2 Samueli 19 - Gourmanchéma Bible

¹ Lanwani li paboanli den cuo o bado. O den doni yaa dieli n den ye u dogu bilinciamu buliñoabu yuli po ki buudi. O den cuoni ki yieni: «N bijua Abisalomi, n bijua Abisalomi. N sugini n yaa bi ga a kaanu ki kpe. Abisalomi, n bijua, n bijua.»

² Bi den waani Joabi ki yedi o: «Diidi ki le, o bado pali biidi ke o buudi kelima Abisalomi po.»

³ Laa daali yaa paadima yaa pamanli den lebidi ki tua paboanli bi niba kuli po kelima bi den gba ke bi tua: «O bado pali biidi kelima o bijua kuuma po.»

⁴ Laa daali bi toatieba den loanbi ki kua u dogu nni nani ban paadi yaaba bu toabu nni ke i fe kubi ba yeni.

⁵ O bado den pini o nunga ki buudi ki kpaani ki tua: «N bijua Abisalomi, Abisalomi, n bijua, n bijua.»

⁶ Lane Joabi den kua o bado dieli nni ki yedi o: «Dinla a fiagi a naacenba kuli, bani yaaba n ga a miali dinla, leni a bijaba leni a bisiaba yaa miana, leni a puoba leni a ponanbandi yaa miana kuli.

⁷ A bua yaaba n nani a yo ki nan nani yaaba n bua ŋa. A doagidi dinla ke a toatieba yudanba leni a naacenba kuli ki tie apo pu. N laa ke tikuli yaa bi kpe dinla ke Abisalomi nan fo, li bi baa yaa mani apo.

⁸ Lanwani fii ki ña ki maadi yaa maama n baa mangi a naacenba pala. Kelima hali Li Miali Diedo po a yaa ñani, li kan faa ke baa niyendo ye a kani. Lani mo n baa yaa bia apo ki cie yaa fala n da cua apo kuli, ki cili a jawaama nni ki pundi hali dinla.»

⁹ Lanwani o bado den fii ki gedi ki kali u dogu bilinciamu buliñoabu kani. Bi den waani bi niba kuli ki yedi: «O bado kaa u dogu bilinciamu buliñoabu kani.» Lanwani bi niba kuli den cua o bado kani. Ama Isalele yaaba toatieba den sani ki kuni yua kuli o denpo.

Bi mia Dafidi n guani Jelusalema

¹⁰ Isalele buoli siiga nni kuli den fu ki tua: «O bado den ga ti Filisiti yaaba nuu nni leni ti yibalinba yaaba n sieni kuli yaa nuu nni, ke moala Abisalomi deli o ke o sani ki ñani mi diema nni.

¹¹ To, Abisalomi, tin den dini yua li bali wan yaa die ti mo kpe li tuogili nni. Be yaa po ke ti ŋmini kaa juogi tin baa tieni maama ki kpeni nni o bado.»

¹² O bado Dafidi den gbadi Isalele yaaba kuli n tua yaala. Lanwani o den soani u tondu bi kopadicianba Tisadoki leni Abiata kani ke ban maadi leni Juda yaaba nikpela ki yedi ba: «Be yaa po ke yi baa tua yaaba n juodi ki baa guani mini o bado n diegu nni?

¹³ Yi tie n kpiiba ki taa leni nni buolu cain. Be yaa po ke yi baa tua yaaba n juodi ki baa guani nni?»

¹⁴ O go den yedi Tisadoki leni Abiata: «Yin yedi mani Amasa mo: ‹Ŋaa taa leni mini Dafidi buolu kaa? Dinla liiga n yaa teni ke a gaa Joabi kaanu ki tua n toatieba yudanciamo hali yaa yogunu kuli, U Tienu n cuo nni u cuonbiadu.› »

¹⁵ Dafidi den maadi ki cuo Juda yaaba kuli pala ke bikuli goa ki taani yanyenma ki soani wani o bado kani ki yedi: «Goa ki kpeni, fini leni a naacenba kuli.»

¹⁶ O bado den goa ki kpendi ki ban pundi Judana. Juda yaaba den fii ki gedi Giligali ki baa tuogi o ki duoni o u kpenu.

Dafidi tieni Simeyi po sugili

¹⁷ Bahulimi yua, Benjamina buolu yua, Gela bijua Simeyi den jaligi ki yegi leni Juda yaaba ki baa tuogi o bado Dafidi.

¹⁸ O den yegi leni Benjamina buolu yaaba tudili leni Sayula diegu naacemo Siba, leni o piiga n bijamuudiba leni o naacenpiiliediba. Bi den duodi Judana o bado nintuali.

¹⁹ Yaa ñinbiagu n den baa duoni o bado deni yaaba den gedi ki baa taa o bado diegu yaaba. O bado n den duodi Judana yaa yogunu, Gela bijua Simeyi den labini ki pugi o.

²⁰ O den yedi o bado: «Fini n daano, n mia ŋa ŋan da tiadi npo n tudima, ŋan sundi mini a naacemo n den tudi apo maama ŋan den ñani Jelusalema yaa daali. Ŋan da go kubi la a pali nni.

²¹ N bani ke n tudi. Diidi, Josefi buolu yaaba siiga kuli mini n kpa cua ki tuogi fini n daano o bado.»

²² Lanwani Tiseluja bijua Abisayi den yedi: «Simeyi n den soli Li Miali Diedo n gandi yua yeni, naani laa pundi wan kpe?»

²³ Ama Dafidi den yedi: «Yinba Tiseluja bijaba, yi maama ki ye lienni. Yi baa gaa lede ki fiini npo ti yanyagidi dinla? Naani mii bandi ke n diedi Isalele diema dinla yoo?»

²⁴ Lane o bado den poli ki yedi Simeyi: «A kan kpe ba.»

Dafidi leni Mefiboseti goa ki mangi leni biyaba

²⁵ Sayula bijua Mefiboseti moko den gedi ki baa tuogi o bado. Waa den nigidi o taana, waa den koagidi o langbiadi, waa den ŋuudi o tiadi, ki cili o bado n den ñani Jelusalema yaa daali ki yaa caa hali wan goa ki kpeni leni laafia yaa daali.

²⁶ Wan den cua Jelusalema o bado kani, o bado den yedi o: «Mefiboseti, be yaa po ke ŋaa den yegi leni nni?»

²⁷ Mefiboseti den goa ki yedi o: «N daano o bado, n naacemo n den janbi nni. Mini a yonbo den yedi: ‹Nani min tie wabo yeni, n baa teni ban paani o ŋunbo u dafielu min jagini ki yegi leni o bado.›

²⁸ N naacemo yeni den kuli nni fini n daano o bado kani. Ama a tie nani U Tienu maleki yeni. Tieni yaala n dagidi apo.

²⁹ Kelima yaala n bi pundi n baadiegu yaaba kuli po a yaa nintuali wani bi tie bikuli n kpe yo. Ama a teni ke mini a yonbo taani leni yaaba n ka ki di a saajekaanu kani. N go pia u lee sanu ki mia ŋa liba?»

³⁰ O bado den yedi o: «A nan go li maadi be? N kadi ki waani, fini leni Tisiba yi baa boagidi i kuani yeni.»

³¹ Mefiboseti den yedi o bado: «Wan taa baa likuli moko, kelima yaala n tugi li yuli tie ke a goa ki kpeni a diegu nni leni laafia.»

Dafidi ŋanbi Balisilayi po

³² Galaadi yua Balisilayi den ñani Logelimi ki cua Judana. O den piadi o bado hali Judana boanduoli.

³³ Balisilayi den podi boncianla, o den pia bina piinii. Wani n den ga Dafidi cangu ki todi o wan den ye Mahanayima yaa dana banlu, kelima o den tie piadiciamo.

³⁴ O bado den yedi Balisilayi: «Yegi leni nni, n baa kubi a n deni Jelusalema.»

³⁵ Ama Balisilayi den goa ki yedi o bado: «N go baa yaa ye bina ŋa yo ke n baa yegi leni a ki gedi Jelusalema?

³⁶ Dinla n pia bina piinii. N go baa fidi ki gagidi yaala n ŋani leni yaala n ki ŋani bi? N kan go fidi ki gbadi bi jaba leni bi puoba yanmani. Lanwani be yaa po ke n baa tua apo tugili?

³⁷ N yaa li piadi a ki pundi Judana boanduoli, li dagidi. Laa pundi ŋan ŋanbi npo laa *ŋanbili moko.

³⁸ Cedi min lebidi ki goa ki kpe n dogu nni, ban piini nni n baa leni n naa n pii naani. Ama diidi a naacemo Kimami, wani n baa yegi leni a. Tieni opo nan lani mani apo maama.»

³⁹ O bado den yedi o: «Kimami baa yegi leni nni, n baa tieni opo nani ŋan bua maama. Ŋan bua min tieni yaala kuli, n baa tieni la.»

⁴⁰ Bi niba kuli n den duodi Judana ke o bado mo duodi, wani o bado den gobini Balisilayi ki gaali o. Balisilayi den lebidi ki kuni o denpo.

⁴¹ Lanwani o bado den cubini Giligali po ke Kimami yegi leni o. Juda yaaba kuli leni Isalele yaaba boagidima den duoni o bado Judana.

Juda yaaba leni Isalele yaaba koani

⁴² Ama Isalele jaba kuli den cua o bado kani ki yedi o: «Be yaa po yo ke ti kpiiba Juda jaba fie ŋa ki duoni a Judana, fini leni a deni yaaba leni a naacenba kuli?»

⁴³ Juda jaba kuli den goa ki yedi Isalele yaaba: «Li tie ke o bado kpi leni ti boncianle. Be yaa po ke li fiini yi pala? Naani o bado dini ti yo? O puni ti bu paabu yoo?»

⁴⁴ Isalele jaba den goa ki yedi Juda yaaba: «Ti die o bado taalima piiga ki cie yinba. Be yaa po ke yi fali ti nande? Tinba ka den kpa maadi ki yedi: ‹Tin kpeni nni ti bado?› » Ama Juda yaaba den maadi leni li pabienli ki cie Isalele yaaba.