Esidirasi 2 - Gourmanchéma Bible

¹ Babilona bado Nebukanesa n den cuo yaaba ti yonbidi ki gedini Babilona diema nni siiga boncianla den goa ki kuni Jelusalema leni Juda diema nni. Yua kuli den kuni o denpo.

² Yaaba n den gobidi ba den tie Solobabeli, Josue, Nehemi, Selaja, Leelaja, Malidoke, Bilisani, Misipali, Bigifayi, Lehumi leni Baana. Isalele yaaba buoli leni bi coali nne:

³ Peleyosi buolu yaaba den tie tudalie n kobiga n piilie n jaba lie (2 172).

⁴ Sefatia buolu yaaba: kobitaa n piilele n jaba lie.

⁵ Alaki buolu yaaba: kobilele n piilele n jaba muu.

⁶ Pasati-Moabi buolu yaaba, bani Josue leni Joabi yaabila: Tudalie n kobinii n piiga n jaba lie (2 812).

⁷ Elami buolu yaaba: tudili n kobilie n piimuu n jaba naa (1 254).

⁸ Satu buolu yaaba: kobiyia n piinaa n jaba muu.

⁹ Sakayi buolu yaaba: kobilele n jaba piiluoba.

¹⁰ Bani buolu yaaba: kobiluoba n piinaa n jaba lie.

¹¹ Bebayi buolu yaaba: kobiluoba n piilie n jaba taa.

¹² Asigadi buolu yaaba: tudili n kobilie n piilie n jaba lie (1 222).

¹³ Adonikami buolu yaaba: kobiluoba n piiluoba n jaba luoba.

¹⁴ Bigifayi buolu yaaba: tudalie n piimuu n jaba luoba (2 056).

¹⁵ Adini buolu yaaba: kobinaa n piimuu n jaba naa.

¹⁶ Esekiasi yaabili Ateli buolu yaaba: piiyia n jaba nii.

¹⁷ Betisayi buolu yaaba: kobitaa n piilie n jaba taa.

¹⁸ Joda buolu yaaba: kobiga n piiga n jaba lie.

¹⁹ Hasumi buolu yaaba: kobilie n piilie n jaba taa.

²⁰ Gibali buolu yaaba: piiyia n jaba muu.

²¹ Betelema dogu yaaba: kobiga n piilie n jaba taa.

²² Netofa dogu yaaba: piimuu n jaba luoba.

²³ Anatoti dogu yaaba: kobiga n piilie n jaba nii.

²⁴ Asimafeti dogu yaaba: piinaa jaba lie.

²⁵ Kilijati-Alima leni Kefila leni Beeloti dogu yaaba: kobilele n piinaa n jaba taa.

²⁶ Lama leni Geba dogu yaaba: kobiluoba n piilie n jayendo.

²⁷ Mikimasi dogu yaaba: kobiga n piilie n jaba lie.

²⁸ Betela leni Ayi dogi yaaba: kobilie n piilie n jaba taa.

²⁹ Nebo dogu yaaba: piimuu n jaba lie.

³⁰ Magibisi dogu yaaba: kobiga n piimuu n jaba luoba.

³¹ Elami toa buolu yaaba: tudili n kobilie n piimuu n jaba naa (1 254).

³² Halimi buolu yaaba: kobitaa n jaba piilie.

³³ Lodi, Hadidi leni Ono dogi yaaba: kobilele n piilie n jaba muu.

³⁴ Jeliko dogu yaaba: kobitaa n piinaa n jaba muu.

³⁵ Sena dogu yaaba: tudataa n kobiluoba n jaba piitaa (3 630).

³⁶ Bi kopadicianba den tie Jedayeja buolu yaaba, bani Josue yaabila: kobiyia n piilele n jaba taa.

³⁷ Imeli buolu yaaba: tudili n piimuu n jaba lie (1 052).

³⁸ Pasuli buolu yaaba: tudili n kobilie n piinaa n jaba lele (1 247).

³⁹ Halimi buolu yaaba: tudili n piiga n jaba lele (1 017).

⁴⁰ Lefi yaaba den tie Josue leni Kadimieli buolu yaaba, bani Hodafia yaa bila: piilele n jaba naa.

⁴¹ U Tienu diegu yanyanba den tie Asafi buolu yaaba: kobiga n piilie n jaba nii.

⁴² A buliñoaguuda den tie Salumi buolu yaaba, Ateli buolu yaaba, Talimona buolu yaaba, Akubi buolu yaaba, Hatita buolu yaaba leni Sobayi yaa buolu yaaba. Bikuli den taani ki tie kobiga n piitaa n niba yia.

⁴³ U Tienu diegu naacenba den tie Tisisa buolu yaaba, Hasufa buolu yaaba leni Tabaoti buolu yaaba,

⁴⁴ Kelosi buolu yaaba, Siaha buolu yaaba, Pasoni buolu yaaba,

⁴⁵ Lebana buolu yaaba, Hagabi buolu yaaba, Akubi buolu yaaba,

⁴⁶ Hagabi buolu yaaba, Samilayi buolu yaaba, Hanani buolu yaaba,

⁴⁷ Gideli buolu yaaba, Gahali buolu yaaba, Leyaja buolu yaaba,

⁴⁸ Letisimi buolu yaaba, Nekoda buolu yaaba, Gasami buolu yaaba,

⁴⁹ Usa buolu yaaba, Peseyaki buolu yaaba, Besayi buolu yaaba,

⁵⁰ Asina buolu yaaba, Mehunimi buolu yaaba, Nefusimi buolu yaaba,

⁵¹ Bakibuki buolu yaaba, Hakufa buolu yaaba, Haluli buolu yaaba,

⁵² Batisiluti buolu yaaba, Mehida buolu yaaba, Halisa buolu yaaba,

⁵³ Balikosi buolu yaaba, Sisela buolu yaaba, Tamaki buolu yaaba,

⁵⁴ Netisiaki buolu yaaba leni Hatifa buolu yaaba.

⁵⁵ Salomono naacenba puoliŋuani den tie Sotayi buolu yaaba, Sofeleti buolu yaaba, Peluda buolu yaaba,

⁵⁶ Jaala buolu yaaba, Dalikoni buolu yaaba, Gideli buolu yaaba,

⁵⁷ Sefatia buolu yaaba, Hatili buolu yaaba, Pokeleti-Hatisebayimi buolu yaaba leni Ami buolu yaaba.

⁵⁸ U Tienu diegu naacenba leni Salomono naacenba puoliŋuani kuli den taani ki tie kobitaa n piiyia n jaba lie.

⁵⁹ Yaaba n den ñani Teli-Melaki leni Teli-Halisa leni Kelubi-Adani leni Imeli ki kuni ki naa fidi ki doagidi ban tie yaa cuuna yaaba ki doagidi ke bi tie Isalele buoli yaaba n tie ne:

⁶⁰ Delaya buolu yaaba, Tobija buolu yaaba leni Nekoda buolu yaaba. Bikuli den tie kobiluoba n piimuu n jaba lie.

⁶¹ Bi kopadicianba siiga moko den pia yaaba n ki fidi ki doagidi ban tie yaa cuuna yaaba. Li den tie Habaja buolu yaaba, Hakotisi buolu yaaba, Balisilayi buolu yaaba. Wani Balisilayi den yi yeni kelima o den taa Galaadi yua Balisilayi bisiaba siiga yendo.

⁶² Bi den lingi a coada tila nni baa laa bi yaajanba yela. Bi den ñani ba li padili tuonli nni.

⁶³ Gufeneeli den yedi ke ban da je yaa padijiedi n gagidi boncianla hali o kopadiciamoba n baa diidi bipo *Ulima leni Tumima ki le wan baa jagi yaala.

⁶⁴ Isalele yaaba, yaaba n den ñani ti yonbidi nni kuli den tie piinaa n tudalie n kobitaa n niba piiluoba (42 360),

⁶⁵ kaa taani bi naacenba leni bi potuada yaaba n den tie tudalele n kobitaa n piitaa n niba lele (7 337). Bi yanyanba mo den tie kobilie, bi jaba leni bi puoba.

⁶⁶ Bi den pia i taami kobilele n piitaa n bonba luoba, i*buomi kobilie n piinaa n bonba muu,

⁶⁷ ti yuoyuodi kobinaa n piitaa n bonba muu leni i ŋunbi tudaluoba n kobilele n bonba piilie (6 720).

⁶⁸ Ban den pundi Jelusalema Li Miali Diedo diegu n ye yaa dogu nni, bi diedantianba den puni U Tienu diegu po bi yama po bu paabu ke ban goa ki maa gu kun den kpa ye naani.

⁶⁹ Bi den puni ban fidi yaa banlu ku diegu yeni tuonli po. Ban den puni yaala den taani ki tie wula bontana piiluoba n tudiyenli (61 000), ŋanjilifa kilo tudalie n kobinii (2 800) leni a kopadicianliada bona kobiga.

⁷⁰ Bi kopadicianba, Lefi buolu yaaba leni ku niligu siiga toaba leni bi yanyanba leni a buliñoaguuda, leni U Tienu diegu naacenba den kakali ban boagidi ba yaa dogi nni. Isalele yaaba, yaaba n sieni den kakali bi dandogi nni.