2 Samueli 5 - Gourmanchéma Bible

¹ Isalele buoli kuli den cua Ebiloni, Dafidi kani ki yedi o: «Ti taa leni a gbanandi, tikuli tie soayenma yaabe.

² Baa hali yogu, Sayula n den tie ti bado yaa yogunu, fini n den gobidi Isalele toagola. Li Miali Diedo den yedi a: ‹A baa yaa gobidi n niba Isalele yaaba, ki yaa tugi bi yuli.› »

³ Isalele nikpela kuli den cua Ebiloni, o bado Dafidi kani ke o kuani o *ŋantaado leni ba likani Li Miali Diedo nintuali. Bi den wuli opo mi gagidima kpama, ki dini o li bali Isalele diema kuli po.

⁴ Dafidi den pia bina piitaa wan den tua bado yaa yogunu, ki tieni li bali nni bina piinaa.

⁵ O den tieni Ebiloni bina lele leni ŋmaali luoba ki die Juda yaaba. Jelusalema mo o den tieni piitaa n bina taa ki die Isalele yaaba leni Juda yaaba kuli.

Dafidi koani ki paadi Jelusalema

⁶ Dafidi leni o toatieba den gedi ki baa Jelusalema dotieba Jebusa yaaba. Bi den yedi Dafidi: «A kan kua ne kelima baa a juama leni a waba baa deli a.» Lani n den bua ki yedi: «Dafidi kan fidi ki kua ne hali abada.»

⁷ Ama Dafidi den cuo Jelusalema kaanpaalu Siyono, ki diedi u ke u tua Dafidi kaanciamu.

⁸ Laa daali Dafidi den yedi: «Yua n tuogi leni Jebusa yaaba ki paadi ba hali ki pundi u ñinsanu, bani a juama leni a waba, mini Dafidi yibalinba yeni!» Li tie lani yaa po ke bi tua: «A juama leni a waba kan kua li dieli nni.»

⁹ Dafidi den kua ki ye u kaanpaalu yeni niinni ki yini u Dafidi kaanciamu. O den maa u bilinciamu ki cili u kaanpaalu kani, Milo kani yeni ki lindi u dogu, ki go maa tugu nni kelima bu toabu po.

¹⁰ Dafidi paalu den pugidi kelima Li Miali Diedo, U Tienu, U Paaciamu Kuli Daano den ye leni o.

¹¹ Tili bado Idami den soani Dafidi kani a tonda, ki go soani sedili yaa daadi, leni bi kpagikpieba, leni a tankpieda, ke bi maa Dafidi po ku diegu.

¹² Dafidi den bandi ke Li Miali Diedo dini o li bali ke o tie Isalele yaaba bado, ki go kpedi o diema kpiagidi kelima o niba Isalele yaaba po.

Dafidi n mali yaa bila ki ye Jelusalema

¹³ Dafidi n den ñani Ebiloni ki cua Jelusalema, o go den taa u dogu nni puoba leni ti ponanbandi ki go mali a bonjala leni a bonpola.

¹⁴ Diidi ki le ban den mali opo yaaba Jelusalema nni yaa yela: Samua, Sobabi, Natan, Salomono,

¹⁵ Jibali, Elisua, Nefegi, Jafia,

¹⁶ Elisama, Eliyada leni Elifeleti.

Dafidi paadi Filisiti yaaba

¹⁷ Filisiti yaaba n den gbadi ke bi dini Dafidi li bali ke o tua Isalele yaaba bado, bi den taani ki gedi ke bi baa cuo o. Dafidi n den gbadi lani, o den jiidi ki kua u kaanpaalu nni.

¹⁸ Filisiti yaaba den pundi ki yadi ki gbie Lefayima yaaba joaloangu nni.

¹⁹ Dafidi den buali Li Miali Diedo: «Min tuogi leni Filisiti yaaba bu toabu bi? A baa taa ba ki teni nni bi?» Li Miali Diedo den yedi o: «Gedi, kelima n baa taa Filisiti yaaba ki teni a.»

²⁰ Dafidi den gedi Baali-Pelatisima tinkundogu, ki tuogi leni Filisiti toatieba yeni ki paadi ba. Lani o den yedi: «Li Miali Diedo deli ki yadi n yibalinba n nintuali nani yaa ñinpuubikaama n padi bu tiabu yeni.» Lani yaa po yo ke bi yini laa kaanu Baali-Pelatisima.

²¹ Filisiti yaaba den ŋa bi *buli likani ke Dafidi leni o niba den taa yi.

²² Filisiti yaaba go den goa ki gedi ki yayadi Lefayima yaaba joaloangu nni.

²³ Dafidi den buali Li Miali Diedo o yaa baa gedi ki tuogi leni ba bu toabu. Li Miali Diedo den yedi o: «Ŋan da tuogi ba, lindi bi puoli po ki ban tuogi leni ba mudiye tiidi kani.

²⁴ A yaa gbadi a taana cenli mudiye tiidi yeni yuli po, ŋan jaligi kelima mini Li Miali Diedo n ye a liiga ki baa paadi Filisiti yaaba toagoli.»

²⁵ Dafidi den tieni Li Miali Diedo n den yedi maama, ki paadi Filisiti yaaba ki deli ki ñani ba Geba dogu ki ban pundi hali Geseli dogu.