2 Samueli 20 - Gourmanchéma Bible

¹ O ja den ye Giligali yeni ki tie nibiado. O den tie Benjamina buolu yua Bikili yaa bijua. O den yi Seba. O den piebi kakaci ki kpaani ki yedi: «Tii pia ŋantaadoba kuli leni Dafidi. Ti baga ki ye leni wani *Isayi bijua, Isalele yaaba, yua kuli n yaa kuni o denpo!»

² Lanwani Isalele yaaba den yadi ki ŋa Dafidi, ki ŋoadi Bikili bijua Seba. Ama Juda yaaba wani den sedi leni Dafidi. Bi den ciani o ke o ñani Judana ki gedi hali Jelusalema.

³ Dafidi den pundi Jelusalema ki kua o deni. O den teni ke bi taa wan den ŋa o ponanbandi piiga, yaaba n den guu o diegu yeni, ki kuani ba ban baa yaa guu ba naankani. O den kubi ba bonŋanla ama waa den taani leni ba. Bi den ye nani a kpepuona yene. Bi den lo hali bi kuuma.

Joabi kpa Amasa

⁴ O bado den yedi Amasa: «Ŋan yini ki taani Juda yaaba minteela kuli. Ne leni dana taa kuli ŋan yaa ye ne.»

⁵ Amasa den gedi ki baan yini ki taani Juda yaaba. Ama o den waagi ki pendi o bado n bili o yaa daali.

⁶ Lanwani Dafidi den yedi Abisayi: «Moala Bikili bijua Seba baa biagi tipo ki cie Abisalomi. Ŋan taa n yaa minteela ki ŋoadi o ke wan da ti ban baa wan kua ki wuoni yaa dopaali nni ki bodi ti.»

⁷ Lane Abisayi den fii ki gedi, wani leni Joabi yaa minteela, leni Keleta diema yaaba, leni Peleti diema yaaba, leni a jakoanda kuli. Bi den ñani Jelusalema ki ŋoadi Bikili bijua Seba.

⁸ Ban den pundi Gabaono tancianli kani bi den tuogi leni Amasa. Joabi den yie ki jugisiega ki ñagini o ciaga. Wani Joabi n den cuoni ki nagidi, ki jugisiega yeni den noadi ki baa.

⁹ Joabi den yedi Amasa: «A paa, n kpiilo?» O den tandi o nijienu ki cuo Amasa langbiadi ki baa muadi o.

¹⁰ Amasa ki den faami wan buani ki taa yaa jugisiega ki muubi ga o ganu po. Joabi den muu o tugu nni. Amasa nuadi den ñani ki wudi tiipo. O den kpe baa ke Joabi ki den pugini mi liema. Joabi leni o naataanu Abisayi den suagi liiga ki ŋua Bikili bijua Seba.

Seba n den fiini yaa yiema baa u bianu

¹¹ Joabi minteela siiga yendo den sedi Amasa n kpe ki dua naani ki yieni: «Yaaba n tie Joabi danlinba leni yaaba n taa Dafidi po n yaa ŋua Joabi!»

¹² Amasa o tinkpilo den paagi mi soama nni u sanu siiga. Li minteeli yeni n den laa ke yua n pundi likani kuli yen sedi, o den fuli Amasa ki ñani u sanu nni ki luni u kuanu nni ki taa bu kpalibu ki maani opo.

¹³ Wan den tieni yeni, bi niba kuli den jigidi ki ŋoadi Joabi ki lingi Bikili bijua Seba.

¹⁴ O den poandi Isalele buoli yaaba kuli siiga ki ban pundi Abela-Beti-Maaka dogu nni. Belima yaaba kuli den taani ki ŋoadi o.

¹⁵ Joabi leni yaaba n den ŋua o kuli den gedi ki lindi ki cebini Abela-Beti-Maaka yeni ke Seba ye lienni. Bi den dogini li tanbinbinli ki ban pundi hali u dogu yeni bilinpaalu kani. Li yaa puoli bi den pe u bilinu ki bua ki lu u.

¹⁶ O ponunfandaano den tiani u dogu yeni niinni ki yedi: «Cengi mani, cengi mani! Yedi mani Joabi n cua nekanba ne, n bua ki maadi leni o!»

¹⁷ Joabi den nagini. O pua yeni den buali o: «Fini n tie Joabi?» Joabi den goa ki yedi: «Mine.» O pua den yedi o: «N mia ŋa ŋan cengi min baa yedi yaala.» Joabi den yedi: «N cengi.»

¹⁸ O den yedi: «Yogunuba bi den maani ki yedi: ‹Gedi ki ban buu Abela-Beti-Maaka po, mi maama baa dagini.›

¹⁹ Ti dogu ne tie Isalele kuli nni yaa dogu n bua mi yanduanma leni yu n tuo ki ŋua li bali ki cie siiga yendu. Ama amo bua ki bolini laa dogu, wuni yu n tie Isalele dociami siiga docianyendu! Be yaa po ke a baa bolini Li Miali Diedo n die yaala?»

²⁰ Joabi den goa ki yedi: «Kalam! Mii pia yaa yantiali n baa bolini bi ki mudi liba!

²¹ Laa tie yeni ka ba. Efilayima juana po yaa nilo, yua n yi Seba ki tie Bikili bijua n fiini o bado Dafidi po mi yiema. Yin taa o mani ki teni ti, wani o bebe, lanwani ti baa fuadi ki cedi yi dogu.» O pua yeni den yedi Joabi: «To, ti baa lugidi o yuli ki kandi u bilinu ki teni a.»

²² O pua yeni den guani u dogu yaaba yaaba n sieni po ki waani ba wan jagi yaa yanfojagili. Lane bi den jia Seba yuli ki kandi ki luni ki teni Joabi. Wani Joabi den piebi kakaci. A minteela kuli den yadi ki ŋa u dogu yeni ke yua kuli kuni o denpo. Joabi den lebidi ki guani Jelusalema o bado po.

Dafidi paatiecianba yela

²³ Joabi den tie bi guudikaaba yudaano. Yeoyada bijua Benaya den tugi Keleta leni Peleti yaaba yuli.

²⁴ Adolami den die li lubili yaa maama. Ahiludi bijua Josafati den tie o bado soagindo.

²⁵ Seja den kubi a tila tuonli. Tisadoki leni Abiata den tie bi kopadicianba.

²⁶ Jayili yaabili Ila mo den tie Dafidi todika.