Esayi 4 - Gourmanchéma Bible

¹ Laa daali puoba lele baa sani ki joali jayendo ki yedi o: «Tinba n baa lingi ti jiema, Tinba n baa yieni ti yula. Taa ti tin tua a puoba, Ñani tipo ti fe.»

Jelusalema niba yaaba n ciadi

² Laa daali Li Miali Diedo baa teni li benkpeli n toa Ki tua pagidi leni kpiagidi, Mi diema bonluonkaala mo n tua jigidi leni ŋamu, Isalele yaaba, yaaba n ciadi po.

³ Li daali kpendi ke ban ŋa yua Siyono po, Leni ban ŋa yua Jelusalema po, Bi baa yini ba bi nigagidiŋanba Yaaba yaa yela n diani Jelusalema nni mi yema po kuli.

⁴ Li Miali Diedo yaa ŋuudi ki ñani yaa yogunu Siyono bisiaba joagindi, O baa teni ti buudi fawaama n cua ki ŋuudi Ki ŋanbi ki ñani yaa soama n wuli Juda nni.

⁵ Li Miali Diedo baa tagi Siyono juali po kuli, Leni li nitaanli po, ku muñiigbangbadigu u yensiinu, Ku ñiagu mo yaa fantama n co. Lankuli yaa yuli po Li Miali Diedo kpiagidi baa yaa ye.

⁶ U wuonkaanu baa yaa ye u yensiinu wulugu po Ki tua wuonkaanu leni denkaanu ku tafaagu leni ki taaga po.