Efesa 1 - Gourmanchéma Bible

I fuondi

¹ Mini Polo, Jesu Kilisiti tondo kelima U Tienu yanbuama po, n diani li tili ki fuondi yinba yaaba n tie bi *nigagidiŋanba leni bi nidugikaaba Jesu Kilisiti nni ki ye Efesa.

² Ti Baa U Tienu leni o Diedo Jesu Kilisiti *ŋanbili leni o yanduanma n yaa ye leni yi.

U Tienu n puni ti yaa sela kelima Kilisiti po

³ Tin pagi U Tienu yua n tie ti Diedo Jesu Kilisiti yaa Baa. Wani n seligi ti, U Tienu Fuoma sela buoli kuli Kilisiti nni tanpoli po.

⁴ U Tienu den tuodi ki gandi ti Kilisiti nni hali ke ŋanduna daa den tagi, ke tin yaa tie yaaba n gagidi ki ŋani, kaa pia tagiliba kuli o nintuali. O buama yaa po,

⁵ o den tuodi ki bili ke tin baa mu bimoanmu bali kelima Jesu Kilisiti yaa po. O yanbuama leni o yanjagili yaa po ke o den tieni yeni.

⁶ Lanwani tin yaa pagi o ŋanbili yaali n pia ti kpiagidi, wan puni ti yaali kelima o *Bijabuadiga po.

⁷ Ti baa mi *daafaabima o niinni kelima o soama po, leni ti*tuonbiadi sugili nani o ŋanbili n yaba maama po.

⁸ U Tienu den wuli tipo laa ŋanbili ke li yaba ki puni ti mi yanfuoma leni mi bandima kuli.

⁹ O den doagidi tipo o yanbuama bondoaginkaala, wan den tuodi ki bili yaa yanjagiŋanli Kilisiti nni.

¹⁰ Lani n tie ke u yogunu yaa pundi, wan taani li bonla kuli, yaala n ye tanpoli po leni yaala n ye ŋanduna nni kuli, ke likuli n tua yenma, ke Kilisiti n yaa die likuli.

¹¹ Li tie wani Kilisiti yaa niinni ke U Tienu tieni li bonla kuli nani wan den kpa jagi ki bili maama. O den gandi ki gagidi ti, ke ti tua o yaaba.

¹² O den tieni yeni ke tinba yaaba n den kpa bili ti suginma Kilisiti nni, n yaa pagi o.

¹³ Yi moko n den gbadi i moamoani maama, lani n tie o Laabaaliŋamo yua n cuani yipo mi *tindima, yi den tuo ki daani Kilisiti. O yaa niinni U Tienu den tieni yipo mi maalima, lani n tie U Tienu Fuoma Yua wan den niani u ñoanianu ke o baa pa yi yua.

¹⁴ U Tienu Fuoma Yua yeni tie tipo i *kpaaligi *U Tienu diema ŋalimani po, yaala n doagidi ke U Tienu baa faabi ti cain ke tin yaa pagi o kpiagidi.

Polo jaandi Efesa yaaba po

¹⁵ Li tie lani yaa po ke min den gbadi yi *dandanli o Diedo Jesu po maama leni yi buama bi nigagidiŋanba kuli po,

¹⁶ n tuondi U Tienu yipo kaa cedi, ki taagi yikuli yela n jaandi nni.

¹⁷ Ke ti Diedo Jesu Kilisiti Tienu, wani Baa yua n pia ti kpiagidi kuli, n teni o Fuoma n yendi yi yantiana ki go doagidi o yipo U Tienu, yin bandi o moamoani.

¹⁸ N go miadi o ke wan yendi yi yantiana nuni ke yin fidi ki bandi yaa suginma n tuugi leni o yiinu, leni wan bili o nigagidiŋanba po yaa ŋalimani ke i pia ti kpiagidi.

¹⁹ N go miadi o ke yin bandi o paaciamu yu n tuuni tinba yaaba n dugi opo yaa niinni n yaba hali ke li kandi maama.

²⁰ O paaciamu yu n tuuni ti niinni yeni tie wan den soani leni yu ki fiini Kilisiti bi tinkpiba siiga ke o go ye ki fo, ki kaani o o jienu po tanpoli po.

²¹ Wani Kilisiti ka lankani ki die mi diema danba, li bali danba, bi paatieba leni bi diediba kuli, o yeli cie yeli kuli yaa yogunu n tie na leni yu n baa ti cua kuli.

²² U Tienu bili li bonla kuli wani Kilisiti taana tiipo ke o die la, ki teni ke o tie wan yini yaaba kuli yudanciamo.

²³ Kilisiti n yini yaaba yeni tie o gbanandi, ki tie o yedagidikaama, wani yua n dagidi bikuli po li bonla kuli nni.