2 Samueli 24 - Gourmanchéma Bible

¹ Li Miali Diedo pali go den beni leni Isalele yaaba ke o den tigini Dafidi ke wan tieni yaala n baa cuani bipo yaala n bia, ki yedi ke wan coadi Isalele leni Juda yaaba.

² O bado Dafidi den yedi bi toatieba yudaano Joabi yua n den ye o kani: «Gaani Isalele nibuoli kuli niinni i kaani kuli ki cili Dana, yaa dogu n ye jienu ki yaa caa hali Beli-Seba, yaa dogu n ye ganu, ki teni ban coadi bi niba min bandi bi coali n pundi yaa bianu.»

³ Joabi den goa ki yedi o bado: «Li Miali Diedo a Tienu n teni ke bi niba coali n pugini taalima kobiga ke fini n daano n baa ki le ba leni a nuni mo. Ama, be yaa po ke a bua ki coadi ba?»

⁴ Ama o bado den sedi ke se Joabi leni bi toatieba yudanba kuli tieni wan yedi yaala. Lanwani bi den fii o bado kani ki gedi ki baan coadi Isalele yaaba.

⁵ Bi den duodi Judana ki gedi ki cili Aloyeli, Gada dogu joaloangu jienu ki nagi leni Jasela.

⁶ Lanwani bi den gedi Galaadi diema nni leni Takita-Odisa diema nni ki go gedi Dana-Jaana leni Sidoni tinkundogi nni.

⁷ Bi den suagi ki gedi Tili kaanpaalu leni Hefa yaaba leni Kanana yaaba yaa dogi kuli. Bi den juodi leni Beli-Seba, yaa dogu n ye Juda diema ganu po.

⁸ Bi den gaani mi diema nni ki gbeni ŋmaali yia leni dana piilie siiga, ki goa ki kpeni Jelusalema.

⁹ Joabi den waani o bado bi niba coali n pundi maama. Isalele diema nni den pia jaba tudakobinii (800 000) yaaba n pundi ki gedi bu toabu, Juda diema nni mo jaba tudakobimuu (500 000).

U Tienu faligi Dafidi kelima o tagili po

¹⁰ Dafidi tugusoama den sani wan coadi bi niba yeni po. O den yedi Li Miali Diedo: «Min tieni maama ne, n tudi hali boncianla. Moala n mia ŋa ŋan tieni mini a yonbo po sugili kelima n tieni nani o yanluodaano yene.»

^11-12 U Tienu den maadi leni o sawalipualo Gada, yua n den soagindi Dafidi po U Tienu maama, ki yedi o: «Gedi ki ban waani Dafidi ke mini Li Miali Diedo yedi mine: ‹N bili apo falacianbuoli taa, gandi bi siiga nni yendo.› » Lan den fii ki faa ke Dafidi fii,

¹³ Gada den gedi o kani ki caa o U Tienu tondu ki yedi: «A bua mi koma n tieni a diema nni bina lele bi, bi a yibalinba n yaa deli ŋa ŋmaali taa, bi u yianbiadipuodiko yo n baa a diema nni dana taa? Ŋan kpaagikpaagi ki waani nni min baa guani yua n soani nni yaala.»

¹⁴ Dafidi den goa ki yedi Gada: «N ye paboancianli nni. N yaa baa Li Miali Diedo yaa nuu nni li cie kelima o niñingbadima yaba. Ama min da baa bi nisaaliba yaa nuu nni wani.»

¹⁵ Lanwani Li Miali Diedo den luni Isalele diema yaaba u yianbiadipuodiko. U den cili ku tiŋaagu ki pundi hali wan den bili yaa yogunu. Ki cili Dana, jienu po yaa dogu, ki yaa caa hali Beli-Seba, ganu po yaa dogu, niba tudapiilele (70 000) den kpe.

¹⁶ Maleki n den tandi o nuu ki baa bolini Jelusalema, Li Miali Diedo yama den lebidi ke o jagi ke o kan go pugini laa biadima. O den yedi yaa maleki n bolindi bi niba yeni: «Li dagidi, jiini a nuu.» Li Miali Diedo maleki den ye Jebusa yua Alafina jalu kani.

¹⁷ Dafidi n den laa maleki ke o lu bi niba u yianbiadu, o den yedi Li Miali Diedo: «Diidi ki le, n tudi! Mini n tieni ti *tuonbiadi. Yaa niba n tie ne naa tieni liba kuli. N mia ŋa, a nuu n cuo mini leni n baadiegu yaaba.»

Dafidi maa li padibinbinli Li Miali Diedo po

¹⁸ Laa daali Gada go den cua Dafidi kani ki yedi o: «Ŋan gedi ki ban maa li *padibinbinli Li Miali Diedo po Jebusa yua Alafina jalu nni.»

¹⁹ Dafidi den tieni Li Miali Diedo ñoabonli ki gedi nani Gada n den yedi o maama.

²⁰ Alafina n den nuali ki laa ke o bado leni o badibaanba nagidi o deni, o den ñani ki labini ki pugi o bado,

²¹ ki yedi o: «Be yaa po ke fini n daano cua mini a naacemo kani?» Dafidi den goa ki yedi o: «Li tie kelima n bua ki da a jalu ki maa li padibinbinli Li Miali Diedo po ke u yianbiadipuodiko n sedi ki da go puodi bi niba.»

²² Alafina den yedi Dafidi: «Ŋan taa u jalu ki padi ŋan bua ki padi yaa pada kuli. N ne yaaba n tie ne n tua a padiyandi, teliti leni ti dadoalikaadi mo n tua ti daadi li *padijuukaali po.

²³ N puni a likuli. Li Miali Diedo a Tienu n ga a miabu ki mangi apo o nunga.»

²⁴ Ama o bado den yedi Alafina: «A-a, n bua ki da likuli ki pa ŋa li ligi. N kan pa Li Miali Diedo n Tienu min ki biani yaa pada po liba.» Lanwani Dafidi den da u jalu leni i ne ki teni ŋanjilifa kujapiena piimuu.

²⁵ Dafidi den maa li padibinbinli lankani Li Miali Diedo po ki padi opo a padijuukaana leni mi taanyenma pada. Lanwani U Tienu pali den jiidi mi diema po ke u yianbiadipuodiko sedi ki ñani Isalele yaaba siiga.