Amosi 3 - Gourmanchéma Bible

¹ Isalele yaaba, yinba U Tienu n den ñani yaa nibuolu Ejipiti nni, Cengi mani Li Miali Diedo n maadi yipo yaala:

² «N den gandi yinba bebe Ki tinga nibuoli kuli siiga. Li tie lani yaa po ke n baa cuo yi u cuonbiadu Yin tieni yaa tudima kuli po.

³ Naani niba lie baa taani ki fii sanu Kaa kpa juogi ki dagini lipo?

⁴ Naani o yangbanlo baa buo li fuali nni Kaa laa wan baa cuo yaala? Naani o yangbanlo baa laabi o tuugu nni Ki buoni kaa pia wan cuo yaala?

⁵ Naani o nuano baa baa ku diagu nni, Kaa laa bonjekaala bi? Naani ku diagu baa fii kaa pia kun cuo yaala bi?

⁶ Naani bi baa pua li toagangaali u dogu nni, Ke bi niba kan jie bi? Naani fala baa baa dogu Ke laa tie Li Miali Diedo n cuani la bi?

⁷ Lanwani o Diedo, Li Miali Diedo kan tieni liba kuli, Kaa waani o naacenba bi sawalipuaba o ŋasiili.

⁸ O yangbanlo yaa buoni ŋme kan jie? O Diedo, Li Miali Diedo U Tienu yaa maadi Ŋme n kan pua sawali?»

U Tienu baa jia leni Samali yaaba ti buudi

⁹ Kpaani mani ki yedi yaaba n ye a dieŋama nni ki ye Asidodi leni Ejipiti: «Cua mani ki taani Samali juana yula po, Ki diidi ki le yaa janjancianma leni yaa mabinli n ye lienni.»

¹⁰ Li Miali Diedo yedi: «Samali yaaba ki bani ki tieni yaala n tiegi. Bi dogindi bi dieŋama nni ban tiendi u paalu ki fenli yaala.»

¹¹ Lani yaa po o Diedo, Li Miali Diedo yedi yaa maama n tie na: «Yi yibalinba baa lindi ki cebini yi diema, Ki paadi yi, Ki fie yaala n ye yi badidiedi nni kuli.»

¹² Li Miali Diedo yedi yaa maama n tie na: «Nani o yangbanlo n yen cuo ki yanga, O yankpaalo n ga taana lie bi tubijenga maama yeni, Li baa tie yeni Isalele yaaba po, Bani yaaba n ye Samali Ki dua i duanŋami leni yaa cabiladikaana n ŋani po. Bi siiga nni tianba bebe n baa sieni.»

¹³ O Diedo, Li Miali Diedo, U Tienu U Paaciamu Kuli Daano yedi yaa maama n tie na: «Cengi mani ki kpaani ki waani Jakobo puoliŋuani Bani Isalele yaaba yaa maama n tie na:

¹⁴ ‹Min baa pa Isalele yaaba bi yiema panpaani yaa daali N go baa bolini yaa padibinbina n ye Betela moko. A padibinbina yeni yina baa kua ki baa.

¹⁵ N baa mudi ban den maa yaa diena ti wadi yogunu po Leni ban den maa ya ku tontongu yogunu po, Ban den maa yaa dieciama ki tabini tabini a luonñina moko baa bodi. A diena boncianla baa bodi Li Miali Diedo n yedi yeni.› »