2 Samueli 23 - Gourmanchéma Bible

¹ Diidi Dafidi n den maadi yaa majuodikaama. «*Isayi bijua Dafidi o niciamo, Jakobo Tienu n den gandi yua Isalele yaaba n bua yaa yanyanlo mayedikaama.

² Li Miali Diedo U Tienu Fuoma maadi ke n soagini, O maama ye n ñoabu nni.

³ Isalele Tienu maadi, Wani Isalele yaaba tanciangu yedi nni mine: ‹Yua n die bi niba leni mi *teginma, Yua n die leni U Tienu fangili

⁴ Naani leni mi tiŋaayenma, u yienu yaa pudi ke tawadi ki ye, Yaa yienu yaa kpadima n teni ke ti muadi pudi ki taaga yaa mini.›

⁵ N diegu yaaba po li tie yene U Tienu nintuali. Kelima o kuani o *ŋantaado leni nni yaa yogunu kuli po, Yaa ŋantaado n bogini ki ŋani cain ki kan lebidi, Ki kan bodi mo. U Tienu teni ke n paadi lan tie yaala kuli nni, O tiendi min bua yaala kuli,

⁶ Ama yaaba n yie U Tienu kuli naani leni ban lu yaa konkoni. Oba kan muubi leni o nii.

⁷ Yua n bua ki cuo yi kuli se wan taa bonliba yo ki cuo yi, Ki juu yi yin ye naani.»

Dafidi jakoanda

⁸ Dafidi jakoanda yaaba n den koani mi jama ki cie yela n tie ne, Takemoni yua Josebi-Basebeti n den tie bi jakoanditaadiba yudaano. Wani n den taa o kpaanli ki kpa niba kobinii yenma.

⁹ O yaa puoli Ahohi yaabili Eleyasala, Dodo bijua. Wani leni jakoanditoaba bonba lie den yegi leni Dafidi ki baa tuogi leni Filisiti yaaba, ban den taani bu toabu po ke Isalele yaaba tiini ki do a juana,

¹⁰ wani Eleyasala den fii ki pe ki kpaani Filisiti yaaba hali ke o nuu den coagi ki kan go tuo ki poaliti ki ŋa o jugisiega. Li Miali Diedo den puni Isalele yaaba mi faabicianma laa daali. Bi toatieba den goa ki cua Eleyasala kani ki baa fagi yaaba n kpekpe bebe.

¹¹ O yaa puoli Adada yua Age bijua Sama. Filisiti yaaba den taani Leki kani. U kuanu den ye likani ke yaa tuubuolu n yi lantiyi gbie lienni. Isalele toatieba den laa Filisiti yaaba ki sani.

¹² Sama den sedi u kuanu yeni siiga ki guudi u, ki paadi Filisiti yaaba. Li Miali Diedo go den puni Isalele yaaba mi faabicianma.

¹³ U jetaagu yogunu, yaa goli n yi “Niba piitaa” siiga yudanba taa den cua Adulama dogu yaa tanlongu nni, Dafidi kani, Filisiti yaaba toagoli den ye Lefayima yaaba joaloangu nni.

¹⁴ Dafidi den ye u wuonkaanpaalu nni, ke Filisiti yaaba toagoli yenli ye Betelema.

¹⁵ Dafidi yama den baa li bonla nni ke o yedi: «Ŋme baa pa nni ban gbiidi yaa buogu Betelema buliñoabu kani ñima yeni min ño?»

¹⁶ Lanwani bi jakoanditaadiba yeni den poandi Filisiti yaaba toagoli nni ki ban ñani mi ñima ban gbiidi yaa buogu Betelema buliñoabu kani yeni ki goa ki teni Dafidi. Ama o den yie ke o kan ño, ki wuli ma Li Miali Diedo nintuali

¹⁷ ki yedi: «Li Miali Diedo, mii pia sanu ki ño mi naa ñima, kelima mi tie nani yaaba n luni bi miana ki gedi ki ban kabidi ma yeni yaa soama.» Lani yaa po o den yie ke o kan ño ma. Lani n tie laa jakoanditaadiba n den koani yaa jama.

¹⁸ Joabi naataanu Abisayi, Tiseluja bijua den tugi bi nitaadiba yeni yuli. Wani n den yua o kpaanli niba kobitaa po ki ku ba. O yeli mo den ñani bi nitaadiba yeni siiga.

¹⁹ O den tie niba piitaa goli yeni niinni yaaba yaa yela n ñani ki cie siiga yendo. O den tugi bi yuli, ama waa den pundi bi nitaadikpiaba.

²⁰ Yeoyada bijua Benaya den tie jakoandimoano yaa yaabili, yua n den bili jama boncianla, ki tie Kabitiseeli domaabiga. Wani n den pua ki paadi Moabi jakoanda niba lie yaaba n den yi Alieli bi kuli. Wani n go den jiidi ku cakpenkpeeku nni ki ku o yangbanlo ti waciandi nni

²¹ Wani n go den kpa Ejipiti yua ke o tie niciangu ki kubi li kpaanli. O den tuogi leni o leni gbiamu ki fie o kpaanli ki kpa o leni lini.

²² Lani n tie Yeoyada bijua Benaya n den koani yaa jama. Jakoanda piitaa goli yeni niinni o yeli den ñani.

²³ O den tie “Niba piitaa” goli yeni niinni yaaba yaa yela n ñani ki cie siiga yendo. Ama waa den pundi bi nitaadikpiaba. Dafidi den teni ke o tua o guudikaaba yudaano.

²⁴ Niba piitaa goli yeni niinni go den pia yaa niba n tie ne: Joabi naataanu Asayeli, leni Betelema yua Dodo bijua Elikana,

²⁵ leni Alodi dogu yaaba Sama leni Elika,

²⁶ leni Peleti yua Eletisa, leni Tekoa dogu yua Ikesi bijua Ila,

²⁷ leni Anatoti dogu yua Abieseli, leni Husa yua Mebunnayi,

²⁸ leni Akoa yua Tisalimoni, leni Netofa yaaba Mahalayi

²⁹ leni Baana bijua Elebi, leni Benjamina buolu yaaba dogu Gibeya yua Libayi yaa bijua Itayi,

³⁰ leni Pilatoni yua Benaya, leni Nahale-Gaasi yua Idayi,

³¹ leni Alaba yua Abi-Aliboni, leni Bahalumi yua Asimafeti,

³² leni Saaliboni yua Eliabi, Bene-Jaseni bijua, leni Jonatan,

³³ leni Asadadi yua Sama, leni Alali yua Sadadi bijua Ahiyami,

³⁴ leni Maaka yua yaa yaabili Elifeleti, Ahasibayi bijua, leni Gilo yua Ahitofeli bijua Eliami,

³⁵ leni Kalimeli yua Etisidayi, leni Alabi yua Paadayi,

³⁶ leni Tisoba yua Natan bijua Jigeali, leni Gada yua Bani,

³⁷ leni Amoni buolu yua Tiseleki, leni Beloti yua Nahalayi, yua n den tugi Tiseluja bijua Joabi toatiadi,

³⁸ leni Yeteli yaaba Ila leni Galebi,

³⁹ leni Heta yua Uli. Bikuli den taani ki tie piitaa n bilele.