2 Samueli 4 - Gourmanchéma Bible

¹ Sayula bijua Isi-Boseti n den gbadi ke Abineli kpe Ebiloni po, o gbanu den wudi, i jeje den cuo Isalele yaaba kuli boncianla.

² Isi-Boseti den pia toatieyudanba lie. Yendo den yi Baana, o lielo mo Lekabi. Bi den tie Benjamina buolu yua yua n yi Limoni ki ñani Beeloti dogu yaa bijaba.

³ Bi niba den nua ke Beeloti tie Benjamina buolu yaaba n die yaa dogu. Beeloti yaaba den sani ki gedi Gitayimi ki ban kali, ki baa ye lipo hali dinla.

⁴ Sayula bijua Jonatan den pia o bijua ke o yi Mefiboseti ki tie wabo. Sayula leni Jonatan kuuma laabaalo n den ñani Jisileeli po ki cua, o den pia bina muu. O wubido den taa o ki sani ke o ŋmadi ki baa ki wabi.

⁵ Beeloti yua Limoni bijaba Lekabi leni Baana den gedi Isi-Boseti denpo u yensiinu. O den dua ki fuo mi yensifuodima.

^6-7 Bi den kua li dieli tugu nni nani bi baa taa *ŋalikama yeni, ki sua ke o dua o dieduadili nni. Bi den muu o tugu nni ki kpa o, ki jia o yuli ki taa ki sani. Bi den dua ki cuoni ki poandi u tialu nni.

⁸ Bi den gedini Isi-Boseti yuli Ebiloni dogu, Dafidi kani ki yedi o: «Sayula bijua Isi-Boseti, a yibali nne, wani yua den bua ki ñani a miali. Dinla Li Miali Diedo tuu fini n daano o bado po li panli Sayula leni o puoliŋuani kani.»

⁹ Dafidi den taa Li Miali Diedo yua n faabi o o fala nni yeli ki poli ki yedi Beeloti yua Limoni bijaba Lekabi leni o naataanu Baana: «Hali Li Miali Diedo po!

¹⁰ Yua den cua ki waani nni ke Sayula kpe ki tama ke o puni nni laabaalimano, n den teni ke bi cuo ki kpa o Tisikilagi dogu nni. N den tieni yeni ki teni o o laabaali panpaani.

¹¹ Lanwani bi nibiadiba yaa kua yaa nilo n kaa pia tagili dieli nni ki ku o o duanu po, li baa ga lede ke n kan buali yi o soama? N baa bolini yi mi tinfanma nni.»

¹² Dafidi den teni o toatieba li ñoabonli ke ban kpa Lekabi leni Baana. Bi den kpa ba, ki jia bi nufaadi leni bi taafaadi ki joani ti ki kuu Ebiloni boangu. Bi den taa Isi-Boseti yuli mo ki piini li Ebiloni, Abineli kuli nni.