Bi Bujiaba 3 - Gourmanchéma Bible

¹ Li Miali Diedo den ŋa i nilanbuoli ke bi ye mi diema nni ki baa yaa bigidi Isalele yaaba n ki den tieni Kanana diema nni kuama toabu.

² O den li bua mi nifiipanma yaaba yaaba n daa den bani toabu yeni n bangi bu toabu.

³ Wan den ŋa yaaba mi diema nni den tie Filisiti yaaba diemuudima yaaba, Kanana yaaba kuli, Sidoni yaaba leni Hefa yaaba yaaba n den ye Libani juana po, ki cili Baali-Helimoni juali ki yaa caa hali Hamati dogu buliñoabu.

⁴ Li Miali Diedo den bua ki taa laa nibuoli ki biigi Isalele yaaba ki bandi bani Isalele yaaba yaa baa tuo ki yaa ŋua wan den teni ke Musa teni bi yaajanba yaa *balimaama.

⁵ Li tie lani yaa po ke Isalele yaaba den kaa Kanana yaaba siiga leni Heta yaaba, Amola yaaba, Felesa yaaba, Hefa yaaba leni Jebusa yaaba siiga.

⁶ Bi den taa i nilanbuoli yeni bisiaba ke bi tua bi puoba, ki puni ba bi yaa bisiaba ki ŋoadi bi *buli mo.

Otinieli

⁷ Isalele yaaba den tieni yaala n ki mani Li Miali Diedo. Bi den sundi opo ki ŋoadi i buli *Baali leni *Akela.

⁸ Li Miali Diedo pali den beni Isalele yaaba po. O den taa ba ki teni Mesopotami diema bado Kusani-Liseyatayimi nuu nni. Bi den tie o bado yeni yonbi hali bina nii.

⁹ Isalele yaaba den mua ki mia Li Miali Diedo ke o puni ba o faabika, Kalebi waalo Otinieli, Kenasa bijua ke o faabi ba.

¹⁰ Li Miali Diedo Fuoma den kua o niinni ke o tua Isalele yaaba gobidika ki gedi bu toabu. Li Miali Diedo den teni ke o paadi o bado Kusani-Liseyatayimi.

¹¹ Mi yanduanma den tieni mi diema nni hali bina piinaa. Li yaa puoli Kenasa bijua Otinieli den kpe.

Ehudi

¹² Isalele yaaba go den tieni yaala n ki mani Li Miali Diedo. O den teni ke Moabi bado Egilona sedi bipo.

¹³ Egilona den taani Amoni yaaba leni Amaleki yaaba ke bi kuli gedi ki ban baa Isalele yaaba ki paadi ba. Bi den fie Jeliko dogu.

¹⁴ Moabi bado Egilona den diedi Isalele yaaba hali piiga n bina nii.

¹⁵ Isalele yaaba den mua ki mia Li Miali Diedo ke o puni ba o faabika Benjamina buolu yua Gela bijua Ehudi ke o faabi ba. O den tie ganbo. Isalele yaaba den soani wani Ehudi wan ban pa Moabi bado bu paabu.

¹⁶ Ehudi den maa wani oba o jugisiega ke ki pia ñoanalie ke ki foagimu pundi nukpandunli. O den yie ga o ciaga nni ki guani ga o jiencakpigili ki yie o tiadi ki maani kipo.

¹⁷ O den gedi ki ban puni Egilona bu paabu yeni. Egilona den gbengi hali boncianla.

¹⁸ Wani Ehudi n den teni bu paabu yeni, wani leni yaaba n den tugi bu paabu ki cuani kuli den lebidi ki kuni.

¹⁹ Wan den ban pundi yaa buli n tie tana ki kuu leni Giligali dogu kani, o den lebidi ki guani o bado kani ki yedi o: «O bado, n pia ŋasiili-maama ki baa yedi a.» O bado den yedi o naacenba n ña. Bikuli den ñani.

²⁰ O den kaa o fawapuadieli nni. Ehudi den nagini o ki yedi: «Min pia yaa maama ki baa yedi a ñani Li Miali Diedo kani.» O bado den fii ki sedi.

²¹ Ehudi den tandi o ganu ki noadi o jugisiega o jienu po ki muu o bado tugu nni.

²² Ki jugisiega kuli den kua ki taani leni li baali. Mi kpama den goa ki mundi ki jugisiega kelima Ehudi naa den goa ki ñani ga.

²³ O den luoni li fawapuadieli buliñoana leni ki sendabiga ki tagini ki ban ña.

²⁴ Wan den ñani ki ban kuni, o bado naacenba den cua ki diidi ki sua ke a buliñoana lo. Bi den tama ke o bado da ye ki ñanmuage li fawapuadieli nni.

²⁵ Bi den guudi ke li waagi. Ban den ti sua ke waa luodi, bi den taa ki sendabiga ki luodi ki sua ke bi canbaa bili ki kpe.

²⁶ Ban den se likani ki jilini, Ehudi den sani ki pendi yaa buli n tie tana ki gedi Seyili dogu.

²⁷ Wan den ban pundi likani, o den piebi kakaci Efilayima juana nni ki taani Isalele yaaba. O den ga bi liiga ke bi jiidi li juali.

²⁸ O den yedi ba: «Ŋoadi nni mani, kelima Li Miali Diedo taa yi yibalinba Moabi yaaba ki teni yi nuu nni.» Bi den ŋoadi o ki ban jia Moabi yaaba u kpenciamu Judana duonda kani kaa cedi ke baa niyendo duodi u kpenu.

²⁹ Laa daali bi den kpa Moabi yaaba ke bi bua ki pundi niba tudapiiga (10 000), bikuli gbanmandanba leni papaadanba. Baa niyendo naa den cia.

³⁰ Hali laa daali Isalele yaaba den paadi Moabi yaaba ki diedi ba. Lani mi yanduanma den tieni mi diema nni hali bina piinii.

Samigadi

³¹ Anati bijua Samigadi den ŋoadi Ehudi puoli. O den kpa Filisiti yaaba niba kobiluoba leni ban deli i naakpakpaadi leni yaala. O moko den tua Isalele yaaba po faabika.