Efesa 2 - Gourmanchéma Bible

¹ Mi kpiama, yi den tie tinkpiba kelima yi tagili leni yi*tuonbiadi po.

² Laa yogunu yi den ŋua ŋanduna na yema sanbiadu, leni mi fawaama nni paaciami bado, yua yaa yantiali n tuuni yaaba n yiedi U Tienu yaa pala nni.

³ Tikuli den kpa tie yeni, ki tiendi nani laa niba n tiendi maama moala, ki ŋua ti gbanandi bonbuakaala, ki tiendi ti gbanandi leni ti yantiana n bua yaala kuli. Ti den mali ki tie U Tienu pali n be leni yaaba nani bi nisaaliba kuli yeni.

⁴ Ama U Tienu niñingbadima yaba, o bua ti hali boncianla.

⁵ Lani yaa po, tin den tie bi tinkpiba kelima ti tagili po, o den goa ki puni ti li miali leni Kilisiti. Li tie kelima o*ŋanbili-paabu yaa po ke yi tindi.

⁶ O taani ki fiini ti leni Kilisiti ki duoni ki kaani ti leni o *tanpoli diema nni, wani Jesu Kilisiti yaa niinni.

⁷ O den tieni lankuli ki baa doagidi o ŋanbili n yaba kaa pia bianu maama hali yaa yogini n baa ti cua, kelima o ŋanma tipo Jesu Kilisiti nni.

⁸ Li tie li ŋanbili-paabu yaa po ke yi tindi. Yi baa la kelima li *dandanli yaa po. Laa ñani yi yaa kani, li tie U Tienu paabu.

⁹ Laa tie a tuona po baa waamu, lanwani oba kuli kan kpiagi o yuli lipo.

¹⁰ Ti tie U Tienu nuu tuonli. O tagi ti Jesu Kilisiti nni ke tin yaa tuuni a tuonŋama, wan den tuodi ki jagi ke tin yaa tuuni yaa.

Jufinba leni bi nilanba tua yenma Kilisiti nni

¹¹ Yin tiadi mani line, yi den mali ki tie nilanba. Ban yi yaaba a junga kelima bi niba n tieni ba yaala bi gbanandi nni den yini yi a jifola.

¹² Laa yogunu yi den foagi leni Kilisiti. Yii den pia liba Isalele buolu yaaba diema nni. Yi den tie canba U Tienu n den pia yaa *ŋantaadi leni Isalele buolu yaaba, yaala n ŋua wan den niani ba yaa ñoanianu. Yi den ye ŋanduna na niinni kaa pia suginmaba kuli, kaa pia ŋantaado leni U Tienu.

¹³ Ama moala Jesu Kilisiti nni, yinba yaaba n den kpa ye foagima yeni, yi nagini U Tienu kani kelima Kilisiti yaa soama po.

¹⁴ Kelima Kilisiti n tie ti yanduanma, o taani nibuoli lie, Jufinba leni bi nilanba ke bi tua nibuoliyendu. O den puni o gbanandi ki mudi yaa goanli n den paadi ti leni tiyaba, lani n tie ti yibalindi yeni.

¹⁵ O den bolini li *bali maama leni man den pia yaa kuana kuli ki taa laa nibuoliedi ki tagi nibuopaanyendu wani oba yaa niinni ki tieni mi yanduanma.

¹⁶ O den tieni yeni ki baa teni ban mangi leni U Tienu, ki tua nibuoliyendu kelima li *dapoanpoanli yaa po, wan den bolini ti yibalindi naankani.

¹⁷ Wani Kilisiti den cua ki wangi mi yanduanma yaa Laabaaliŋamo yinba yaaba n den ye foagima leni yaaba n den ye koanma nni.

¹⁸ Kelima wani yaa po, tikuli pia u sanu ki baa fidi ki pundi Baa kani, Fuoma yenma nni.

¹⁹ Lanwani, yii go tie nilanba leni canba ka, yi di tie tanpoli diema yaaba ki taa buolu leni U Tienu nigagidiŋanba, ki tie U Tienu deni yaaba.

²⁰ Yi tie nani a tanmaakaana yeni, ke bi ŋuani yi yaa tanpuuli n tie U Tienu tondiba leni o sawalipuaba po. Jesu Kilisiti wani oba n tie laa tanpuuli tanjigi.

²¹ O yaa niinne ke laa dieli maa bonŋanla ki kpedi ki tua U Tienu dieli yaali n gagidi ki ŋani opo.

²² Bi ŋuani yi moko o yaa niinne ke yi taani ki tie U Tienu yekaanu kelima o Fuoma nni.