Amosi 9 - Gourmanchéma Bible

¹ N den laa o Diedo ke o se li *padibinbinli po. O den yedi: «Pua U Tienu diegu bunbunnaada yula po Hali a tanpuuna n begibi, Pua ki mudi ŋa, ŋan baa yaaba n ye U Tienu diegu nni Kuli yula po, ki kpa ba. Yaaba n sieni, n baa kpa ba leni ki jugisiega. Bi siiga nni, oba kuli kan fidi ki sani ki cia, Yeni de, oba kuli kan sani ki cia.

² Bi yaa kua bi tinkpiba yekaanu nni, N nuu baa dadi ki noadi ba likani. Bi yaa doni hali tanpoli, N baa jiini ba likani.

³ Bi yaa wuoni Kalimeli juali yuli po, N baa lingi ba likani ki cuo ba. Bi yaa wuoni hali mi ñincianma tiipo ke min da le ba, N baa teni o wa n ñidi ba lienni.

⁴ Bi yibalinba yaa cuo ba ki gedini ti yonbidi, N baa teni ban kpa ba lipo leni ki jugisiega. N baa maani n nuni bipo, Ki kan yaa tiendi yaala n ŋani se yaala n bia.»

⁵ O Diedo Li Miali Diedo, U Paaciamu Kuli Daano Sii ki tinga ke ki digibi, Ki fiidi ki goa ki ñuandi nani Ejipiti kpenu yeni. Yaaba n ye kipo ye li paboanli nni.

⁶ U Tienu maa o yekaanu tanpoli. O teni ke a tawala yiini ki tinga po, O yen teni ke mi ñincianma ñima yugi ki caa tanpoli, Ke o goa ki wuliti ma ki tinga po. O yeli tie Li Miali Diedo.

U Tienu baa jia i tagili danba buudi

⁷ Li Miali Diedo yedi: «Yinba, Isalele yaaba, yii tie npo yenma leni Etiopi yaaba ka yo? N den ñani yinba Isalele yaaba Ejipiti diema nni, Nani min den ñani Filisiti yaaba Kafitodi diema nni maama, Nani min go den ñani Sili yaaba mo Kili diema nni maama yeni. Naani yii bani lipo?»

⁸ Diidi, mini Li Miali Diedo, U Tienu maani n nuni Yinba, yaa diema yaaba n pia ti *tuonbiadi po. N baa bolini ma, man da go ye ki tinga nni.

⁹ Ama baa yeni, n kan bolini Isalele puoliŋuani cain. Li Miali Diedo n yedi yeni. Diidi, n baa ñani n ñoabona ki yedi: «Ban gbedi Isalele yaaba i nilanbuoli kuli siiga, Nani ban yen gbedi i di ki ñandi a fiada, Ki nan kan tuo baa dibiyenma n baa tiipo maama.

¹⁰ Bu toabu baa je n niba siiga, ti tuonbiadi danba kuli, Bani yaaba n tua: ‹A kan teni fala n nagini ti, A kan teni fala n baa ti.›

U Tienu baa go ŋanbi Juda diema

¹¹ Laa yogunu, n go baa sieni Dafidi diegu, Yaagu n baa. N baa maa ki fiini ku diegbenbuona. N go baa ŋanbi gu kun tua Nani kun den kpa tie maama hali yogu.

¹² Dafidi puoliŋuani go baa diedi Edomi yaaba, yaaba n sieni leni i nilanbuoli kuli, Ban den kpa diedi yaaba ki yedi ke bani moko tie n yaa niba. Li Miali Diedo, yua n baa teni lani kuli n tieni ki dudi, n yedi yeni.»

¹³ Li Miali Diedo go yedi: «Diidi, u yogunu kpendi, Ke ti kpaandi baa yaa yaba ki kaandi maama Ke bi yaa yendi ki gbeni, ban go cili bu kpaabu. Bi baa yaa tuodi duven tiidi daama, Ke bine mo coagi duven tiidi jaadi. Lanwani o duvenpaano baa dua a joaciama po, A joabila mo kuli baa moagidi.

¹⁴ N baa ñani n niba Isalele yaaba ti yonbidi nni Ki go cuani ba ne. Bi baa go maa bi yibalinba n den bolini yaa dogi Ki yaa ye i niinni. Bi go baa ŋu duven tiidi ki yaa ñu i duven, Bi go baa ga i kuani ki yaa di yi kpaandi.

¹⁵ N go baa kaani ba bi diema nni, N kan go teni bi yibalinba n ñani ba min den puni ba yaa diema nni. Li Miali Diedo, yi Tienu n yedi yeni.»