Esayi 9 - Gourmanchéma Bible

¹ Yaa niba n cuoni li *biigili nni laa mi yencianma. Yaaba n kaa li biigili diema nni, Mi yenma cua ki yendi bipo.

² A teni ke u buolu yabidi. A puni ba li pamancianli. Bi pala mangi a nintuali nani u jetaagu yaa pamanli yeni. Nani bi niba n yen kuudi ki mangi bi pala Ti fagidi boagidima yogunu maama yeni.

³ Kelima yaa tugili n bi maa bipo yeni, Yaa gbiamu n den pua bi buanu yeni, Ban n den mabindi ba leni yaa gbadunduli, A pua ki mudi likuli nani Madiana daali yene.

⁴ Kelima ban pili yaa cacaagu mi janjanma nni kuli Leni ban faligi yaa liadili mi soama nni kuli Bi baa lu la mi fantama nni, Mi fantama n buoni likuli.

⁵ Kelima bi mali tipo ki biga. Ti baa bonjaga, li bali baa yaa maa o boacaba po. Bi baa yini o: “Yaa Tundika n ki pia lie, U Tienu U Paaciamu Daano, Baa, yua n ye hali yaa yogunu kuli, Mi Yanduanma Bado.”

⁶ O tuonli n baa yaa tie wan pugini o bali Ki go pa yaa yanduanma n ki pia gbenma. O baa kali Dafidi bali kalikaanu ki diedi o diema. O baa pugini mi paalu ki kubi ma leni mi *teginma leni yaa bujiali n tiegi, Moala leni yaa yogunu kuli. Li Miali Diedo U Paaciamu Kuli Daano n baa tieni yaala o buacianma nni yeni.

Li Miali Diedo baa faligi Isalele yaaba

⁷ O Diedo fu leni Jakobo puoliŋuani Laa fuugu tie Isalele yaaba po.

⁸ Bi niba kuli baa ga li laabaalo Efilayima leni Samali dogi yaaba maadi leni ti japaadi Ki jigini bi yula ki tua:

⁹ «I tankonkuomi baa, ti baa maa leni a tankpiekaana. Bi pedi sikomoli tiidi Ama ti baa lebidi i leni sedili tiidi.»

¹⁰ Li Miali Diedo baa teni bi yibalinba Letisini yaaba n paadi ba O baa pa bi yibalinba ti jatiadi.

¹¹ Sili yaaba baa yaa ye puoli po, Filisiti yaaba nintuali Bi baa yaadi bi ñoana ki nali Isalele yaaba. Baa leni lankuli Li Miali Diedo pabienli daa kuugi. O nuu da baa tiane ki baa waani ba fala.

¹² Isalele yaaba naa guani U Tienu yua n pua ba kani. Bi naa lingi Li Miali Diedo U Paaciamu Kuli Daano.

¹³ Lani n teni Li Miali Diedo baa jia Isalele diema nni li yuli leni li juoli kuli. Dayenli lige ke Li Miali Diedo jia bu kpakpalibu benu leni ku sabigu,

¹⁴ O nikpelo leni li koanbali n tie li yuli, O sawalipualo yua yaa yeli n ñani o faapuama po n tie li juoli.

¹⁵ Bi naa niba gobidikaaba baa biani ba Yaaba n teni ke bi gobidi ba mo baa bodi cain.

¹⁶ Lani n teni ke Li Miali Diedo kan fidi ki mangi o pali bi jawaaba po Bi ki gbadi mi niñima bi kpepuona leni bi kpienbila po. Kelima bikuli tie tuongunda danba leni nibiadiba. Bi ñoana mo ki pia maŋanma. Baa leni lankuli Li Miali Diedo pabienli daa kuugi bipo, O nuu mo baa tiane ki baa waani ba fala.

¹⁷ Kelima mi biadima co nani mi fantama yeni Ki buondi a kongoaba leni i konkoni, Li fuali leni li fatudi moko co.

¹⁸ Li Miali Diedo U Paaciamu Kuli Daano pabienli Teni ke mi diema cuo mi fantama, Mi fantama dini bi niba. Oba kuli mo kan ŋa o kpiilo.

¹⁹ Bi jobidi ganu leni jienu, Baa leni lankuli mi koma mo naa gbeni. Yua kuli mo koani leni o lielo.

²⁰ Manase koani leni Efilayima, Efilayima mo koani leni Manase. Bi kukuli taani ki baa Juda. Baa leni lani kuli Li Miali Diedo pabienli daa kuugi bipo O nuu mo baa tiani ki baa waani ba fala.