2 Samueli 9 - Gourmanchéma Bible

¹ Dafidi den buali: «Naani niloba go sieni Sayula buolu siiga bi? N bua ki ŋanbi opo kelima Jonatan po.»

² Li den sua ke naacenyendo sieni Sayula naacenba siiga ke bi yi o Tisiba. Bi den yini o ke o cua Dafidi kani. Wani o bado den buali o: «Fini n tie Tisiba bi?» O den yedi: «N daano, mine.»

³ O bado den yedi o: «Naani Sayula nilo baa niyendo ki go ye ke min ŋanbi opo nani U Tienu n ŋanbi maama?» Tisiba den goa ki yedi o bado: «Jonatan bijua yendo sieni ki tie wabo.»

⁴ O bado den buali o: «O ye le?» Tisiba den goa ki yedi: «O ye Lodebali dogu nni, Amieli bijua Makili diegu nni.»

⁵ O bado Dafidi den soani ke bi ban yini o Lodebali, Amieli bijua Makili diegu nni.

⁶ Lanwani Sayula bijua Jonatan yaa bijua Mefiboseti den cua Dafidi kani ki labini ki pugi o. Dafidi den yedi: «Mefiboseti!» O den goa ki yedi: «Mini a naacemo nne.»

⁷ Dafidi den yedi o: «Ŋan da jie liba, n bua ki ŋanbi apo kelima a baa Jonatan yaa po. N baa go guani a a yaaja Sayula kuani kuli. A baa yaa di n saajekaanu kani yogunu kuli.»

⁸ Mefiboseti den pugi o ki yedi: «Mini a naacemo tie be ke a nuali ki laa npo, mini yua n tie nani o sangbankpiemo yeni?»

⁹ O bado den yini Tisiba, Sayula naacemo yeni ki yedi o: «N puni a canbaa Sayula yaabili, Sayula leni o diegu yaaba kuli n die yaala.

¹⁰ Ŋan yaa ko opo i kuani yeni kuli, fini leni a bijaba, leni a naacenba, ki yaa taagi opo o jetaagu kuli ke a canbaa yaabili Mefiboseti n yaa pia li bonjekaala ki di. Wani Mefiboseti baa yaa di n yaa saajekaanu kani yaa yogunu kuli.» Tisiba den pia piiga n bonjala muu leni naacenba piilie.

¹¹ O den yedi o bado: «Mini a naacemo baa tieni fini n daano o bado n teni nni yaa ñoabona kuli.» Mefiboseti den di Dafidi saajekaanu nani o bado bijaba yeni.

¹² Mefiboseti den pia bonjadagidiga ke bi yi ga Mika. Tisiba deni yaaba kuli den tua Mefiboseti naacenba.

¹³ Mefiboseti den ye Jelusalema kelima o den di o bado saajekaanu kani. O den tie wabo.