Esidirasi 3 - Gourmanchéma Bible

¹ Cilele n den ñani, Isalele niba, yaaba n den ye bi dogi nni kuli den fii ki taani ki tu ñoabu ki gedi Jelusalema.

² Jotisadaki bijua Josue leni o kpiiba o kopadicianlieba leni Seyalitieli bijua Solobabeli leni o kpiiba, den fii ki goa ki maa Isalele yaaba Tienu *padibinbinli ki baa yaa padi lipo a *padijuukaana nani lan diani ki bili Li Miali Diedo nilo Musa *bali maama tili nni maama.

³ Baa ke bi den jie yaa nilanbuoli n den cua ki kali mi diema nni, bi go den maa li padibinbinli yeni lin den kpa ye naankani, ki padi lipo a padijuukaana Li Miali Diedo po ku ti;naagu leni ku yenjuogu kuli.

⁴ Li yaa puoli bi den jaani a koasuga *jaanma nani lan diani ki bili maama, ki padi a padijuukaana ke a coali da leni lan diani ki bili maama daali kuli yaa pada po.

⁵ Laa jaanma yaa puoli bi den suagi ki padi daali kuli yaa padijuukaana leni yaa padijuukaana n den diani ki bili i ;nmaapaani po leni yaa jaanma n den gagidi Li Miali Diedo po. Bi go den padi yua kuli n den puuni Li Miali Diedo yaala o yama po.

⁶ Yeni, cilele dakpiali daali bi den goa ki cili ki padi a padijuukaana Li Miali Diedo po baa ke bi daa den cili ku diepangu tanpuuli.

Bi goa ki cili ki maa U Tienu diegu

⁷ Bi den taa i ligi ki teni yaaba n baa kpie a tana leni yaaba n baa kpie ti daadi. Bi go den teni Sidoni dogu yaaba leni Tili dogu yaaba mi jiema leni li bonñokaala leni mi kpama, ke ban pedi Libani sedili tiidi, ki gedini ti mi ñincianma kani ke u ñinfaalu n figi ki cuani ti hali Jafa dogu po. Likuli den tieni nani Pelisa bado Silusa n den puni u sanu maama.

⁸ Ban den goa ki kpeni Jelusalema, Li Miali Diedo diegu n ye yaa dogu nni, bi binlieli cilielo nni, Seyalitieli bijua Solobabeli leni Jotisadaki bijua Josue leni bi kpiiba bi kopadicianba leni Lefi buolu yaaba leni yaaba n den taani leni ba ki ñani ti yonbidi nni ki kpeni Jelusalema kuli den cili li tuonli. Bi den puogi Lefi buolu yaaba, yaaba n pia bina piilie leni yaaba n cie yeni kuli ban yaa gobidi Li Miali Diedo diegu tuonli.

⁹ Lefi buolu yaaba Josue leni o bijaba leni o kpiiba leni Juda buolu yaaba Kadimieli leni o bijaba, leni Henadadi bijaba kuli den taani ki baa yaa gobidi Li Miali Diedo diegu tuonsoanba.

¹⁰ Bi tanmaaba n den puu Li Miali Diedo diegu tanpuuli yaa yogunu, bi yudanba den teni ke bi kopadicianba nagini ki laa bi tiagagidikaadi ki kubi kakacinba, ki go teni ke Lefi bijua Asafi buolu yaaba nagini ki kubi mu lonmu ki baa pagi Li Miali Diedo nani Isalele yaaba bado Dafidi n den bili maama.

¹¹ Bi den yiini ki kpiagidi Li Miali Diedo ki pagi o leni yaa maama n tie ne: «Li Miali Diedo ŋani, o *ŋanbili Isalele yaaba po ye hali yaa yogunu kuli!» Ku niligu den kpaani ki pagi Li Miali Diedo kelima bi den cili Li Miali Diedo diegu tanpuuli.

¹² Ama bi kopadicianba leni Lefi buolu yaaba leni bi diedanba siiga, bi nitianba, yaaba n den kpeligi ki laa ku diekpiagu, den buudi boncianla ban den cili laa dieli tanpuuli bi nunbu nni yaa yogunu. Nitoaba boncianla mo den kpaani li pamancianli kpaani,

¹³ hali ke baa den fidi ki gagidi yaa fuugu n tie li pamanli fuugu leni yaa fuugu n tie a bubula, kelima ku niligu den kpaani yaa kpaani n yaba hali ke yaaba n ye foagima gba.