2 Samueli 6 - Gourmanchéma Bible

¹ Dafidi go den taani Isalele yaaba jakoanda kuli ke bi coali pundi tudapiitaa.

² Lanwani Dafidi leni yaaba n den ye leni o kuli den fii ki gedi Baale-Juda, ki baan taa U Tienu *ŋantaadikpaku likani ki cuani gu Jelusalema. Laa ŋantaadikpaku tie ban taagi Li Miali Diedo yeli ki miadi o naani, wani U Paaciamu Kuli Daano yua n kaa o bali kalikaanu po *selubanba siiga, ku kpaku yeni yuli po.

³ Ku den ye Abinadabi diegu nne li juali po. Bi den taa gu ki maani teligu bonpangu po ki ban caa. Abinadabi bijaba Usa leni Ahiyo den gobidi teligu yeni.

⁴ Usa den cuoni ki baali ku ŋantaadikpaku, Ahiyo mo den cuoni ku liiga.

⁵ Dafidi leni Isalele yaaba kuli den pua Li Miali Diedo nintuali baantiabuolu kuli. Bi den pua ban den taa sipilesi tiidi daadi ki kpie yaa gangaana leni yaa kogididajena leni yaa gangaamu, ki go pua a kogidiyela leni i sasagi, leni mu lonmu.

⁶ Ban den pundi Nakoni jalu kani i ne den ŋadi ke U Tienu ŋantaadikpaku kpegini. Usa den tandi o nuu ki muubi ku ke kun da baa.

⁷ Lani yaa po Li Miali Diedo pali den beni Usa po ke o den kpa o lankani kelima o tagili po. Usa den kpe lankani ki kuu U Tienu ŋantaadikpaku.

⁸ Dafidi pali den biidi leni Li Miali Diedo n kpa Usa. Bi den yini u kaanu yeni Peletisa-Usa. U baa yi yeni hali dinla.

⁹ Dafidi den jie Li Miali Diedo laa daali ki yedi: «Li Miali Diedo ŋantaadikpaku baa ga lede ki kua n deni?»

¹⁰ Waa go den bua ki kuani Li Miali Diedo ŋantaadikpaku o deni, wani Dafidi n ye yaa kaanciamu nni. O den teni ke bi gedini gu Obedi-Edomi, yua den tie Gati yua, yaa denpo.

¹¹ Li Miali Diedo ŋantaadikpaku den tieni ŋmaali taa Gati yua, Obedi-Edomi deni. Li Miali Diedo den seligi Obedi-Edomi leni o deni yaaba kuli.

¹² Bi den cua ki yedi o bado Dafidi ke Li Miali Diedo seligi Obedi-Edomi deni yaaba leni wan die yaala kuli kelima wani U Tienu ŋantaadikpaku po. Lani Dafidi den gedi Obedi-Edomi denpo ki ban taa ku ŋantaadikpaku yeni ki baa gedini gu wani Dafidi kaanciamu kani. U sanu nni, yaaba n den yegi leni gu den tieni u badu kelima bi pamanli po.

¹³ Yaaba n den tugi ku kpaku yeni n den yaagi tayaagidi luoba, Dafidi den padi naatonli leni naatonbili.

¹⁴ O den jeli leni o fidu kuli Li Miali Diedo nintuali ki laa yaa kopadician-liadibiga n tie *benŋuunu ki luni leni *len yaa gaali.

¹⁵ Dafidi leni Isalele yaaba kuli den gedini Li Miali Diedo ŋantaadikpaku, ki kpaani li pamanli kpaani, ki piebi kakacinba.

¹⁶ Li Miali Diedo ŋantaadikpaku n den cuubi ki baa kua Dafidi kaanciamu nni yaa yogunu, Dafidi pua Mikali, Sayula bisalo den diegi li diebonli kani ki nuali. Wan den laa ke o bado Dafidi yugi ki ciini, ki jeli Li Miali Diedo nintuali, o den fali o o pali nni.

¹⁷ Ban den cuani Li Miali Diedo ŋantaadikpaku, bi den bili gu ku kaanu, Dafidi n den kpaa kupo yaa gbandieli yaa tugu nni. Dafidi den padi a *padijuukaana leni i jaandi pada Li Miali Diedo po.

¹⁸ Wan den padi a padijuukaana leni i jaandi pada ki gbeni, o den taa Li Miali Diedo U Paaciamu Kuli Daano yeli ki gaali bi niba kuli.

¹⁹ Lani yaa puoli o den boagidi bi niba kuli, Isalele nigola yeni kuli, bi jaba leni bi puoba, nilo kuli dupen yendo leni nanjenyenli, leni ban tiendi duven leni yaa bonluonkaala yaa bonkonli yenli. Lani bi niba kuli den yadi, yua kuli den kuni o denpo.

²⁰ Dafidi moko den kuni ki baan gaali o diegu nni yaaba. O pua Mikali, Sayula bisalo, den ñani ki tuogi o ki yedi: «Dinla, fini Isalele diema bado bi baa ti kpiagidi de, ŋan bi landi a tiadi ki se benbili nani yaa ja n ki pia fuoma ke a naacenba potuada nua a yeni.»

²¹ Dafidi den goa ki yedi Mikali: «Li Miali Diedo yaa kpiagidi po yo ke n tieni yeni, wani yua n gandi nni ki ŋa a baa leni o diegu nni yaaba kuli, ki dini nni li bali ke n gobidi Li Miali Diedo niba Isalele yaaba. N go baa jeli ki doagidi n pamanli wani Li Miali Diedo yaa kpiagidi po.

²² N go baa wadi n yuli ki cie baa yeni, mini nba, n baa diidi ke mii tie liba, ama baa yeni, ŋan maadi yaa potuada yaa maama yeni baa kpiagi nni.»

²³ Lane Mikali, Sayula bisalo yeni, ki den baa biga hali wan ban kpe.