Efesa 4 - Gourmanchéma Bible

¹ Kelima lankuli yaa po n tundi yi, mini yua n tie li kpaadili kelima n tie o Diedo yua, ke yi tagu n dagidi leni wan den yini yi yaala yaa po.

² Yin yaa ye mani leni yiyaba leni li yumiinli leni mi dingima leni li juunli. Juuni mani leni yiyaba leni mi buama.

³ Yin moandi mani hali bonŋanla ki kubi mi Fuoma taanyenma, kelima mi yanduanma n loli yi yenma maama po.

⁴ Gbananyendi n ye, mi Fuoma moko tie yenma, yeni moko suginyenma n ye, U Tienu n den yini yi yaama yaa po.

⁵ O Diedo yendo bebe n ye, dandanyenli bebe n ye, mi *batisima moko tie yenma.

⁶ Tienyendu bebe n ye yua n tie Baa tikuli po, yua n die tikuli, ki ye tikuli siiga, ki go ye tikuli yaa niinni.

⁷ Ama ti siiga yua kuli den baa li *ŋanbili nani Kilisiti n puni yua kuli bu paabu maama.

⁸ Li tie lani yaa po ke li yedi: «Wan den doni hali tanpoli, O den taa a kpaada Ki go puni bi nisaaliba bu paabu.»

⁹ Lan yedi ke o den doni tanpoli po yeni, li baa be? Li baa ke o den kpa jiidi hali ki tinga tiipo.

¹⁰ Wani yua n den jiidi yeni tie yua n doni ki pendi hali tanpoli ki baa gbieni i kaani kuli.

¹¹ O puni bi nitianba ke ban yaa tie tondiba, bi nitianba ban yaa tie sawalipuaba, bi nitianba ban yaa tie o Laabaaliŋamo wangikaaba, bi nitianba mo ban yaa tie bi yankpaaba bi bi bangikaaba.

¹² O den tieni yeni ki bua ki yaa ŋanbidi o *nigagidiŋanba cain, ki bogini ba ban yaa tuuni, ki teni wani Kilisiti gbanandi n yaa kpedi ki suagi liiga.

¹³ Lani n baa teni tikuli n pundi ki baa yaa taanyenma n ye li*dandanli nni leni U Tienu Bijua yaa bandima, ki tie yaaba n kpedi o sanŋoadima nni, hali ki dagidi cain nani Kilisiti n dagidi cain maama.

¹⁴ Lanwani ti kan go yaa tie nani a biwaala yeni, ki lengidi kelima bi niba nunfanbiadibu leni bi boandi n kpendinni yaa bangima po.

¹⁵ Ama ti yaa maadi i moamoani leni mi buama, ti baa yaa kpedi ki dagidi li bonla kuli nni, Kilisiti nni wani yua n tie li yuli.

¹⁶ Li tie wani leni o yaa todima po, ke ti gbanandi kuli taani ki tuugi yenma kelima ti tuga kuli ya n kubi ti ke ti pa bonŋanla po. Yeni yaa po ti kpedi kelima gbananbuolu kuli tuuni u tuonli nani lan pundi maama, ki ŋanbidi tiba mi buama nni.

Yaa miapanli n ye Kilisiti niinni

¹⁷ Lanwani min yedi yaala leni min kadi ki waani yi yaala, o Diedo yeli nni tie line: Yi tagi n da naani leni bi nilanba yaa tagi yeni, bani yaaba n ŋua bi yantiana ya n tie fanma fanma yeni.

¹⁸ Bi yama biigi. Bi tie canba U Tienu yaa miali po kelima bi yanpiima leni bi pajuagili yaa po.

¹⁹ Baa go bani i fe n tie yaala. Bi puuni bi yula mi *conconma po ki baa tiendi ti *joagindi buolu kuli, ki kuandi bi yama lienni ki pugidipugidi.

²⁰ Ama yinba, yii den bandi Kilisiti yeni ka.

²¹ Yi den gbadi o maama, bi den bangi yinba yaaba n daani yaa moamoani n ye wani Jesu nni.

²² Lani n tie ke yin da go tie nani yin den kpa tie maama. Ama yi siiga yua kuli n landi o tagikpelu nani li liadili yeni, o yanbuabiadima boandi n den biidi yu.

²³ Yin baa mani li yantiapanli.

²⁴ Yin laa mani u tagipaanu, yu n tagi nani U Tienu n bua maama, ki ŋua i moamoani n kpendinni yaa *teginma leni yaa gagidiŋanma.

²⁵ Lani yaa po yin cedi mani mi faama, yi siiga yua kuli n yaa maadi o nisaalilielo i moamoani kelima tikuli tie gbananyendi yaaba.

²⁶ Yi pala yaa fii, yin da tieni ti *tuonbiadi, ki da tuo mani u yienu n kua ke yi pala daa kuugi.

²⁷ Da pa mani ku *tuotabigu yudaano u kaanu yi pala nni.

²⁸ Yua n den kpa su, wan da go su. Ama wan yaa tuuni li tuonli nani lan dagidi maama, ke wan yaa pia wan baa fidi ki pa a luoda yaala.

²⁹ Majoagindiba kuli n da ña yi ñoana nni. Ama yin fidi yaa yogunu kuli, yin maadi yaa maama n ŋani, yaama n baa ŋanbi ki go seligi yaaba n gbadi ma.

³⁰ Yin da biidi mani U Tienu Fuoma Yua pali, wani yua n tie yipo mi maalima ki doagidi ke yi *daafaabima daali kpendi.

³¹ Yin cedi mani li mutuoli, ki nanga, li pabienli, ku fuugu, ku tuotabigu, leni tugutongu buolu kuli n ña yi siiga.

³² Yin yaa mani mani leni yiyaba ki gba yiyaba po mi niñima, ki tiendi yiyaba po sugili nani U Tienu n den tieni yipo sugili kelima Kilisiti nni maama.