Esidirasi 4 - Gourmanchéma Bible

¹ Mi diema niba, Juda leni Benjamina buolu yaaba yibalinba den gbadi ke yaa jufinba n ñani ti yonbidi ki kpeni maa Li Miali Diedo, Isalele yaaba Tienu diegu.

² Bi den cua Solobabeli leni bi diedanba kani ki yedi: «Ti baa taani leni yi ki maa U Tienu diegu kelima tinba leni yinba kuli jaandi Tienyendu. Ti padi a pada opo hali Asili bado Esali-Hadona yogunu, wani yua n cuo ki cuani ti ne.»

³ Ama Solobabeli leni Josue leni Isalele yaaba diedanba yaaba n sieni den goa ki yedi ba: «Laa dagidi yin taani leni ti ki maa U Tienu diegu. Ti baa maa gu tinba tibebe kelima ku baa yaa tie li Miali Diedo Isalele yaaba Tienu diegu. Baa Pelisa diema bado Silusa den bili yeni.»

⁴ Lanwani mi diema niba yeni den wudi Jufinba gbanu ki jieni ba ke ban cedi ki da go maa U Tienu diegu.

⁵ Pelisa bado Silusa miali dana kuli, ki yaa caa hali Daliyusa yaa bali yogunu, bi den baa ban suu yaa cancantieba i ligi ke ban moandi ke Jufinba tuona n sedi.

Bi kuli Jufinba o bado Alitakiselisesi kani

⁶ O bado Asuelusi bali cilima, Jufinba yibalinba den diani li tili ki soani o kani ki kuli Jelusalema yaaba leni Juda dogi yi n sieni yaaba.

⁷ Pelisa bado Alitakiselisesi yogunu, Biselami, Mitiledati, Tabeeli leni bi lieba moko den diani li tili ki soani o bado kani. Bi den diani li tili yeni leni Alama yaa diani ki soagini Alama mabuolu nni.

⁸ Gufeneeli Lehumi leni o tidianlo Simisayi moko den diani o bado Alitakiselisesi kani li tili ki maadi Jelusalema maama. Li tili yeni den cili nande:

⁹ «Tinba gufeneeli Lehumi leni o tidianlo Simisayi leni ti lieba Dini yaaba, Alifalisataki yaaba, Tadipeli yaaba, Afadasi yaaba, Eleki yaaba, Babilona yaaba, Suse yaaba, Deha yaaba Elami yaaba,

¹⁰ bani, o niciamo leni o paadaano Osinapadi n cuo ki gedini ki ban kaani yaaba Samali dogu nni leni tinbuotoana yaaba n ye u kpenu nintuali n diani.»

¹¹ Ban den diani ki soani yaa tili nne: «O bado Alitakiselisesi, tinba a naacenba yaaba n ye u kpenu nintuali diani apo.

¹² O bado, ŋan yaa bani ke yaa Jufinba n ñani a kani ki goa ki cua ti siiga Jelusalema ne leni yaa yantiali n tie ke ban goa ki maa mi yiema leni mi biadima dogu. Bi ŋanbi li tanpuuli ki goa ki maa i bilini.

¹³ Ŋan yaa bani ke bi yaa goa ki maa u naa dogu ki go goa ki maa i bilini u niba kan go yaa pa bancanli, bi lubili bi i sani tagima ligi. Yeni mo baa cuani o bado ŋalimano tingbali.

¹⁴ Li tie lani yaa po ke tinba yaaba yaa yula n mani ke ti tie a naacenba, laa mani ti ban fali a. Lani n teni ke ti diani ki waani a

¹⁵ ke ŋan teni ban lingi yaa tila n maadi a yaajanba maama niinni. A baa le lienni ke laa dogu tie mi yiema dogu. Yogunu kuli u den biidi bi batieba leni gufeneelinba po. Hali yogu u niba fiindi mi yiema. Li tie lani yaa po yo ke bi den mumudi laa dogu.

¹⁶ Ti bua ki waani a ke u dogu ne yaa goa ki maa ke u bilinu mo maa, a kan go yaa die Yufilata diema nintuali.»

O bado Alitakiselisesi maguankaama

¹⁷ O bado maguankaama n tie ne: «N diani yinba gufeneeli Lehumi leni o tidianlo Simesayi leni yi lieba yaaba n kaa Samali dogu nni leni tinbuotoana ya n ye u kpenu nintuali po. N fuondi yi.

¹⁸ Yin soani npo yaa tili yeni, bi soagini li ki cogi li n nintuali.

¹⁹ N teni ke bi lingi. Bi laa ke li tie moamoane ke hali yogu laa dogu niba fiindi bi batieba po mi yiema leni mi janjanma.

²⁰ Bi batiepaaba den tieni laa dogu nni ki diedi yaa diema n ye Yufilata diema nintuali kuli ke bi pa ba li bancanli leni li lubili leni i sani tagima ligi.

²¹ Lani yaa po yin teni bi niba n sieni li tuonli. U dogu yeni n da goa ki maa ke mii puni u sanu.

²² Yin da cuo laa bonla leni mi gbefema ke lan da biidi bi batieba po ki pugini.»

²³ Ban li cogi o bado Alitakiselisesi n diani yaa tili Lehumi leni o tidianlo Simesayi leni bi lieba po yaa yogunu, bi den jaligi ki gedi Jelusalema, Jufinba kani ki teni ke bi sieni li tuonli leni paalu.

²⁴ Lanwani U Tienu diegu maama tuona den sedi Jelusalema. Li tuonli den sedi hali Pelisa bado Daliyusa bali binlieli binli.