Esidirasi 1 - Gourmanchéma Bible

Silusa puni u sanu ban goa ki maa U Tienu diegu

¹ Pelisa diema bado Silusa bali binkpiali binli, Li Miali Diedo den jagi ke o baa tieni wan den teni ke o sawalipualo Jelemi yedi yaala. O den teni ke Pelisa diema bado Silusa yeni baa li yantiali ki ñani li ñoabonli ki diani li ki soani o diema kuli nni ki yedi:

² «Mini Pelisa diema yaaba bado Silusa yedi yaa maama n tie ne: Li Miali Diedo, U Tienu yua n die tanpoli puni nni ŋanduna diema kuli ke n die ma. O puogi nni min maa o diegu Jelusalema dogu yu n ye Juda diema nni.

³ Yi siiga nni yaaba n tie U Tienu nibuolu kuli n fii ki gedi Jelusalema Juda diema nni ki ban maa Isalele yaaba Tienu diegu, wani yua ke bi kpiagidi o Jelusalema dogu nni. Wani bi Tienu n yaa ye leni ba.

⁴ Isalele yaaba n ye naankani kuli, likani yaaba n todi ba ki pa ba ŋanjilifa, wula, tiatoadi, ti yandi, ki go pa bi yama po paabu U Tienu diegu yaagu n ye Jelusalema po.»

⁵ Juda buolu yudanba leni Benjamina buolu yudanba leni bi kopadicianba leni Lefi buolu yaaba kuli siiga, U Tienu n den kuani yaaba yaa yama nni ban gedi Jelusalema ki ban maa Li Miali Diedo diegu kuli, den bogini ki baa gedi.

⁶ Ban den ye yaaba yaa siiga kuli den puni ba yaa tiadi n tie ŋanjilifa, leni wula leni tiatoadi, leni ti yandi kaa taa leni ban puni yaa paabu bi yama po.

⁷ Nebukanesa n den fie yaa tadimu Li Miali Diedo diegu nni ki ñani mu Jelusalema ki gedi ke ban kuani mu o budieli nni yeni, o bado Silusa den taani mu ki goa ki guani mu.

⁸ Wani Silusa den teni ke mi diema ŋalimankubido Metiledati ñani mu o *bulo yeni dieli nni, ki teni Juda diema badija Sesibatisadi.

⁹ Mu coali n tie ne: Wula tadibuomu bonmu piitaa, ŋanjilifa tadibuomu tudili, mu jugimu piilie n bonmu yia,

¹⁰ wula tadikuamu bonmu piitaa, yaa ŋanjilifa tadiñokaamu n ŋani nani mu liemu, bonmu kobinaa n piiga, leni tiatoadi bondi tudili.

¹¹ Yaa tiadi n den tie wula leni ŋanjilifa kuli yaa coali den pundi tudamuu n kobinaa (5 400). Sesibatisadi leni o yonbilieba n den ña ti yonbidi ki baa kuni Jelusalema, o den taa laa tiadi kuli ki guani ti Jelusalema.