Amosi 2 - Gourmanchéma Bible

¹ Li Miali Diedo yedi mi ne: «Moabi yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi den sia Edomi bado ki buoni o kpaba.

² N baa soani mi fantama Moabi diema nni, Mi baa je Kelijoti dogu dieŋama, Moabi baa bodi ku fuugu siiga Leni bu toabu kuudi siiga leni kakaci piebima siiga.

³ N baa bolini o bado yua n kaa likani, Ki taani leni o koanbala kuli. Li Miali Diedo n yedi yeni.»

Juda yaaba

⁴ Li Miali Diedo yedi mi ne: «Juda yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi fali n *balimaama, Kaa kubi n ñoabona mo, Bi yaadi ki ŋoadi i *buli yaala n tie faama, Bi yaajanba n den ŋua yaala.

⁵ N baa soani mi fantama Juda diema nni, Mi baa je yaa dieŋama n ye Jelusalema.»

Isalele yaaba

⁶ Li Miali Diedo yedi mi ne: «Isalele yaaba tieni tuongunda taa, Li pundi baa bona naa, ya n teni ke n kan lebidi min jagi yaala. Bi kuadi o niteginka yua n pia bi panli Ki kagidi bi ligi, Bi kuadi o luodo kelima o daa cacaapilima kaa fidi ki pani.

⁷ Bi do ki ŋmaadi taliginba yula po, U bujiakaanu nni bi yen mundi taliginba i moamoani. Ki biga leni o baa kuli dua leni jafanyendo Ki bua ki biidi n yeli yaala n gagidi ki ŋani.

⁸ Bi yaa taani yaa *padibinbinli kani kuli ki baa kpiagi nni, Bi yen ladi ban ga a luoda kani yaa kpaliti Kelima a pana po, ki yaa dua. Bi yaa taani bi budieli nni, bi yen ñu Ban gaani a luoda kani yaa duven kelima a pana po.

⁹ Ama mini n den bolini bipo Amola yaaba, Bani, yaaba n den kpedi nani yaa tiidi n kpedi ki cie Ki go pia u fidu nani yaa tiidi n pia u paalu ki cie yeni. N den bolini ba cain.

¹⁰ N den ñani yi Ejipiti diema nni Ki kubi yi hali bina piinaa mi fanpienma nni, Hali ke yi ban diedi Amola yaaba diema.

¹¹ N den fiini yi bijaba siiga bi sawalipuaba, Yi nipanba siiga mo *Nasileya yaaba Bi laa tie yeni ka Isalele yaaba? Li Miali Diedo n yedi yeni.

¹² Ama yi ñuni nasileya yaaba duven, Yi yedi bi sawalipuaba, Ke ban da go pua sawali.

¹³ Diidi n baa ŋma ki midi yi, Nani yaa teligu n tugi *ŋalikama baba N bilini ki midi maama yeni.

¹⁴ Yua pa mi nuama kan fidi ki sani ki cia O gbanmandaano gbanmanu kan fuoni o, O jakoando kan fidi ki ga o miali.

¹⁵ O dabantoalo kan fidi ki sedi ki mua jama, Yua yaa taana n yua kan fidi ki sani ki cia, O tandaano kan fidi ki ga o miali.

¹⁶ Laa daali bi toatieba papaadaano baa lu o jatiadi ki sani mubili.» Li Miali Diedo n yedi yeni.