cuo bi niba ki gedini ba ti yonbidi Babilona po.

¹³ Die Silusa n den diedi Babilona yaa binli o den ñani li ñoabonli ke ban goa ki maa U Tienu diegu.

¹⁴ O bado Nebukanesa n den fie yaa wula tadimu leni yaa ŋanjilifa tadimu Jelusalema U Tienu diegu nni ki ban bili Babilona budieli nni, o den teni ke bi taa mu ki teni Sesibatisadi wan den dini yua Juda gufeneeli.

¹⁵ O den yedi ke wan taa ki gedini mu Jelusalema ki ban kuani mu U Tienu diegu nni bi yaa ti goa ki maa gu ku kaankpelu.›

¹⁶ Lanwani laa Sesibatisadi cua Jelusalema ne ki cili U Tienu diegu tanpuuli. Ki cili lan yogunu ki taa ki pundi hali moala bi maa gu ama ku daa gbeni.

¹⁷ Moala o bado, a yaa sua ke li dagidi, ŋan teni ban lingi yaa tila n maadi Babilona batieba maama nni ki le li yaa tie moamoane ke o bado Silusa den teni li ñoabonli ke ban goa ki maa U Tienu diegu Jelusalema. Li yaa puoli ŋan waani ti ŋan jagi yaala lipo.»