2 Samueli 21 - Gourmanchéma Bible

¹ Dafidi n den tie bado yaa yogunu, mi koma den tieni ki waagi hali bina taa. Dafidi den mia Li Miali Diedo ki buali o lan tie yaala. Li Miali Diedo den goa ki yedi: «Li tie kelima Sayula leni o diegu kukpama po yo ke mi koma tieni, li tie kelima Sayula kpa Gabaono yaaba.»

² O bado Dafidi den yini Gabaono yaaba ki baa maadi leni ba. To, Gabaono yaaba yeni ki den tie Isalele yaaba ka. Bi den tie Amola yaaba yaaba n sieni ke Isalele yaaba den niani ba ke bi kan sii ba. Ama Sayula n den pia yaa yankuali Isalele leni Juda yaaba po den teni ke o moandi ke o baa bolini ba.

³ Dafidi den buali ba: «N baa tieni yipo be? N baa tieni lede ki ŋanbi ban biidi yipo yaala yin gaali Li Miali Diedo niba?»

⁴ Gabaono yaaba den goa ki yedi o: «Ligi bi wula ka baa fidi ki goa ki ŋanbi yaala n ye tinba leni Sayula leni o diegu yaaba siiga. Tinba mo ka baa kpa o nilo Isalele nni.» Lanwani o bado den yedi: «Yi nan bua min tieni yipo be yo?»

⁵ Bi den goa ki yedi o: «Sayula den jagi wan bolini ti cain ki da ŋa baa yendo leni miali Isalele nni.

⁶ Lani yaa po ban teni ti jaba lele o bila siiga, ti baa joani ba ki soadi ba U Tienu nintuali, wani Li Miali Diedo n den gandi yaa bado Sayula dogu Gibeya niinni.» O bado den yedi: «N baa teni yi ba.»

⁷ O bado Dafidi den cedi Sayula yaabili Mefiboseti, Jonatan bijua, kelima Dafidi leni Jonatan n den loli yaa danligu Li Miali Diedo nintuali yaa po.

⁸ Ama o den taa Aya bisalo Litisipa n den mali Sayula po yaa bonjalieda, Alimoni leni Mefiboseti, leni Sayula bisalo Mikali n den mali yaa bonjamuuda Balisilayi bijua Meola yua Adilieli po.

⁹ O den taa ba ki teni Gabaono yaaba. Bi den joani ba ki soadi ba Li Miali Diedo nintuali li juali po. Bani niba lele yeni kuli den taani ki kpe yenma. Bi den kpa ba u jetaagu cilima, ban cili ki ce *olije yaa yogunu.

¹⁰ Aya bisalo Litisipa, Sayula kpepuoli den taa li paboanli tiagu ki ladi ku tangu po ki ye likani u jetaagu cilima ki yaa caa hali ki taaga n ban baa bi tinkpiba yeni po. U yensiinu o den deli ti bonyugiditi ban da nagini a kpiema yeni, ku ñiagu mo o den deli ti fuayandi.

¹¹ Bi den waani Dafidi Litisipa n tieni yaala.

¹² Li den sua ke Filisiti yaaba n den tuogi leni Sayula Giliboa ki paadi o ki kpa o, bi den taa wani leni o bijua Jonatan kpiema ki joani ba Beti-Sani kani. Jabesi yaaba den taa a kpiema yeni ki gedini Galaadi diema nni. Dafidi den gedi ki ban taa Sayula leni Jonatan kpaba Jabesi yaaba kani.

¹³ O den taa likani Sayula leni o bijua Jonatan kpaba. Bi go den taantaani ban den joani bi nileleediba yaaba ki soadi ba yeni moko yaa kpaba.

¹⁴ Bi den piini Sayula leni o bijua Jonatan kpaba Sayula baa Kisi kuli nni Tisela dogu nni yu n ye Benjamina tinga nni. Bi niba den tieni o bado Dafidi n yedi ba yaala kuli. Lanwani U Tienu pali den goa ki jiidi mi diema po.

Mi janjanma leni Filisiti yaaba

¹⁵ Filisiti yaaba go den tuogi bu toabu leni Isalele yaaba. Dafidi leni o toatieba den gedi ki tuogi leni ba. Dafidi den coagi.

¹⁶ Lafa yaabili Jisibi-Benobi den jagi ke o baa kpa Dafidi. O den pia yaa kpaanli yaa kpiagu n cie kilo bonba taa ki tie kumoandi, ki ñaagi jugisiepanga.

¹⁷ Tiseluja bijua Abisayi den cua ki todi Dafidi ki pua ki kpa Filisiti yua yeni. Lanwani Dafidi toatieba den poli ki yedi o: «A kan go ña ki yegi leni ti ki gedi toabu, ŋan da ti teni ban bolini li bali Isalele nni.»

¹⁸ Li yaa puoli bu toabu go den fii Gobi dogu nni leni Filisiti yaaba. Laa toabu nni Usa yua Sibekayi den kpa Lafa yaabili Safi.

¹⁹ Toabu go den fii leni Filisiti yaaba Gobi yeni go. Betelema yua Jaale-Olegimi bijua Elanana den kpa Gati yua Goliati, yua yaa kpandaagu n den gbengi nani ku lugididaagu yeni.

²⁰ Mi janjanma go den goa tieni Gati dogu nni. Yibalinba siiga den pia toatieyendo ke o yaba boncianla ki pia nubila luoba luoba, leni taajenbila luobaluoba. Likuli den taani ki tie piilie n bona naa. O moko den tie Lafa buolu yua.

²¹ O den tiani ki sugi Isalele yaaba. Lane Dafidi naataanjaga Simea bijua Jonatan den ku o.

²² Lanwani Dafidi leni o naacenba den ku bani Filisiti yaaba toatienaadiba yeni. Bikuli den tie Gati yua Lafa yaa yaabila.