2 Samueli 2 - Gourmanchéma Bible

¹ Laa bonla kuli n den tieni ki pendi, Dafidi den buali Li Miali Diedo ki yedi: «Min gedi ki ban kua Juda diema dogi doyendu nni bi?» Li Miali Diedo den goa ki yedi o: «Gedi.» Dafidi den yedi: «Min gedi u laa dogu?» Li Miali Diedo den goa ki yedi o: «Ebiloni.»

² Lanwani Dafidi den gedi lipo leni o poliediba, Akinoami, Jisileeli dogu yua, leni Nabali kpepuoli Abigayili, Kalimeli dogu yua.

³ Dafidi den gedini yaa niba n ye leni o moko, yua kuli leni o diegu yaaba. Bi den ban kakali Ebiloni tinkundogi nni.

⁴ Juda yaaba den cua likani ki dini Dafidi li bali ke o tua Juda buolu yaaba bado. Bi niba den waani Dafidi ke yaa cagili n ye Galaadi nni yaa Jabesi yaaba n den piini Sayula.

⁵ Dafidi den soani a tonda Jabesi yaaba kani ki yedi: «Li Miali Diedo n seligi yi leni yin doagidi ki waani yi buama yi daano Sayula po, ki piini o.

⁶ Li Miali Diedo n ŋanbi yimo yaa po ki gbadi yipo mi niñima. N moko baa ŋanbi yipo leni yin tieni yeni.

⁷ Moala yin paagi yiba ki yaa tie papaadanba. Yi daano Sayula kpe, Juda yaaba mo dini mine li bali ke min yaa die ba.»

Isi-Boseti tua Isalele diema bado

⁸ Neli bijua Abineli, yua den tie Sayula toatieba yudaano, den taa Sayula bijua Isi-Boseti ki gedini o Mahanayima dogu po.

⁹ O den dini o li bali ke o diedi Galaadi leni Asula, leni Jisileeli, leni Efilayima, leni Benjamina, muni Isalele tinmu kuli.

¹⁰ Sayula bijua Isi-Boseti den pia bina piinaa wan tua Isalele diema bado yaa yogunu. O den tieni li bali nni bina lie. Juda buolu yaaba bebe n den tuo ke Dafidi die ba.

¹¹ Dafidi n den kaa Ebiloni ki die Juda buolu yaaba yaa bina banlu den tie bina lele leni boagidima.

Juda tuogi leni Isalele bu toabu Gabaono nni

¹² Neli bijua Abineli leni Sayula bijua Isi-Boseti toatieba den ñani Mahanayima ki teli Gabaono dogu.

¹³ Tiseluja bijua Joabi leni Dafidi yaa toatieba moko den fii ki taa u sanu. Bi den tuogi Gabaono boangu kani. Bine den sedi nepo yaa jaali, bine mo nepo yaa jaali.

¹⁴ Abineli den yedi Joabi: «Bi jawaaba n fii ki tuogi ki pua biyaba ti nintuali.» Joabi den yedi: «Ban fii naa!»

¹⁵ Bi den fii. Benjamina buolu yaaba, bani yaaba n taa Sayula bijua Isi-Boseti po yeni, piiga n niba lie den caadi ki sedi, Dafidi yaa niba yaa po mo piiga n niba lie.

¹⁶ Toatielo kuli den cuo o yibali yuli ki muu o loga nni ki jugisiega ke bikuli den taani ki baa ki kpe. Laa kaanu den nagi Gabaono. Bi den yini likani Elikati-Atisudimi.

¹⁷ Laa daali bu toabu den bia hali ki bia. Dafidi toatieba den paadi Abineli leni o yaa toatieba.

¹⁸ Tiseluja bijataadiba Joabi leni Abisayi leni Asayeli den ye likani. Asayeli gbanu den yua ke o pa mi nuama nani o pialo yeni.

¹⁹ O den ŋua ki deli Abineli kaa jadi jienu bi ganu.

²⁰ Abineli den gbegi ki diidi o puoli ki yedi: «Fini Asayeli ko liga yoo?» O den goa ki yedi: «Mm, mine!»

²¹ Abineli den yedi o: «Jadi jienu po bi ganu po ki cuo bi jawaaba yaa siiga yendo ki fie wan pia yaala.» Ama Asayeli den yie ke o kan ŋuadi o puoli.

²² Abineli go den yedi Asayeli: «Ŋuadi n puoli ke min da ti pua ki kpa ŋa. N yaa pua ki kpa ŋa n baa noanli a naataanu Joabi lede?»

²³ Asayeli den yie ke o kan ŋuadi. Lanwani Abineli den muu o tugu nni o kpanmuli. Li kpaanli den ban ñani o puoli po ke o baa ki kpe lankani. Yaaba n den pundi Asayeli n baa ki kpe naani kuli den yen sedi.

²⁴ Joabi leni Abisayi den ŋoadi ki deli Abineli. U yienu n kua yaa yogunu bi den pundi Ama joabiga kani ki ye Giya dogu nni, Gabaono fanpienma sanu nni.

²⁵ Benjamina bijua den cua Abineli kani ke bikuli taani ki sedi joabiyenga yuli po.

²⁶ Abineli den yini Joabi ki yedi: «Ti baa suagi ki yaa bolindi tiyaba leni mu jugisiemu yoo? Ŋaa bani ke li baan juodi leni paboanli? U laa yogune a baa yedi a toatieba n cedi ki da go ŋua ki deli bi kpiiba?»

²⁷ Joabi den goa ki yedi: «Hali U Tienu po, a yaa bi yedi liba n toatieba kan bi sedi hali lan baa n faa.»

²⁸ Lanwani Joabi den piebi kakaci ke bi toatieba kuli sedi. Baa go den deli Isalele yaaba, baa go den suagi ki pua biyaba.

²⁹ Abineli leni o toatieba den dua ki cuoni u tialu nni. Bi den duodi Judana kpenu ki poandi Bitiloni kukuli nni ki ban pundi Mahanayima.

³⁰ Joabi den cedi kaa go deli Abineli, ki guani ki taani o toatieba kuli. Bi den sua ke Dafidi toatieba siiga piiga n niba yia n poadi ki pugidi Asayeli po.

³¹ Ama bani Dafidi toatieba den kpa niba kobitaa n piiluoba Abineli leni Benjamina buolu yaaba yaa toatieba siiga.

³² Bi den taa Asayeli ki ban piini o Betelema o baa kuli nni. Joabi leni o toatieba den dua ki cuoni, ki ban pundi Ebiloni u yienu n pudi yaa yogunu.