2 Timote 3 - Gourmanchéma Bible

¹ N bua ŋan bandi ke a juodidana yaa nagidi, yaa yogini n pa baa cua.

² Kelima bi niba baa bua bi yula ŋamu bebe, ki tua i ligi buakaaba. Bi baa tie ñoakpalidanba leni japaadanba, ki tie a nisugida, leni bi danyiekaaba, leni ŋanwaadanba, ki go tie yaaba n kaa fangi U Tienu.

³ Bi go baa tie yaaba n bia ki naa pia niñingbadima, ki tie ku tuotabigu danba, leni yaaba n kaa kubi bi yula, leni ku tugutongu danba, ki tie bi niŋanba kuli yibalinba,

⁴ leni i janbi danba, leni bi yanjegibidanba, leni bi yusiedanba, ki bua yaala n mani bipo ki cie U Tienu.

⁵ Bi baa pia U Tienu tuoma yaa nannanli, ama bi nia yaala n tie li paalu. Ŋan foagidi leni laa nibuolu.

⁶ Bi siiga bi jatianba wuondi ki caa ti diedi nni ki boandi yaa puoba n tadi ki tugi ti *tuonbiadi ke li bonbuaka-biadila buoli kuli die ba.

⁷ Bi ŋua mi bangima yogunu kuli ki naa fidi ki pundi i moamoani yaa bandima.

⁸ Nani Janesi leni Jamibilesi n den yie Musa maama, laa jaba moko yie i moamoani yene. Bi tie yaa niba yaa yantiana n *joagini ki biidi, bi *dandanli mo ki fidi ki sedi mi biigima nni.

⁹ Ama bi kan suagi liiga bi boandi bangima nni kelima bi yanluoma baa doagidi bi niba kuli po nani laa niliediba yaama n den doagidi maama.

Polo n tundi Timote yaa tundijuodike

¹⁰ Ama fini, a den ŋoadi n bangima, leni n tagu leni n yanjaga, leni n dandanli, leni n dingima, leni n buama, leni n juunli,

¹¹ leni ban den wangi nni yaa fala, leni min den ye yaa yepaama nni. Bee fala yo ke mii den laa Antiosa leni Ikoniyuma, leni Lisita dogi nni? Baa den waani nni o laa fala? Ama o Diedo den faabi ki ñani nni likuli nni.

¹² Moamoani yaaba n bua ki yaa cuoni ke li tiegi Jesu Kilisiti nni kuli, bi baa wangi ba fala.

¹³ Ama bi nibiadiba leni i boandi danba baa suagi liiga mi biadima nni ki yaadi biba ki go yaandi nitoaba.

¹⁴ Ama fini wani n yaa se ke li pa ŋan den bandi yaala ki go daani la. A bani ŋan den bandi la yua yaa kani.

¹⁵ Hali a biwaama nni a bani i Diani, yi n gagidi ki fidi ki puni a mi yanfuoma mi *tindima po kelima li dandanli Jesu Kilisiti nni yaa po.

¹⁶ I Diani kuli den diani U Tienu gobidima yaa niinni. I pia mi fuoma mi bangima po, ki maadi ki cuo bi niba, ki tundi ba mi tudima nni, ki go bangi ba mi teginma.

¹⁷ Yeni, ke U Tienu nilo n ŋanbi cain ki bogini ki fidi ki yaa tiendi a tuonŋama kuli.