2 Samueli 8 - Gourmanchéma Bible

¹ Li yaa puoli Dafidi den paadi Filisiti yaaba ki miidi ba. O den fie bi bali ke baa go pia bali bi diema nni.

² O go den paadi Moabi yaaba moko. O den teni ke bi duani tiipo ke o kpa niba taa siiga kuli niba lie. Niba taa siiga kuli o den ŋa niyendo leni li miali. Dafidi den diedi ba ki teni ke bi pa li lubili.

³ Dafidi go den paadi Sili diema yaa diebiga Tisoba yaa bado Lehobi bijua Hadadeseli. O den paadi o, wani Hadadeseli n den moandi ke o baa goa ki diedi u kpenciamu Yufilata yaa yogunu.

⁴ Dafidi den fie o kani tandanba tudili n kobilele (1 700) leni taacenda tudapiilie (20 000). O den jia yaa taami n sieni gadibanjiini ki ŋa taami kobiga bebe ki kubi bani o yuli po.

⁵ Sili yaaba yaaba n den ye Damasa dogu den cua ke bi baa todi Tisoba bado Hadadeseli. Dafidi den paadi ba ki ku bi siiga piilie n tudalie (22 000).

⁶ O den sieni bi toatieba Damasa, Sili diema nni. Sili yaaba mo den tua Dafidi naacenba, ki den pa o li lubili. Li Miali Diedo den puni Dafidi mi paadima wan den gedi naankani kuli.

⁷ Dafidi den gaa Hadadeseli naacenba n den kubi yaa wula gbankoanditi ki gedini ti Jelusalema.

⁸ O go den taa ti kumoandi boncianla Hadadeseli dogi Betaki leni Belotayi niinni.

⁹ Hamati bado Toyi den gbadi ke Dafidi paadi Hadadeseli toagoli kuli.

¹⁰ O den soani o bijua Yolami o bado Dafidi kani wan fuondi o ki jaandi o leni wan paadi Hadadeseli, kelima wani Toyi leni Hadadeseli den tie yibalinbe. Yolami den gedini wula tiadi leni ti kuboandi leni ti kumoandi yaa tiadi kuli ki ban teni Dafidi.

¹¹ O bado Dafidi den ga likuli ki puni Li Miali Diedo nani wan den puni wan den paadi i nilanbuoli ki ga bikani yaa ŋanjilifa leni yaa wula maama.

¹² I nilanbuoli yeni tie Sili yaaba, Moabi yaaba, Amoni bijaba, Filisiti yaaba leni Amaleki yaaba. Wan den fagi Tisoba bado Lehobi bijua Hadadeseli kani yaa fagidi moko, o den puni U Tienu yene.

¹³ Dafidi yeli go den ñani ki pugini wan den gedi ki ban paadi Sili yaaba yaa joaloangu n yi Mi Yaama joaloangu nni, ki kpa bi siiga piiga n tudanii (18 000).

¹⁴ O den kaani o koanbala Edomi diema nni ke bi die Edomi yaaba. O den diedi Edomi diema kuli. Li Miali Diedo den kubi Dafidi wan gedi naankani kuli.

Dafidi paatiecianba yela

¹⁵ Dafidi den diedi Isalele yaaba kuli. O den ja ti buudi o niba kuli po ke li tiegi.

¹⁶ Tiseluja bijua Joabi den tie bi guudikaaba yudaano, Ahiludi bijua Josafati den tie o bado soagindo.

¹⁷ Ahitubi bijua Tisadoki, leni Abiata yaa bijua Ahimeleki den tie bi kopadicianba.

¹⁸ Sedaja den kubi a tila tuonli. Yeoyada bijua Benaya den tugi Keleta leni Peleti yaaba yuli. Dafidi bijaba mo den tie wani Dafidi todikaaba.