Efesa 5 - Gourmanchéma Bible

¹ Lanwani yin yaa ŋua mani wani U Tienu fuuli, nani o bibuadimu yeni.

² Yin yaa ye mani leni yiyaba leni mi buama nani Kilisiti n den bua ti maama ki puni o yuli U Tienu, ki tua yaa paabu leni yaa padili yaa nuulu n mani.

³ Yin da tuo mi *conconma maama leni majoagindi buoluba kuli, bi mi ŋaliŋabuama maama n ña yi siiga baa waamu, kelima laa dagidi yinba bi *nigagidiŋanba po.

⁴ Yin yaa kubi mani yi yula yi maama nni ki da maadi mi cancaginmaama leni mi gaadimaama leni o faajibiado kuli. Ama yin yaa tuondi mani U Tienu.

⁵ Yin bandi mani ke baa niyendo yua n tie mi conconma daano leni yua n tiendi ti *joagindi, leni o ŋaliŋabualo yaala n tie opo nani i *buli ŋoadima, kan baa U Tienu leni Kilisiti diema ŋalimani.

⁶ Oba kuli n da boandi yi leni mi mafanma. Li tie laa bonla yaa po yo ke U Tienu pabienli se yaaba n yie o kuli po.

⁷ Lani yaa po yin da pia ŋantaadoba kuli leni ba.

⁸ Yi den kpa tie li *biigili yaaba, ama moala yi tie mi yenma yaaba o Diedo nni. Yi tagi n yaa tie nani mi yenma yaaba yeni.

⁹ Kelima mi yenma n baa luoni yaa bonluonkaala tie li *ŋanbili leni mi teginma leni i moamoani.

¹⁰ Yin biigi ki bandi yaala n baa mani o Diedo po,

¹¹ ki da pia ŋantaadoba kuli leni li biigili tuona, ya n kaa pia fuoma, ama yin doagidi ke a bia.

¹² Kelima li pia i fe, baa ki maadi ban tiendi yaa bonla ŋasiili nni.

¹³ Bi yaa doagidi laa niba n tiendi yaa bonbiadila mi yenma nni, mi yenma baa doagidi lan bia maama, kelima mi yenma doagidi likuli.

¹⁴ Lani yaa po ke li yedi: «Ŋan fundi, fini yua n goa, Ŋan fii bi tinkpiba siiga. Kilisiti baa yendi apo.»

¹⁵ Lani yaa po yin yaa fangi mani yi yula leni yi tagi n tie maama. Yin da tie nani bi yanluodanba yeni, ama yin yaa tie nani bi yanfodanba.

¹⁶ Yin da u yogunu, kelima yaa dana n tie na bia.

¹⁷ Lani yaa po yin da tie yanluodanba, yin yaa fani mani ki moandi ki bandi o Diedo yanbuama.

¹⁸ Yin da ñu mi daama ki gaadi, kelima li baa teni yin biidi yiba, ama yin yaa gbie leni U Tienu Fuoma.

¹⁹ Lani, yi baa yaa maadi leni yiyaba ki togidi Pisominba, leni yaa yani n pagi U Tienu, leni U Tienu Fuoma n gobidi yi ke yi yini yaa yani. Yaa yiini mani ki pagi o Diedo leni yi pala kuli.

²⁰ Yaa tuondi mani U Tienu yua n tie Baa yogunu kuli li bonla kuli po ti Diedo Jesu Kilisiti yeli po.

Ku diegu yema

²¹ Yin yaa miindi mani yi yula yiyaba kani kelima yin pia Kilisiti po yaa fangili yaa po.

²² Yinba bi puoba, yua kuli n yaa miindi o yuli o calo kani nani wan miindi o yuli o Diedo kani maama.

²³ Kelima o ja tie o pua yudaano nani Kilisiti n tie wan yini yaaba yudaano maama, yaaba n tie o gbanandi, wani n tie bi Candaano.

²⁴ Nani Kilisiti n yini yaaba n miindi bi yuli Kilisiti kani maama, li pundi ke bi puoba n yaa miindi bi yuli bi ciaba kani li bonla kuli nni.

²⁵ Yinba bi podanba, yua kuli n yaa bua o pua nani Kilisiti n den bua wan yini yaaba maama ki puni o yuli ki kpe bipo.

²⁶ O den tieni yeni ki baa ŋuudi ki ŋanbi ba leni mi ñima leni U Tienu maama,

²⁷ ki teni ban pundi ki sedi o kani ki pia ti kpiagidi, kaa pia joagindiba leni golimaba leni yaala n gundi kuli. Ama ban gagidi ki yaa ŋani cain, kaa pia ban baa fidi ki kuli ba leni yaala.

²⁸ Li pundi ke bi podanba moko n yaa bua bi puoba nani ban bua bi yula maama yeni. Yua n bua o pua kuli, bua o yuli.

²⁹ Kelima oba naa nani o gbanandi. Ama o dindi o ti ki kubi ti nani Kilisiti moko n kubi wan yini yaaba maama,

³⁰ kelima ti mo tie o yaa gbanandi buoli.

³¹ Li diani: «Li tie lani yaa po ke o ja baa ña o baa leni o naa kani ki taani leni o pua, bani niba lie yeni n tua gbananyendi.»

³² Line n tie yaa bondoaginkaala n yaba. N maadi laa maama Kilisiti leni wan yini yaaba yaa po yo.

³³ Li mayuli yinba yaa po tie ke ja kuli n yaa bua o pua nani wan bua o yuceli maama, pua kuli mo n yaa fangi o calo.