2 Samueli 18 - Gourmanchéma Bible

¹ Dafidi den caligi yaa toatieba n den ye leni o ki coadi ba. O den dini yaaba n baa yaa die toatieba tudilitudili leni yaaba n baa yaa die toatieba kobigakobiga.

² O den boagidi o toatieba gola taa, ki teni ke Joabi die goyenli, Tiseluja bijua Abisayi, Joabi waalo goyenli, Gati yua Itayi mo goyenli. O bado den yedi o toatieba: «Mini nba moko baa ña ki yegi leni yi.»

³ Ama bi toatieba kuli den yedi o. «A kan ña. Kelima ti yaa sani bi kan yaa faami tinba wani yaa po. Baa bi yaa ku ti siiga boagidima, li kan yaa tie bipo liba. Ama fini, a tie ti siiga nani niba tudapiiga (10 000) yene. Lanwani yaala n ŋani ki cie tie ŋan yaa ye u dogu nni ki soani tipo mi todima.»

⁴ O bado den goa ki yedi ba: «N baa tieni yin sua ke yaala n dagidi.» Lanwani o den sedi u dogu bilinciamu buliñoabu kani ke a toagola kuli cuoni ki pendi kobigakobiga leni tudilitudili.

⁵ O bado den teni Joabi leni Abisayi leni Itayi kuli yaa ñoabonli n tie ne ki yedi: «N mia yi, yin da tieni mani o jawaalo Abisalomi yaala n bia.» Bi toatieba kuli den gbadi o bado n teni bi toatieba yudanba yaa ñoabonli Abisalomi po.

⁶ Dafidi minteela den ñani ki tuogi leni Abisalomi yaaba li fuali nni. Li toatuogili den tuogi Efilayima fuali yaali n pia i tiidi boncianla yaa niinni.

⁷ Dafidi toatieba den paadi Abisalomi yaaba ke bi siiga nni niba tudapiilie (20 000) bodi.

⁸ Bu toabu den yadi laa tinbuoli nni kuli, ke li fuali n den dini yaa niba den yaba ki cie mu jugisiemu n ku yaaba.

Abisalomi kuuma

⁹ Abisalomi den kadi leni Dafidi toatieba siiga bi tianba. O den jagi *buomo. O buomo yeni den kua yaa ticianbu n yi telebinti tiipo ke i beni cuo Abisalomi yuli. O den juani tanpoli leni ki tinga siiga. Wan den jagi yaa buomo den pendi.

¹⁰ O nilo den laa lani ki gedi ki waani Joabi ki yedi: «Diidi ki le, n laa Abisalomi ke o juani bu tibu.»

¹¹ Joabi den yedi yua n waani o yeni: «A laa o? Be yaa po ke ŋaa kpa o lankani? N bi baa pa ŋa ŋanjilifa kujapiena piiga leni gbanñagidigu.»

¹² Ama o ja yeni den yedi Joabi: «Baa a yaa bi baa pa nni ŋanjilifa kujapiena tudili, n kan tandi n nuu ki kpa o bado bijua, kelima ti den gbadi o bado n teni a yaa ñoabonli, fini leni Abisayi leni Itayi kuli ki yedi: ‹N mia yi yin da tieni mani o jawaalo Abisalomi yaala n bia.›

¹³ N yaa bi janbi o bado ki kpa o bijua, pu kuli kan bi wuoni wani o bado. Baa fini aba mo bi baa sedi npo.»

¹⁴ Joabi den yedi: «N kan fidi ki yaa se a kani ki biani n yogunu.» O den taa kpanbila taa ki muu Abisalomi pali wan den juani bu tibu ki da fo bonŋanla yaa yogunu.

¹⁵ Jawaaba piiga yaaba n den tugi Joabi toatiadi den lindi ki cebini Abisalomi ki puapua ki kpa o.

¹⁶ Joabi den teni ke bi piebi kakaci. Bi toatieba den goa ki cua o kani ki cedi kaa go deli Isalele yaaba kelima Joabi den sieni bu toabu.

¹⁷ Bi den taa Abisalomi ki luni o ku buociangu nni li fuali nni. Bi den dogini o kuli po a tana boncianla. Isalele yaaba kuli den sani ki kuni yua kuli o denpo.

¹⁸ Li den sua ke Abisalomi n den ye yaa yogunu, o den maa li bunbunli o bado joaloangu nni, yaali n baa teni ban yaa tiadi opo, kelima o den yedi: «Mii pia bonjaga yua n baa teni n yeli n da bodi.» O den yini laa bunbunli nani oba yaa yeli. Hali dinla bi yi li Abisalomi bunbunli.

Bi waani Dafidi ke o bijua Abisalomi kpe

¹⁹ Tisadoki bijua Ahimaatisi den yedi: «Cedi min sani ki ban waani o bado o laabaalimano ke Li Miali Diedo pani opo o *teginma panpaani ki faabi o o yibalinba nuu nni.»

²⁰ Joabi den yedi o: «Laa pundi ke fine n gedini laabaali dinla. A baa gedini datoali ama dinla ka, kelima o bado bijua kpe.»

²¹ Joabi den yedi Etiopi yua: «Gedi ki ban togidi o bado ŋan laa yaala.» Etiopi yua yeni den pugi Joabi ki sani ki gedi.

²² Tisadoki bijua Ahimaatisi den yedi Joabi: «Lan tie maama kuli, cedi min sani ki ŋoadi Etiopi yua yeni.» Joabi den yedi: «N bijua, be yaa po ke a bua ki sani? Laa laabaalo kan ŋanbi apo liba kuli.»

²³ Ahimaatisi den goa ki yedi: «Lan tie maama kuli, n bua ki gedi:» Lanwani Joabi den yedi o: «To gedo!» Ahimaatisi den tagini u tialu po yaa sanu ki kua Etiopi yua yeni liiga.

²⁴ Dafidi den kaa u dogu bilinciamu buliñoajabu nni. Yua n den tie o doguudo den doni yaa tanpodieli n ye u bilinciamu buliñoabu yuli po ki yaadi o yuli ki diididiidi. O den laa ke o nilo tiini o bebe.

²⁵ Wani o doguudo yeni den tiani ki waani o bado. O bado den yedi. «O yaa ye o bebe, o kpendinni laabaalimane.» Yua n tiini yeni den nagidi.

²⁶ O doguudo yeni den laa ke jatoa go tiini. O den tiani ki yedi o buliñoaguudo: «Jatoa go tiini o bebe!» O bado den yedi: «Omoko kpendinni laabaalimane.»

²⁷ O doguudo yeni den yedi: «O nikpialo n tiini maama tie npo nani Tisadoki bijua Ahimaatisi yene.» O bado den yedi: «O tie niŋamo, o kpendinni laabaalimano lige.»

²⁸ Ahimaatisi n den nagini, o den tiani ki yedi o bado: «Laafia yo!» O den labini o bado nintuali ki pugi o ki yedi: «Tin jaandi ki kpiagi Li Miali Diedo a Tienu, wani yua n taa yaaba n den fiini mi janjanma ki tuogi leni fini n daano o bado ki teni ti.»

²⁹ O bado den yedi: «O jawaalo Abisalomi ye leni laafia bi?» Ahimaatisi den goa ki yedi o: «Joabi n bi soani mini leni yua n kpendi ne yaa yogunu, n bi laa ke bi niba kubi ŋaŋandi-ŋandi ke ku fuugu ye, ama mii bani yaala n tieni.»

³⁰ O bado den yedi: «Piadi ki guani nepo.» Ahimaatisi den piadi.

³¹ Lanyogunu Etiopi yua yeni den nagini ki pundi. O den yedi: «Fini o bado, n daano, cengi o laabaalimano. Dinla Li Miali Diedo pani apo a teginma panpaani ki faabi a yaaba n den fiini mi janjanma ki tuogi leni a kuli yaa nuu nni.»

³² O bado den yedi Etiopi yua: «O jawaalo Abisalomi ye leni laafia bi?» Etiopi yua den goa ki yedi o: «Lan tua fini n daano o bado yibalinba kuli po leni yaaba n fiini mi janjanma ki bua ki tieni a mi biadima kuli po nani lan tua laa jawaalo po maama yeni.»