2 Samueli 7 - Gourmanchéma Bible

¹ O bado Dafidi n den kua ki ye o dieciangu nni, Li Miali Diedo den faabi o leni o yibalinba yaaba n lindi o kuli, ki fuoni o leni bu toabu.

² Dayenli wani Dafidi den yedi o sawalipualo Natan: «Diidi ki le, n ye ban ŋanbi yaa diegu leni sedili tiidi yaa daadi yaa niinni, ke U Tienu *ŋantaadikpaku mo nan ye li gbandieli nni.»

³ Natan den goa ki yedi o bado: «Ŋan tieni yaala n ye a yama nni kuli kelima Li Miali Diedo ye leni a.»

⁴ Laa daali ñiagu, Li Miali Diedo den maadi leni Natan ki yedi o:

⁵ «Gedi ki ban yedi n naacemo Dafidi ke mini Li Miali Diedo yedi mine: ‹Naani fini n baa maa npo min baa yaa ye yaa dieli nni?

⁶ Ki cili hali min ñani Isalele yaaba Ejipiti nni ki pundi hali dinla, mii ye diegu nni. N li ye gbandieli nne ki cuoni leni ba.

⁷ Min den yegi leni Isalele yaaba naankani kuli, n den pia min puogi yaaba ban yaa gobidi n niba Isalele yaaba. Mii buali bi siiga oba kuli: Be n teni ke yii maa npo diegu ki ŋanbi gu leni sedili tiidi yaa daadi?›

⁸ Moala ŋan yedi n naacemo Dafidi: ‹Li Miali Diedo, U Paaciamu Kuli Daano yedi mine: N den ñani a u yankpaakaanu kani ŋan den kpaa i pe naani, ki teni ke a tua n niba Isalele yaaba yudaano.

⁹ N den ye leni a ŋan den goadi naani kuli, n den bolini a yibalinba kuli a nintuali, ki teni ke a yeli kpedi ki yabidi nani ŋanduna nicianba yaa yela n yaba maama yeni.

¹⁰ N puni n niba Isalele yaaba u yekaanu, ki kaani ba ke ban yaaka ki da go goadi ki liani, ke bi nibiadiba n da go mabini ba nani mi kpiama,

¹¹ min den teni ke bi bujiaba gobidi n niba yaa yogunu. N faabi a leni a yibalinba ki puni a mi fuodima. Mini Li Miali Diedo, n yedi a ke n baa sieni a diegu mo.

¹² A dana bianu yaa tuoni ke a guani, n baa gandi a bila siiga yendo ki dini o li bali wan ga a kaanu. N baa teni o bali n yaa ye ki pa.

¹³ Wani n baa ti maa npo ku diegu. N baa pugini o bali paalu mo hali yaa yogunu kuli po.

¹⁴ N baa tua opo baa, omo baa tua npo bijua. O yaa tieni yaala n bia, n baa tundi o leni u fibu nani bibaa n yen tundi o biga maama yeni.

¹⁵ Die n kan ñani n seli o kani nani min den ñani li Sayula kani maama, min den yie yua ki teni ke a ga o kaanu.

¹⁶ N baa teni a diegu nni yua n yaa kubi li bali ki die hali yaa yogunu kuli, a diegu bali baa yaa ye ki pa hali yaa yogunu kuli.› »

¹⁷ Natan den togidi Dafidi laa maama leni laa bonlekaala kuli.

Dafidi jaandi

¹⁸ Lane o bado Dafidi den kua Li Miali Diedo gbandieli nni wani Li Miali Diedo kani ki yedi: «Li Miali Diedo n Tienu, n tie ŋme? N diegu yaaba tie ŋmenba ke a teni ke n tua min tie yua ne?

¹⁹ Lani kuli daa tie apo liba kuli, Li Miali Diedo n Tienu. A go maadi mini a naacemo diegu n baa ti tua maama mo yaa maama, ki da go ban waani mini yua tie nisaalo laa bonla!

²⁰ Mini Dafidi go baa fidi ki yedi be? Kelima Li Miali Diedo n Tienu, a bani mini a naacemo.

²¹ A tieni laa boncianŋanla kuli ki waani nni la nani a pali n bua maama kelima a den niani nni li ñoanianu.

²² A kpiagi hali moamoani, Li Miali Diedo U Tienu pia ti kpiagidi hali boncianla, oba kuli ki naani leni a. Nani tin ko li gba maama, tientoa kuli ki ye, se fini.

²³ Naani nibuoluba go ye ŋanduna nni ki naani leni a niba Isalele yaaba, fini U Tienu n den cua ki da ki faabi yaaba ki teni ke bi tua a niba ki kpedi a yeli bi? A den tieni a niba Isalele yaaba po leni a diema po kuli mi bancianma leni li bonlidikaala, lani n tie ke a den deli i nilanbuoli leni bi buli kuli ki ñani ba a niba Isalele yaaba nintuali, bani ŋan den da ki faabi yaaba Ejipiti nni.

²⁴ A gandi a niba Isalele yaaba ki bili ke ban yaa tie a yaa niba yaa yogunu kuli. Fini Li Miali Diedo, amo tua bi Tienu.

²⁵ Moala, Li Miali Diedo U Tienu, ŋan tieni ŋan yedi yaala, ŋan teni ke ŋan niani mini a naacemo leni n diegu yaala kuli n yaa ye hali yaa yogunu kuli.

²⁶ A yeli n yaa baadi ti kpiagidi hali yaa yogunu kuli. Bi niba n yaa tua: ‹Li Miali Diedo U Paaciamu Kuli Daano tie Isalele yaaba Tienu!› Mini a naacemo Dafidi diegu n yaa se a nintuali ki pa.

²⁷ Kelima fini Li Miali Diedo, U Paaciamu Kuli Daano, Isalele yaaba Tienu, a den doagidi ki waani mini a naacemo ke a baa sieni n diegu. Li tie lani yaa po ke n paagi n pali ki mia laa miabu.

²⁸ Li Miali Diedo, fini n tie U Tienu, a maama tie moamoani, ki niani nni mo ke a baa tieni npo laa *ŋanbili.

²⁹ Lanwani n mia ŋa ŋan yaa seligidi mini a naacemo diegu, kun yaa se a nintuali hali yaa yogunu kuli, kelima fini Li Miali Diedo n Tienu n maadi yeni. Li tie kelima a seli yaa po ke mini a naacemo diegu baa baa li seli hali yaa yogunu kuli.»