2 Timote 4 - Gourmanchéma Bible

¹ N teni a yaa ñoabonli n tie na U Tienu nintuali leni Jesu Kilisiti yua n baa jia ti buudi leni yaaba n fo leni yaaba n kpe kuli nintuali, ki puogi a kelima o cuama leni o diema kuli po,

² ŋan yaa wangi U Tienu maama, tieni ania ki moandi li yaa pa leni li yaa dingi kuli. Ŋan maadi ki guli yaaba n pia mi niama, ki fu leni yaaba n tudi, ki yaa tundi bi niba, ki go bangi ba leni li juunmoanli.

³ Kelima u yogunu baa ti cua ke bi niba kan go tuo ki yaa ŋua mi bangiŋanma, ama bi baa bua yaala n mani bipo bebe, ki lingi bi bangikaaba ki pugidipugidi, bani yaaba n baa bangi ba ban bua ki yaa gba yaala.

⁴ Bi go baa lebidi ki ŋa i moamoani cengima ki yaa cengi a togidifana.

⁵ Ama fini wani, ŋan kubi a yuli li bonla kuli nni, ki tuo ki yaa laadi fala ki juuni lienni, ki tuuni o Laabaaliŋamo wangika yaa tuonli, ki soani a tuonli bonŋanla.

⁶ Mini yaa po, bi wuli nni nani mi padiñima yeni, n kuuma yogunu pundi.

⁷ N moani li muaŋanli ki gbeni, n sani mi nuama ki gbeni, n kubi li *dandanli.

⁸ Baa moala bi bili npo mi *teginma badifogiliga, o Diedo yua n tie o bujiateginka n baa pa nni yaaga o goacuama daali. O kan pa mini n bebe ka, ama yaaba n den bua o goacuama kuli.

Polo leni Timote n pia yaa ŋantaado

⁹ Ŋan moandi ki cua n kani tontoni

¹⁰ kelima Demasa den ŋa nni kelima o bua yaa jamaano tie na yaa bonla, ki gedi Tesalonika. Kilesa fii ki gedi Galati, Tita mo fii ki gedi Dalimati diema.

¹¹ Luka bebe n ye leni nni. A yaa kpendi ŋan taa Maka wan yegi leni a, kelima o baa pia npo mi fuoma boncianla li tuonli po.

¹² N den soani Tikika Efesa.

¹³ A yaa kpendi ŋan cuani npo min den ŋa yaa kpalibu Tilowasa Kalipusa deni. Ŋan cuani npo a tila moko, min bua yaa ki cie tie ya n tie ti gbandi.

¹⁴ O maano Alesanda den tieni nni mi biadima boncianla. O Diedo baa guani o nani o tuona n tie maama.

¹⁵ A moko n fangi a yuli leni o kelima o den yie ti maama boncianla.

¹⁶ Min den kpa sedi ki baa maadi ki ga n yuli u bujiakaanu kani, oba kuli ki den todi nni, bikuli den ŋa nni. O Diedo n da guani ba la.

¹⁷ Wani o Diedo den todi nni ki puni nni u fidu ke n fidi ki waani o Laabaaliŋamo kuli cain, ke bi nilanba kuli n gbadi. O den ga nni o yangbanlo ñoabu nni.

¹⁸ Wani o Diedo n go baa ga nni leni bonbiadila kuli po, ki faabi nni ki kuani nni o diema tanpoli po. Wani n yaa baadi ti kpiagidi hali yaa yogunu kuli. Amina.

I fuondijuodike

¹⁹ Ŋan fuondi Pilisika leni Akilasa, leni Onesifola deni yaaba.

²⁰ Elasita sedi Kolinta dogu nni. Tilofima yia ke n ŋa o Mile.

²¹ Ŋan moandi ki cua n kani ke ku fawaagu daa pundi. Yubulusa leni Puda leni Linusa leni Kilodia leni ti kpiiba yaaba n sieni kuli fuondi a.

²² O Diedo n yaa ye leni a. U Tienu *ŋanbili n yaa ye leni yikuli. Amina.