Amosi 8 - Gourmanchéma Bible

¹ O Diedo Li Miali Diedo, den doagidi npo yaa bonlekaala n tie na: N den laa yaa baabuogu n pia yaa bonluonkaala n beni.

² O den buali nni: «Amosi, a nua be?» N den goa ki yedi o: «N nua baabuogu ke ku pia yaa bonluonkaala n beni.» Li Miali Diedo den goa ki yedi nni: «N niba, Isalele yaaba juodima pundi, N kan go tieni bipo sugili.»

³ Mini, O Diedo Li Miali Diedo, yedi line: «Laa daali yaa pundi, ban yiini badidiegu yaa yani Baa lebidi ki tua moe. A kpiema baa yaa yaba. Bi niba baa yaa tugi a kpiema yeni ki ban lu i kaani kuli. Li baa yaa tie ŋminma bebe.»

A kpenda bonbuakaala baa guli u dogu

⁴ Cengi mani line, yinba a kpenda, Yaaba n mabindi a luoda, Ki bolindi bi niñindanba mi diema nni.

⁵ Yi tua: «O ŋmapaano *jaanma daali baa pendi u laa yogune, Ke tin baa ki kuadi ti *ŋalikama? Mi *fuodima daali baa gbeni u laa yogune, Ke tin baa ki luodi ti buabuana? Ti baa wadi ku tiabiigikaagu. Ti baa pugini ki dunga. Ti baa ŋmiagi li *bonbiigikaala ki yaa janbidi bi niba.

⁶ Ti baa cuo yaaba n ledi i ligi kaa fidi ki pani ban tua yonbi. Ti baa cuo a luoda, yaaba n daa cacaapiliyenma Kaa fidi ki pani, ban tua yonbi, Ti baa kuadi baa ti ŋalikama fiada.»

⁷ Li Miali Diedo, Isalele yaaba n kpiagidi yua, Poli ki yedi: «N kan sundi yi *tuonbiadi siiga Baa bonyendi hali abada.»

⁸ Lani yaa po, mi diema kuli baa digibi, Mi diema yaaba kuli baa mua i kumoe, Mi diema kuli baa yaa fiidi ki goa ki ñuandi nani Ejipiti kpenciamu yeni.

⁹ O Diedo Li Miali Diedo, yedi: «Laa daali, n baa teni u yienu n kua u yensiinu N baa teni ki tinga n biigi u yensicocolu.

¹⁰ N baa lebidi yi jaanma dana ŋan tua paboanli dana, Ki lebidi yi yani kuli mo, yin tua kumoe. N baa teni bi niba kuli n laa li paboanli tiadi Ki doagidi bi paboanli. N baa kuo ba yubima N baa teni li paboanli n cuo mi diema yaaba kuli Nani bijayenyendo kuuma yeni. Laa daali cilima hali li juodima baa yaa tie paboanli daali.»

¹¹ O Diedo Li Miali Diedo, yedi: «A dana kpendi ke n baa soani mi koma mi diema nni, Laa tie mi jiema yaa koma ka, Laa go tie mi ñima yaa ñunñuunu moko. Ama li baa yaa tie Li Miali Diedo maama gbadima Yaa koma leni mi yaa ñunñuunu.

¹² Bi niba baa yaa puagi mi diema nni kuli, Ki ña nijienu ki teli niganu, Ki ña puoli ki teli nintuali, Bi baa puagi laa kaani kuli ki lingi Ki bua ki gbadi mini Li Miali Diedo maama, Ama bi nan kan le ma.

¹³ Laa dana nni, bi jafanŋanba leni bi jawaaba baa kpe ñunñuunu.

¹⁴ Isalele yaaba taagi Samali *bulo yeli ki polini Bi polini ki tua: ‹Hali Dana buolu yaaba bulo po, Hali Beli-Seba bogida po.› Bani yaaba n polini yeni kuli baa baa Ki kan go fii hali abada.»