2 Samueli 22 - Gourmanchéma Bible

¹ Dafidi den yini yaa yanbu n tie ne ki jaandi Li Miali Diedo. Li Miali Diedo n den faabi o o yibalinba leni Sayula nuu nne ke wani Dafidi den maadi laa maama.

² O den yedi: «Li Miali Diedo tie n tangu, N wuonkaanpaalu leni n gaaka,

³ U Tienu tie n tangu, Min sani ki baa yua yaa po, N gbankoandigu leni yaa fidu n gaani nni, N gaakaanmoanu, n kaanpaalu, N Candaano, a ga nni bi nibiadiba nuu nni.

⁴ N kpaani ki yedi: ‹Li Miali Diedo yeli n baa ti pagidi, O faabi nni leni n yibalinba.

⁵ Mi kuuma ñingola den lindi ki cebini nni, Mi bolinma kpeni den jiendi nni.

⁶ Bi tinkpiba diema baabi den gaani ki lindi nni. Mi kuuma taali den dia ki bili n nintuali.

⁷ N paboanli nni n den jaandi ki mia Li Miali Diedo todima, N den mia n Tienu Hali o badidiegu nni O cengi npo n miabu bonŋanla.›

⁸ Lane ki tinga den begibi ki digibi, Tanpoli tanpuuna den begibi, Likuli den begibi kelima U Tienu pali den beni.

⁹ I muñii den ña o miaboni nni, Yaa fantama n bolindi den ña o ñoabu nni. A mukuanmoana moko den ña lienni.

¹⁰ O den kpegini tanpoli ki jiidi, Ke yaa tawaligu n biigi mo ye o taana po.

¹¹ O den jagi *selubani po ki yugi, O den jagi u faalu fiabi po ki doagidi o yuli.

¹² O den teni ke li *biigili tua nani li gbandieli yeni ki lindi o, Yaa tayinu n gbie mi ñima ki kpiagi ki go boani den lindi ki cebini o.

¹³ Mi yenma den yendi o liiga, Ke a mukuanmoana pudi ki yadi mi niinni.

¹⁴ Li Miali Diedo den tiani hali tanpoli po, Wani tanpoli badiciamo den kpedi o nialu.

¹⁵ O den toani i piemi ki yadi n yibalinba, O den teni ke mi tañigima deli ba.

¹⁶ Kelima Li Miali Diedo fuugu po Leni yaa fawaama n ña o miani nni, Teni ke ki kpennunga den ñiidi, Ke ŋanduna tanpuuna moko den doagidi.

¹⁷ Hali tanpoli po, o den tandi o nuu ki cuo nni. Ki ñani nni mi ñincianma nni.

¹⁸ O faabi nni leni n yibali yua pia u paalu Leni n nanda yaaba n pa ki cie nni yaa kani.

¹⁹ Bi den ludi nni n paboanli daali, Ama Li Miali Diedo den tua n todika.

²⁰ O den ñani nni li mabinli nni ki teni ke n diedi n yuli. O den faabi nni kelima o bua nni.

²¹ Li Miali Diedo tieni npo nani min tiegi maama, Nani n nii n ki pia biadima maama.

²² Kelima n cuoni Li Miali Diedo sani nni ke li tiegi, Mii ŋoadi mi biadima ki foagidi leni n Tienu.

²³ N kubi o ñoabona, Mii piani ki ŋaa o *balimaama mo.

²⁴ N pali den pieni leni o, N kubi n yuli kaa kua tudima nni.

²⁵ Li Miali Diedo mo guani nni nani min tiegi maama, Nani wan nua ke mii pia tagili maama.

²⁶ A tiegi yua n tiegi po. A tie papiendaano yua yaa pali n pieni po.

²⁷ A ŋani cain yua n ŋani po. Bi nibiadiba po, a baa waani ba ke a fani ki cie ba.

²⁸ A faabidi bi niñinniba, Ama a noanli bi japaadanba ki jiini ba.

²⁹ Li Miali Diedo, a tie npo yenma, Yende, fini Li Miali Diedo yendi npo n biigili.

³⁰ Fini n ye leni nni ke n yen fidi ki deli li toagoli. N Tienu n ye leni nni ke n yen fidi Ki yugi ki kandi u dogu bilinu.

³¹ U Tienu sani ŋani ki dagidi cain. Li Miali Diedo maama mo tie moamoani. O tie gbankoandigu yaaba n sani ki baa opo kuli po.

³² Ŋme n tie U Tienu, li yaa tie Li Miali Diedo yaaka? Ŋme n tie ti Tanciangu, li yaa tie ti Tienu yaaka?

³³ U Tienu tie n wuonkaanpaalu, Wani n ŋanbidi npo n sanu.

³⁴ O teni ke n taana yua nani o pialo yaa yeni, Ki teni ke n se yaa kaani n kpedi po.

³⁵ O bangi nni bu toabu, Ki teni ke n nii fidi ki dia ti kumoandi dabanli.

³⁶ A gbankoandigu tie n *faabima. N tua niciamo kelima a *ŋanbili po.

³⁷ A saagi n taana li cenli po, A teni ke mii cii ki tudi mo.

³⁸ N ŋoadi ki deli n yibalinba hali ki bolindi ba, N kan lebidi ki guani kaa bolini ba.

³⁹ N pe ki lu ba, ki kpaani ba, baa go fiidi. Bi baali ke n ŋmaadi ba.

⁴⁰ A puuni nni u fidu bu toabu po, A teni ke n paadi n koanginkaaba.

⁴¹ A teni ke n laa n yibalinba puoli. N baa bolini yaaba n nani nni mo.

⁴² Bi gbagidi ki diidi, ama faabika naa ye. Bi kpaani ki miadi Li Miali Diedo, Waa guandi ba liba.

⁴³ N pua ki lendi ba nani ku faagu n lendi yaa tangbangu yeni, N mudi ba, n ŋmaadi ba nani i sani nni moamoadi yeni.

⁴⁴ A faabi nni leni n niba janjanma, A kubi nni ke n tua i nilanbuoli bado, Min kaa den bani yaa nibuolu tua n yonbi.

⁴⁵ Bi nilanba duondi nni, N yaa yedi yaala, bi tuodi lane.

⁴⁶ Bi nilanba gbanu wudi Ke bi ña bi wuonkaanpaali nni ki digibi.

⁴⁷ Li Miali Diedo n yaa ye ki fo, Wani n Tanciangu n baa ti kpiagidi! U Tienu yua n tie n faabima Tanciangu n baa ti pagidi!

⁴⁸ Wani U Tienu yua n tuugi npo li panli, Ki tendi ke n diedi i nilanbuoli.

⁴⁹ Wani n gaani nni n yibalinba kani, A teni ke n cie n koanginkaaba. A faabidi nni ku tugumoangu daano nuu nni.

⁵⁰ Li Miali Diedo, lani n teni Ke n baa pagi a i nibuoli kuli siiga, N baa yiini ki kpiagi a yeli.

⁵¹ O puuni wan gandi yaa bado mi faabicianma. O tiendi wan gandi yua mi ŋanma, Wani Dafidi leni o puoliŋuani po hali yaa yogu n tu yaa yogu.»