2 Samueli 3 - Gourmanchéma Bible

¹ Bu toabu den waagi ki ye Sayula niba leni Dafidi yaa niba siiga. Dafidi paalu den pugidi ke Sayula yaa niba mo tadigidi.

Dafidi n mali yaa bila Ebiloni

² Dafidi den mali a bonjala Ebiloni. O bijakpelo den yi Aminoni. O naa den tie Akinoami, Jisileeli dogu yua.

³ O lielo mo den yi Kileyabi, Nabali kpepuoli Abigayili, yua n den ñani Kalimeli dogu, n den mali yua. O taalo mo den yi Abisalomi. O naa den tie Gesuli bado Talimayi bisalo Maaka.

⁴ O naalo den yi Adonija, Hagiti n den mali yua. O muulo den yi Sefatia, Abitali n den mali yua.

⁵ O luobilo Yitileami mo den tie Egila yaa biga. Wani Egila moko den tie Dafidi pua. Bani n tie Dafidi n den ye Ebiloni ki mali yaaba.

Abineli goa ki mangi leni Dafidi

⁶ Sayula niba leni Dafidi yaa niba janjanma nni, Abineli den se Sayula niba puoli ke li pa.

⁷ Li den sua ke Sayula pia ku ponanbangu ke bi yi o Litisipa, Aya bisalo. Isi-Boseti den yedi Abineli: «Be yaa po ke a kua n baa ponanbangu kani?»

⁸ Abineli pali den beni boncianla laa maama po. O den goa ki yedi: «Naani n tie sangbanyule ki tuuni Juda yaaba po? Hali dinla n doagidi ke n bua a baa Sayula diegu leni o kpiiba, leni o danlinba kuli, n moandi min fidi maama kuli ke ŋaa baa Dafidi nuu nni. Ama ke amo tabi nni leni laa pua dinla!

⁹ U Tienu n cuo mini Abineli o cuonbiadu, n yaa tieni Dafidi po Li Miali Diedo n niani o yaala.

¹⁰ Lani n tie ke o den yedi ke o baa fie li bali Sayula diegu yaaba kani ki pugini wani Dafidi bali u paalu wan yaa die Isalele yaaba leni Juda yaaba kuli, ki cili Dana diema bianu, ki yaa caa hali Beli-Seba nepo yaa bianu.»

¹¹ Isi-Boseti ki den tuo ki yedi liba kelima o den jie Abineli.

¹² Li yaa puoli, Abineli den soani a tonda Dafidi kani ban ban yedi o: «Mi diema tie ŋme yaa yaame? Tin tieni u juogu, lanwani n baa teni Isalele yaaba kuli n pegidi ki ŋoadi a.»

¹³ Dafidi den goa ki yedi: «To, n tuo tin juogi. Ama bonyenla bebe, ŋan da ŋmaa n kani ke n pua Mikali, Sayula bisalo, ki ye a liiga.»

¹⁴ Dafidi den soani a tonda Sayula bijua Isi-Boseti kani ki yedi o: «Teni nni n pua Mikali, min den pani yua yaa po Filisiti yaaba punjuodi kobiga ki taa o yeni.»

¹⁵ Isi-Boseti den teni ke bi ban gaa Mikali o calo Layisi bijua Palitieli kani.

¹⁶ O calo den ŋua ki buudi ki pundi hali Bahulimi dogu nni, lankani Abineli den yedi o: «Lebidi ki yaa goa.» O den lebidi.

¹⁷ Li den sua ke Abineli maadi leni Isalele yaaba nikpela. O den yedi ba: «Hali yogu yi den bua Dafidi n tua yi bado.

¹⁸ Yin di dini o mani moala, kelima Li Miali Diedo den maadi o maama ki yedi: ‹N baa taa n naacemo Dafidi yo ki faabi n niba Isalele yaaba Filisiti yaaba leni bi yibalinba kuli nuu nni.› »

¹⁹ Abineli den maadi leni Benjamina buolu yaaba moko. Li yaa puole o den gedi Ebiloni ki baa n waani Dafidi Isalele yaaba leni Benjamina buolu yaaba kuli n jagi yaala.

²⁰ O den pundi Ebiloni, Dafidi kani ki yegi leni jaba piilie. Dafidi den ŋanbi mi jaanjiema Abineli leni yaaba n yegi leni o kuli po.

²¹ Abineli den yedi Dafidi: «N baa fii ki kuni ki ban taani Isalele yaaba kuli ban ŋoadi fini n daano o bado. Bi baa tuo a bali, a baa diedi bikuli nani ŋan bua maama.» Dafidi den cabi Abineli ke o kuni leni mi yanduanma.

Joabi kpa Abineli

²² Dafidi n den cabi Abineli ke li tieni waamu, Joabi leni yaaba n ŋua Dafidi den ñani bu toabu po ki kpeni. Bi den cuani ti fagidi boncianla. Abineli naa go den ye Ebiloni Dafidi kani, kelima wani Dafidi den cabi o ke o kuni leni mi yanduanma.

²³ Joabi leni o toagoli n den pundi, bi den waani Joabi ke Neli bijua Abineli bi cua ki laa o bado ke omo cedi ke o goa ki kuni leni mi yanduanma.

²⁴ Joabi den kua o bado kani ki yedi o: «Ŋan tieni yaala ne mo te? Abineli cua a kani ke amo cedi ke o lebidi ki kuni?

²⁵ A bani Neli bijua Abineli po. Wan cua yeni o bua ki boandi a yo, o bua ki bandi ŋan jagi yaale, ki le ŋan tiendi yaala.»

²⁶ Joabi n den ñani Dafidi kani, o den soani a tonda ke bi ŋoadi ki ban nandi Abineli Sila caali kani. Bi den guani o. Dafidi ki den bani lipo.

²⁷ Abineli n den lebidi ki guani Ebiloni, Joabi den taa o ke bi piadi ki gedi u dogu bilinciamu buliñoabu kani nani o bua ki maadi leni o ŋasiili nni yeni. Lankani o den muu o tugu nni ki kpa o ki tu o waalo Asayeli kuuma panli.

²⁸ Dafidi den ti yuandi ki gbadi yaala n tieni, ki yedi: «Li Miali Diedo bani ke Neli bijua Abineli soama ki jagi n yuli po, bi n diema po.

²⁹ Laa soama n goa ki baa Joabi leni o baa diegu yaaba po. Joabi diegu nni n yaa pia yogunu kuli yua yaa soama n wuliti yaaka yua n pia mi *gbaadima, yaaka yua ñii u gbiamu. Lan da luo jugisiega n pedi ki kpa yua, yaaka mi jiema n poadi yua.»

³⁰ Li den tie yene ke Joabi leni o waalo Abisayi den kpa Abineli kelima o den kpa bi waalo Asayeli bu toabu nni Gabaono po.

³¹ Dafidi den yedi Joabi leni yaa niba n den yegi leni o kuli: «Padi mani yi tiadi, la mani li paboanli tiadi, ki buudi Abineli po.» O bado Dafidi wani oba den cuoni ki ŋua yaaba n tugi mi kuuma kpaku puoli.

³² Bi den piini Abineli Ebiloni. O bado den buudi ki kpaani Abineli kuli yuli po. Bi niba kuli den buudi.

³³ Li yaa puoli Dafidi den yini Abineli po yaa kuyani n tie ne: «Abineli bi baa kpe nani o yanluodaano yeni yo?

³⁴ A nuu ki den luo, a taana ki den ye kpaadi nni Baa yeni a nan baa ki kpe Nani bi nibiadiba n ludi yua yeni.» Bi niba kuli den suagi liiga ki mua Abineli po.

³⁵ Li yaa puoli bi den nagini Dafidi kani ki baa teni o wan je hali ke li daa bii. Ama o bado den poli ki yedi: «U Tienu n cuo nni o cuonbiadu n yaa ŋmani dupen bi ki dini jiemaba kuli ke u yienu daa baa.»

³⁶ Bi niba kuli den gbadi ki saa lipo moamoani nani ban den saagi moamoani ke Dafidi n tiendi yaala kuli ŋani maama.

³⁷ Juda yaaba leni Isalele yaaba kuli den bandi ke Dafidi ka teni ke bi ku Neli bijua Abineli.

³⁸ O bado den yedi o badibaanba: «Yii bani ke badija, yudanciamo n kpe dinla Isalele diema nni?

³⁹ Mini, baa ke bi dini nni li bali, n tadi, Tiseluja bijaba yaa paalu cie n yu. Li Miali Diedo n guani yua n tieni mi biadima o biadima panpaani.»